[5招成為人氣王]日本最紅話題人物-糖果系男孩Ryuchell りゅうちぇる

要數日本最近最熱門嘅話題人物,就係呢個風靡日本綜藝節目,最近係電視見佢分分鐘多過你見啊媽嘅Ryuchell!
 
 
可能你都會好似我咁,第一眼睇完全唔明佢到底紅啲乜...驟眼睇根本只係個會化妝(仲要係宿醉妝)同埋着得好鮮艷好原宿嘅男仔。但點解Ryuchell會深得日本上下妹妹仔歡心(佢仲要有女朋友架喎),紅到最近瘋狂上綜藝節目成為家傳戶曉嘅人呢?等我同大家分析吓啦!
 
《Ryuchell 小百科》
真名:比嘉龍二(Higa Ryuji)
血統:1/4美國血統(爸爸是美日混血兒,媽媽是日本人)
生日:1995年9月29日(20歲)
出身地:日本南部一個非「都道府縣」嘅地方:Chel Chel Landちぇるちぇるランド (What?)
身高:172cm
喜好:卡拉OK
特技:服飾配搭、滾軸溜冰
職業:服飾店店員、模特兒

 

爆紅原因大解構!人氣高企原因係...

 

1)鮮明同印象深刻嘅人物設定
Ryuchell頭頂金毛帶80年代運動型毛巾hairband、愛穿美式復古但顏色鮮豔嘅衫同鍾意化妝,咁鮮明嘅style梗係出眾過螢火蟲啦!之前KAT-TUN嘅上田龍也仲搵Ryuchell過兩招改變其兇神惡煞嘅形象,雖然我唔係好接受到,但得到一致好評呀~
 
 
 
唔止上田,連大名鼎鼎嘅男神山下智久都扮過佢!
不過你估Ryuchell啲神髓係咁易學嘅咩~啲反應真係笑死我喇!
 
 
Ryuchell仲話自己係來自日本以南一個叫Chel Chel Land嘅地方,而且係個度嘅王子
其實大家都知道佢講緊嘅係沖繩,但因為呢個咁可愛嘅叫法,越嚟越多後生仔女直接叫沖繩做Chel Chel Land添!聽落成個主題樂園咁,梗係引起話題啦。
 
2)無愁無慮似天使 天天帶著笑~
其實日本係一個好壓抑嘅地方嚟嘅...但見到呢個成日笑,仲要係自己笑自己嘅傻仔真係忍唔住笑埋佢一份!冇錯,有節目就分析過點解Ryuchell會咁受歡迎,除咗因為佢真係對fans好好,會逐個覆留言之外,佢有個習慣就係會講完啲無聊嘢自high完自己笑兩聲,成件事就會唔好笑到變得好笑嘞!有無諗起你我身邊都有,會自己搞爛gag自己笑嘅kai子friend呢?

 

3)疑似Gay但其實係超級好男友!? 情侶檔拍住上
 
Ryuchell講嘢又高音又會用啲女高中生先用嘅tone,好多人一開始都以為佢係gay先會咁受妹妹歡迎。但其實人哋有個交往穩定嘅女朋友Peko!Ryuchell仲係凡人嘅時候喺你都可能去過嘅原宿SUPER WEGO到做店員,咁就識咗後輩Peko喇。而家兩位仲一齊辭職發展成情侶model,一齊宣揚原宿文化。因為兩位拍拖嘅故事都真係幾好笑,所以兩位都會孖住上節目!一班學生妹就話最鍾意睇Ryuchell吃Peko醋,話有反差萌呢。

 

4)明明靚仔但口臭 唔完美夠貼地變賣點
當呢位紅到爆燈嘅另類男神Ryuchell俾妹妹仔瘋狂迷戀嘅時候,佢女朋友Peko就毫不客氣公開咗一個殘酷嘅事實:Ryuchell個口好臭架~!
 
其實有邊個會鍾意人話自己好臭呢?仲要係電視節目講,簡直就同話俾全日本聽佢男朋友係口臭無分別。但樂觀嘅Ryuchell竟然係笑住話:「係呀我個口好臭架嘻嘻!」厚面皮程度搞到大家都忍唔住笑佢,即時口臭變萌點。果然世界上無完美嘅人,貼地啲人氣分分鐘仲高呀!

 

5)反應快 超適合綜藝節奏
一般你見到嘅搞笑藝人都係比較年長,近年嚟已經少見啲真係搞笑嘅年輕人。不過Ryuchell嘅節目效果真係好好,無論係有心演出(重要本人會自認)定係無心插柳,都能夠成功引起話題,係勁嘅!
 
 

睇嚟Ryuchell都會紅多排,甚至有機會紅到嚟香港!唔知以後會點發展呢?希望佢同Peko唔好散啦

我就預計會越來越多呢type嘅「糖果系男孩」出現,香港會唔會都出到個Ryuchell呢?

P.S. Ryuchell正常起黎可以幾靚仔架!

Ryuchell Blog: http://lineblog.me/ryuchell/