亞馬遜
14
May 17
23:55
博客

昭和幪面超人 邊個係你童年回憶?

今次為大家介紹一下昭和幪面超人。動作同故事自然無後來嘅平成幪面超人咁多花款,不過以熱血程度計,真係一啲都唔輸蝕!   1971年:幪面超人1號 1971年,首套《幪面超人》系列正式開播,《幪面超人》嘅長遠歷史正式展開。主角係一位頭腦聰明,運動又叻嘅青年科學家——本鄉猛(洪大龍),練緊電單車嘅時候畀撒旦幫襲擊,捉咗返去研究所,仲畀佢地嘅科學家改造成改造人。當佢同恩師綠川博士一齊由研究所逃脫嘅時候,本鄉猛變身成為幪面超人1號,開始佢同撒旦幫漫長嘅戰鬥。全98集,係《幪面超人》系列最長嘅作品。   1973年:幪面超人V3 緊接《幪面超人》播放嘅第2部作品,故事亦延續自《幪面超人》,主角風見志郎(洪天馬)畀「毒蠍幫」殺全家,喺自己亦都就畀佢地派出嘅怪人殺死時,一號同二號一齊救咗佢。於是風見志郎就求佢地兩個將自己改造成同佢地一樣嘅改造人。本來2人一直反對,直至風見志郎為咗救佢地2個喺毒蠍幫嘅研究所畀改造人破壞光線打中而身受重傷,為咗幫佢保命而將佢改造成幪面超人V3。特別值得一提,當中後期先出現嘅盟友怪金剛英勇表現相信好多人都仲會記得,V3更稱佢為幪面超人4號。