【廣島】宮島2000yen食到咩牡蠣扇貝呢 ?!

 
上次同大家掃盡晒宮島嘅商店街啦 ~
但係宮島最出名就係牡蠣(蠔)當然唔可以放過啦 , 所以我同Xindy就搵多咗間食牡蠣嘅店坐低慢慢食啦  , 原來宮島啲鋪頭都幾早閂門㗎 , 晏晝4點幾但大部分嘅餐廳已經閂晒 , 所以最後就搵咗 <みやじま華屋敷> 又有位坐後面又有得買手信 , 雖然唔算係餐廳但咁仲好呀勝在平呀 , 我地叫咗4款烤牡蠣1款燒扇貝只係¥2000 (大約$140港幣) , 如果係餐廳食的話一定貴起碼一半呀~
 
掃街個時食過2間嘅牡蠣已經好好味 , 唔知會今次依間 <みやじま華屋敷> 係咩質素呢 ?
 
依個就係 <みやじま華屋敷> 佢旁邊就可以坐低食~
 <みやじま華屋敷> 都有幾多唔同味道嘅嘅牡蠣 , 除咗牡蠣之外仲有扇貝 , 睇落去好似都幾大粒添~
可能遊客多所以有圖片嘅餐牌 , 叫嘢食個陣超級方便呀 
 
 
一般燒牡蠣¥400 2個 , 宮島商店街小店大部份都係依個價錢
 
買完比完錢就會即場燒 , 保證新鮮又熱辣辣~
 
大約等咗10分鐘左右 , 我地一共4款燒牡蠣1款扇貝~
 
第一款 燒牡蠣
依間嘅牡蠣都幾大粒 , 但個人認為佢地嘅牡蠣比較咸
但海水味比較重 , 不過我都係鐘意橫掃商店街第一間嘅燒牡蠣多啲~
推得一試嘅 , 商店街咁多牡蠣可以揀幾間試下 , 還掂食蠔1,2隻係唔夠喉㗎嘛
 
第二款 芝士燒牡蠣
芝士好香唔算好濃 , 但可能牡蠣本身味道比較淡 , 芝士有少少搶走咗牡蠣嘅味
 
第三款 芥末章魚燒牡蠣
佢啲芥末章魚幾鮮甜同牡蠣幾夾而唔會搶走牡蠣嘅味道 , 依個真心好味 推薦呀 !
 
第四款 泡菜章魚燒牡蠣
依個味道都係比較重 , 有少少辣不過辣度可以接受嘅 , 因為泡菜章魚嘅味道太濃所以完全食唔到牡蠣味~
 
最後一款 燒扇貝
扇貝好大粒 , 味道超級超級超級鮮甜 , 扇貝嘅邊位置好爽身 , 依個真係好好食
本來打算追加燒扇貝 因為太好味完全唔夠喉 , 但因為我地驚趕唔到船所以............
唔緊要 ! 一定有機會再食㗎 !! 真係超級推薦~
 
依個就係 <みやじま華屋敷> 嘅門口啦~ 
 
 
 <みやじま華屋敷>
広島県 廿日市市 宮島町 531-2