文具控必去 表參道文房具CAFE

每次去親原宿都係去竹下通,今次終於第一次踏入表參道啦!
點解?咪就係為咗依間文具控必到嘅文房具Cafe囉!
 
 
從樓梯望落去已經見到好多文具,不過一眼望落去仲未發現有咩咁特別,要慢慢睇先發現有幾正!
 
 
睇文具之前,食個飯先~張Dessert Menu好靚啊!
 
我點咗份味噌豬肉定食~雖然望落塊豬就薄薄地,不過成個餐好好食!個飯係紅米飯,仲配咗一兜仔櫻花蝦仔比你,勁香勁好食~
白色個舊係日本人最鍾意嘅忌廉芝士,配肉/菜都好夾~個紅肉橙汁入面仲要有好多粒粒橙肉,總而言之就係一份好好食嘅午餐~
 
朋友點咗咖哩飯~一樣好香好好食~份烤野菜仲要鬼死咁吸引㖭!
 
落單嘅時候,我比多咗100yen買禮包,每個禮包入面嘅文具都唔一樣,就睇你好唔好彩抽到啲咩啦~
 
一打開:嘩竟然抽到成pack Marker同半透明memo紙!100yen,抵到爛!大家記得落單個陣要加100yen抽文具!
 
一路食住野/飲住野嘅時候,大家可以去依到隨便拎文具嚟用~
依邊有簿、水筆、marker之類~
 
另外依邊就係各式各樣嘅顏色筆~雖然規模唔算誇張到嚇死你,但係種類同選擇都幾多㗎!
 
好似依種變色蠟筆畫起上嚟都幾特別㗎~
(張紙係大家嘅餐紙,如果大家唔想畫喺佢地啲簿到,就要小心唔好整污糟張紙啦~)
 
大概係依種感覺~另外仲有好多其他有趣嘅筆等大家嚟發掘!
 
跟住就嚟睇吓有咩文具買啦~
 
首先登場嘅係名信片~
 
好特別啊!我最鐘意右下角個張「惡夢散」~另外仲有好多好有玩味嘅卡~
 
依個係刺繡卡片,一睇落去就覺得高級~
 
跟住嚟睇下依款當店名物豆腐先~
 
其實入面唔係豆腐(鬼唔知咩),而係Memo紙!
 
豆腐Memo有2款,一款係木棉豆腐,另一款係絹豆腐~畫出嚟都有分別㗎!
 
除咗豆腐Memo好特別次外,依款schedule Memo亦都好受歡迎~設計簡單,我覺得幾啱男士/鍾意簡約風嘅朋友~
 
日本地圖file!有吉祥寺、表參道等等地方嘅地圖,唔係亂咁畫㗎!
 
除咗地圖file之外,仲有色紙同膠紙㖭!
 
當然啦,膠紙並唔只得地圖款,仲有好多唔同款色嘅~店家好貼心咁將啲膠紙貼晒喺啲白紙上面,方便大家揀款~
 
咦……磓磓、?刀、泥剷?諗多咗啦,其實依幾樣工具都係筆嚟!
 
以下依支筆仲有趣,事關佢並唔係用嚟寫字嘅,而係……
 
用嚟種花嘅!唔信買枝返屋企種吓!
 
好得意嘅萬字夾~有喵星人又有汪星人,大家唔洗爭啦!
 
萬字夾散收收唔知點放好?用依個磁力王吸收晒啲萬字夾就啱晒!
 
唔少人都鐘意砌lego/模型,依款就係用木片砌貨車筆桶~好靚啊~
 
千祈唔好睇少依枝塗改帶,佢並唔係你普通用開嘅塗改帶~
其實……佢個頭識得360度反轉反轉再反轉㗎!咁厲害,問你怕未!
 
筆記簿袋仔~
 
折疊式練習簿咁款嘅黑板仔~仲有螢光色嘅粉筆可以配成一套㖭!
 
由於店內得意嘅文具實在太多,唔仔細睇真係睇唔晒!
依到就有啲方便大家從顏色開始揀起嘅文具~一眼望落去真係好colorful好靚~~~
 
最後如果想送禮物又唔知揀邊款好,可以選揀依啲文具福袋~都幾吸引㗎~
 
畫吓畫吓,咁就一個下晝啦~同朋友一齊嚟買下嘢、睇下嘢、傾吓計、畫吓畫,都幾舒服好玩㗎~
(圖入面幅畫並唔係本人畫嘅……)
 
有時間想嘆吓Cafe嘅文具控們,推介你地嚟原宿依間文房具Cafe朝聖~~~
不過留意依間cafe星期六日同紅日都係唔開㗎!唔好傻更更去摸門釘www
下次再分享其他文具cafe比你地睇啦~~~byebye~