風水
25
Oct 17
00:39
博客

[香港在日本] 「九龍風水傳」20周年 重現九龍城寨昔日樣貌

[專欄:香港在日本] 二十年前,Sony Music以九龍城寨作為故事舞台,開發咗對應Play Station嘅遊戲「クーロンズゲート」(KOWLOON'S GATE -九龍風水傳-)。於『九龍風水傳』嘅世界當中,1997年5月,喺香港「回歸」前夕由於陰界嘅九龍城寨突然於陽界出現,身為超級風水師嘅主角被香港最高風水會議傳召,潛入調查原因及重整混亂嘅陰界風水氣脈,而風水氣脈係由四神獸東─青龍、西─白虎、南─朱雀、北─玄武所掌管……(再講就劇透,剩低請自行遊玩享受XD) 二十年後,當年一齊開發嘅同伴再次聚首一堂,以粉絲嘅捐助作為資金將幾乎成為歷史嘅「クーロンズゲート」世界重新製作,配合VR技術重新將九龍城寨帶入日本! 截自官方網頁。 睇返今次「クーロンズゲートVR suzaku」之前公開過嘅影片,其中一條影片就係重現返當年其中一條喺「クーロンズゲート」出現過嘅街道:「龍城路」。玩家到時可以體驗喺九龍城寨入面散步嘅感覺。比起遊戲,開發人員更希望以VR技術將呢條令人可以自由咁喺回憶中嘅街道入面行逛,同唔同嘅角色重新會面。 遊戲裡面有好多城寨嘅元素係入面。標誌性嘅後巷,仲有唐樓、戲院等都有出現到喺畫面之上。單係opening睇到嘅「陰界」街道就有唔少香港特色嘅廣吿牌:有寫住「成人用品」霓虹招牌,對應返當時黃、賭、毒俱齊嘅情況;亦有唔同醫療診所嘅招牌,因為以前城寨冇被規管,好多無牌醫生都會喺嗰度開舖。
23
May 17
01:46
博客

1997年今日,喺香港「回歸」前夕,陰界嘅九龍城寨突然於陽界出現......

官方今日公佈最新嘅PSVR『九龍風水傳VR朱雀』teaser 影片,預定夏季推出 於『九龍風水傳』嘅世界當中,1997年今日,喺香港「回歸」前夕由於陰界嘅九龍城寨突然於陽界出現,身為超級風水師嘅主角被香港最高風水會議傳召,潛入調查原因及重整混亂嘅陰界風水氣脈,而風水氣脈係由四神獸東─青龍、西─白虎、南─朱雀、北─玄武所掌管……(再講就劇透,剩低請自行遊玩享受XD) 『九龍風水傳』已經係PS1年代嘅產物,雖然香港玩家可能已經比較少人會提起呢隻遊戲,不過日本方面唔知係咪出於日本人對香港嘅九龍城寨有種特別嘅感情,所以久唔久都仲係會見到關於呢款遊戲嘅消息。 好似喺2015年官方就曾為作品重新推出原聲帶同設定集,其中仲包括遊戲人物設定、九龍城寨內部分街道嘅設定畫等等,重要搞咗個原畫展添。 而直到上年,官方株式會社JETMAN仲喺CampFire平台搞眾籌嚟籌錢開發續作,短短大半日就籌到350萬日圓,最後就籌到超過900萬日圓! 而支持PSVR嘅續作『九龍VR朱雀』,就已經預定6月會有遊戲首部分見街。『KGVR』除咗係前傳故事外,玩家更可自由遊覽九龍城寨同龍城路。
11
Feb 16
20:33
博客

東瀛新春開運法之掌相篇

呢幾日拜年,係咪不停俾D三姑六婆問你「幾時結婚呀?」「幾時生仔呀?」 真係問到心都煩,想拎起支劍蘭黎同佢開年! TBB有蘇師傅出黎教人風水,LikeJapan就有我東方不敗黎教大家睇掌!!! 日式睇掌START! 齊齊打開隻手!!! 搵唔搵到橫跨生命線同感情線既兩條橫線呀? 原來,上面個條就係戀愛線!而下面個條就係妊娠線!!! 大家搵唔搵到呀?我已經搵到喇!超前超前!!! 日本黎講,兩條線愈接近拇指食指既話,就代表愈早拍拖結婚生仔架! 妊娠線唔夠長,痴埋咗落手掌正中間既事業線既話呢,就代表你事業心太重,較遲先有BB…… 但如果發現兩條線都無既話,就……(拍肩) 另外,手指短係代表子女運,原來手指尾過短既話,都係代表較難有BB!!! 如果黎緊會出發去日本旅行既話,記得去求子既神社到參拜!!!!! 去關東旅行就去箱根神社! 去關西旅行就要去住吉大社! 聽講,去完呢兩間神社參拜完,都好快有好消息架!!! 如果唔去日本旅行既話,都可以好似我咁去荃灣龍母廟摸龍床!