經濟效益超越情人節 2016年日本萬聖節扮裝潮流預測

萬聖節原本只係一個俾小朋友呃下糖嘅節日(仲要唔係公眾假期)。今時今日,日本萬聖節嘅市場規達至10億美元,經濟效益已經超過情人節添啦!梗係啦,又要買衫買化妝品買道具買con仲有無數萬聖節限定嘢食同event,商人仲唔賺到笑咩~
 
去到近年,大玩化妝Cosplay扮鬼扮馬開party已經漸漸成為主流,無論小朋友定年青人或上班族、明星定凡人,紛紛都會享受一年一度有得打正牌發癲同以唔同主題做打扮嘅日子。相比香港可能淨係得蘭桂坊、海洋公園夜場會比較high,東京涉谷街頭呢幾年都成為國際焦點,因為真係吸引成萬幾、甚至更多東京都民出嚟扮鬼扮馬玩通宵!

 

睇下幾墟冚!

 

以下係我預計今年萬聖節喺日本將會好hit嘅幾種打扮,亦都附上咗一啲每年都好多日本人好鍾意做嘅主題打扮。如果大家仲煩緊唔知扮咩好都可以參考下喎!

 

1)杯緣子
本身已經好hit嘅杯緣子因為SMAP草彅剛喺電視節目超搞笑惡搞之後更加紅,仲吸引好多唔同明星仿效,連AKB48女神小嶋陽菜都有扮過啊!想扮得更真,可以喺街擺埋高難度pose,或者拎個杯出街擺係鏡頭前,一定似!

 

2)Pokemon Go 訓練員
今年大熱嘅Pokemon Go相信大家都玩過(無玩過都聽過),雖然唔知大家仲有冇開隻app得閒睇下啲小精靈,不過係日本就仲係有好多專一嘅玩家。除咗扮精靈訓練員,大家仲可以扮下小精靈,或者Pokestop。

 

或者佢。

 

3)Zootopia 優獸大都會
大家都知迪士尼喺日本有幾紅㗎啦!Zootopia真係好好睇,套戲喺日本都收得好勁!其實已經有好多cosplayer要cos過Judy~兔仔得意得嚟、套警察制服又貼身有型,加上有男伴嘅可以叫埋佢扮狐狸阿力添!(首先你要...)

 

4)小丑女 Harley Quinn
唔使問,今年應該全球都會出現好多小丑女。雙馬尾可愛得來有型,少少性感加上壞女孩嘅味道真係引死人~連小嶋陽菜都有扮啊!都係嗰句,有男伴嘅可以好似Ryuchell同Peko咁,一齊扮Joker同Harley呀!(首先你都係要...)

 

5)年青人最愛人氣讀者模特兒:Ryuchell
Ryuchell今年係日本電視綜藝界爆紅,如果你仲未知佢係邊個,不妨睇下呢篇文。佢一身復古運動look加上具個人風格嘅妝容,成個look好似外國嘅少年咁。其實將好多隻色著上身就都幾似架喇!記得加條頭帶喎!

 

連AKB48嘅峯岸南都喺前幾日嘅AKB猜拳大賽扮佢呢!

 

6)中華風殭屍
日本電音小天后Kyary Pamyu Pamyu經常以話題裝束現身。上年年尾曾經以殭屍風格上電視演唱,引起一眾年輕人跟隨。拿,㗎妹嘅殭屍同我哋嘅殭屍係唔同㗎!你睇下乃木坂46嘅西野七瀨雖然一身殭屍look,但都係幾靚幾甜!
 
7)Piko太郎
唔使我多講。買一個菠蘿、一個蘋果,袋住支筆。實冇死。
AKB48嘅宮崎美穗率先示範女仔都扮到。輕鬆。

 

仲係唔知扮咩好?俾埋舊年喺涉谷街頭作出出色組合打扮嘅圖俾你哋啦!
 
另外,雖然香港未上,但係日本已經連續好多個星期成為票房冠軍嘅《你的名字。》,我覺得都會好多人扮呢!