[胃食日本] 43年名店手掌大夢幻厚切牛舌蛋包飯!

日本蛋包飯不嬲都好好食,仲有好多各色各樣唔同口味,
而且越出越多,所以蛋包飯對大家已經喺心入面有一定位置~
 
新野係新鮮,但係舊野當然唔會輸蝕,
今日就帶大家去東京恵比寿
一間43年老鋪「チャモロ(CHAMORO)」嘅招牌
有手掌咁大嘅厚切牛舌蛋包飯!
 

  由JR恵比寿西口,行大約3分鐘左右

就可以去到喺B1嘅「チャモロ」~

 

佢LUNCH時間係星期一至六12點至14點半
因為佢店面比較細,只有5張枱,
所以有機會要等,
想去嘅朋友記得預早小小~
我就等左大約20分鐘左右
 
落去睇睇有無位,
無嘅話就寫低名,之前就上去等,
有位就會叫你架啦~
 
佢嘅招牌牛舌蛋包飯SET 1500yen,(下面數上黎第4個)
有一個細細嘅沙律,一碗味噌湯同時一杯野飲
(咖啡,烏龍茶,紅茶)

 

等左大約5分鐘,
我已經喺遠遠見到好大碟蛋包飯
放上枱近睇,個觀感好震撼

 

除左好似雪花咁嘅蛋花之外
佢面頭上面大大塊嘅牛舌真係令人好期待
(有一秒懷疑係咪假

 

當然SIZE大之外佢人氣嘅原因係因為牛舌非常柔軟~
所以我試下用匙羹去切開佢
 
可以睇到真係只係用匙羹就可以分得開架~(我無點用力

 

一放入口
我以為我食緊炆牛腩..(個心入面其實嘩左聲)
超級腍,好柔軟,同平時食嘅牛舌完全唔一樣,唔洗點咬
佢嘅醬汁已經係完全鎖入左D牛舌入面非常濃郁,好感動
 
而飯係用純白飯無任何調味
所以同蛋同牛舌味道夾得好好
 
個蛋花好好食,蛋味夠,唔會好重牛油味,
一入口已經化哂喺個口入面,
好似食緊軟身布丁咁
 
唯一有個少少缺點就係個醬汁有少少偏濃,
食慣左淡味嘅朋友可能會覺得有點兒咸
 

 

總結黎講
成碟蛋包飯可以用一個「  字黎形容
所以唔覺唔覺好快會食完,不過分量足夠好夠飽
3個一齊食真係好夢幻好好食,驚喜十足
值得一試架