‎日本娛樂新聞‬
25
May 17
18:18
新聞

J家偶像組合KAT-TUN前成員 田中聖涉藏大麻被捕

人氣組合KAT-TUN嘅前成員田中聖於5月24日涉嫌藏有大麻於澀谷被捕。據悉田中聖否認指控。 根據警視廳資料所知,日本警察於當日下午6時左右截停田中聖駕駛嘅車輛,問問題之際發現車內司機位於副駕位之間發現大麻,而當時田中聖係一個人嘅。不過田中聖否認大麻屬於自己。 資料來源:Yahoo! JP,ANN News
20
Dec 16
00:27
新聞

日本最靚仔高中生選舉結果發表!

尋日日本就舉行咗一個叫做「日本第一靚仔高中生」比賽,喺全國嘅代表入面,嚟自福井縣、17歲嘅高中2年級生本田響矢成功擊敗眾對手,獲得第一名。   本田就話自己好憧憬菅田将暉、山崎賢人、野村周平等近兩年非常紅嘅年輕男演員,仲話會視佢哋為目標,成為一個出色嘅男演員添!你哋又覺得呢位少年點先?   第二位就係東京出身嘅17歲高中二年級生那須泰斗。   另外SNOW賞有福岡縣出生嘅16歲高一生宇佐卓真。   而同電影「今天的吉良同學」合作嘅「今天的吉良同學」賞就係神奈川縣出身嘅18歲高三學生大岡拓海。   可能姐姐真係老啦,見到呢班小鮮肉冇乜感覺。不過可能佢哋遲啲都會係日本娛樂圈發熱發亮~   更多圖片+資料來源:Model Press
27
Dec 16
05:57
新聞

Softbank為SMAP最後一夜拍攝特別廣告

大家都知道今晚係《SMAP×SMAP》最後一集。已經有唔少感動人、喚起回憶嘅畫面播出喇。除此之外,Softbank仲特別為佢地今晚拍咗個廣告,令唔少粉絲高呼:「實在太有心,太令人感動喇!」             SMAP自2009年起就擔當Softbank嘅代言人。雖然最近冇乜佢哋5個幾廣告,但今晚就播出咗以佢哋嘅「Original Smile」為BGM、集合佢哋過往廣告精選畫面嘅「完全新作」廣告!     廣告入面,片段中夾雜著「曾經發生過呢啲、同呢啲,各種各樣嘅事,直到今時今日,真係非常之,感謝。」嘅對白。成1分鐘長嘅廣告入面最後係Softbank代言狗「白戶爸爸」稍微傷感嘅表情咁講「唔係再見...啊嘛」...嗚嗚  
29
Nov 16
17:40
新聞

V6 長野博宣布結婚!

今日將出演日本電視台嘅現場直播節目「BEST ARTIST 2016」嘅V6成員長野博今日於V6嘅Fan Club會報上宣布將會結婚,但就未公佈女方身份,相信係想第一時間先傳達消息俾粉絲。   長野博係繼V6嘅井之原快彥(40歲)第二位V6嘅(準)已婚人士。井之原快彥於2007年與女演員瀨戶朝香結婚。另外,舊年9月嘅時候TOKIO嘅國分太一亦都公佈咗同一般嘅女性結咗婚。   有唔少網民就猜測對手可能係白石美帆。另外相信今晚長野博可能會藉著現場直播節目上公佈更多內情。   資料來源:Yahoo.jp  
09
Aug 16
01:15
博客

榮倉奈奈與賀來賢人宣布結婚!

生得又高又可愛,今年28歲嘅榮倉奈奈尋日已經入籍結婚喇!對象為曾經一同拍攝2014年嘅嫌疑日劇《為了N》嘅賀來賢人!   頭先佢哋已經通過經理人公司公佈喜訊,賀來仲話拍咗一年多之後覺得同Nana嘅話可以過到好快樂嘅人生添喎! Nana就話覺得好幸福,因為從今起可以同老公一齊同甘共苦,真係好sweet呢~     事務所就話Nana未有身孕,嚟緊都會繼續演藝事業。期待見到榮升人妻Nana嘅新戲呢! 不過我對佢最深刻嘅印象都係《求婚大作戰》嘅時候!你哋呢?  
05
Dec 16
20:20
新聞

成宮寬貴被指吸毒照片 真相其實係...少女心爆發!?

34歲男演員成宮寬貴被八卦雜誌《週刊Friday》刊登疑似吸毒照片,被指與朋友在房間內用鼻吸食可卡因。報導指出相片係由佢朋友提供,攝於11月9日凌晨3點幾。張相初步睇就見到檯面好亂,有啤酒罐、煙、打火機,玻璃杯旁邊有塑膠紙,同埋有啲白色粉末添。成宮出道以來形象一向健康,今次報道引起好多粉絲同觀眾熱烈討論,加上最近唔少娛樂圈人士因吸毒被捕,令唔少人都懷疑件事嘅真偽㖭!     成宮寬貴就非常憤怒地指呢個報道根本冇事實根據,並發表聲明話「我,成宮寬貴,絕對沒有使用藥物」,相關經紀公司仲準備採取法律行動。不過有眼利嘅網民就發現咗更加特別嘅事情真相喎。   一齊睇下:   睇唔明日文唔緊要。雖然成宮一直否認吸毒但冇說明枱面上嘅係乜嘢,但眼利嘅女網民就話枱面上擺放嘅係呢包超可愛嘅「たのしいケーキやさん♪」、即係用來整手指size嘅蛋糕、雪糕嘅玩具糖果!Tune番光張相都真係幾似!  
10
Apr 17
04:57
新聞

【已確認消息】佐佐木希親自承認 即將與渡部建結婚!

又一個女神要榮升人妻啦~前幾日有週刊傳佐佐木希(29歲)同廣告商透露即將與搞笑藝人UNJASH嘅渡部建(44歲)拉埋天窗。 就係啱啱,當事人喺電視節目《行列のできる法律相談所 》直播上確認呢個消息,佐佐木希仲喺IG上傳sweet到爆合照,真係恭喜晒兩位當事人呀!     私、渡部は佐々木希さんと結婚します! 結婚! おめでとうございます㊗️#行列のできる法律相談所 pic.twitter.com/htotjh6rL8 — ばいばいきーん03 (@miu_ray) 2017年4月9日   其實之前佢哋已經被雜誌影到同居,但二人都冇承認或否認戀情,估唔到半年唔夠仲宣佈埋結婚嘅消息。佐佐木希前排先出完頗性感嘅寫真集,唔少粉絲都話可能係封山之作! 佐佐木希仲喺IG向fans道歉,話一直以來都未有機會向大家談及戀愛嘅事,真係非常抱歉。傻豬嚟嘅,見到女神開心,一眾粉絲即使傷心都會含淚祝福嘅TvT  
22
Nov 16
01:47
新聞

橋本環奈戴可愛貓耳微性感新靚相曝光

橋本環奈戴可愛貓耳及新雜誌封面靚相曝光!     今期日本少年漫畫雜誌《週刊Young Magazine》搵嚟千年一遇嘅天使級偶像影封面及內頁寫真,其中一部分嘅相片已經正式曝光!見到環奈BB以貓耳造型配上毛茸茸家居服,臉上神情relax得嚟又帶點可愛,真係好治癒呀~     資料:Oricon、《週刊Young Magazine》
20
Aug 16
22:07
新聞

出道11年女偶像團體℃-ute宣布明年解散!

三個月前先嚟完香港開演唱會嘅Hello! Project旗下偶像團體℃-ute,今日突然喺官方網站宣布將於明年6月開完12週年演唱會後解散。 呢個突如其來嘅消息令好多粉絲表示驚訝傷心。   ▲℃-ute嘅現任成員有五位,包括隊長矢島舞美、 中島早貴、鈴木愛理、 岡井千聖、以及萩原舞。由2007年2月21日第一張單曲《櫻花乍現》開始至今,連續29張單曲的銷量都達到Oricon週間銷量排名10位或以上嘅紀錄。   ℃-ute嘅成員同經理人公司今朝喺官方網站發表聲明,兩方面都提到全部成員已經年滿20歲,出道也已經達11年。當經理人公司同成員一起討論以後目標時,發現成員各自都有唔同想發展嘅方向。不過基於五人當時未實現喺埼玉Super Arena開演唱會嘅夢想,當時決定繼續努力進行團體活動。然後自宣布明年6月出道12週年紀念演唱會之後,因為佢哋終於能夠踏上夢寐以求嘅舞臺,所以就希望可以以此為終,實現夢想後解散組合,各自追尋新嘅目標。   ▲℃-ute五位成員表示佢地係Hello! Project一手湊大嘅組合,因為有H!P先至有佢哋。因此比起暫時停止活動或從H!P畢業,佢地選擇咗解散,希望到最後一刻五位都係屬於Hello! Project嘅℃-ute。佢哋仲話堅持咗十一年追尋夢想,可以五個人一齊踏上呢個大舞台,終於可以自信地同大家講℃-ute已經無憾了。   最後佢哋仲多謝成軍咁多年來一路支持佢地嘅粉絲,如果唔係佢哋都唔會走到今日。
14
Nov 16
21:38
新聞

山本彩初登女性雜誌封面 露健康性感腹肌

喺香港都有大量粉絲嘅彩姐山本彩(NMB48)喺Twitter公佈咗佢會登上下期anan嘅封面。今次係佢出道以嚟第一次登上女性雜誌封面,仲大sell健康性感,露出彩姐出名嘅性感腹肌㖭!     今期anan繼續介紹點樣活化腸內健康改善體質同達到美顏功效。過往anan都搵開有村架純、梨花、小嶋陽菜等係女性讀者中人氣較高嘅女藝人。今次編輯部想揀喺偶像界可以堪稱健康美第一嘅人做封面,結果就揀咗彩姐喇!   今期anan會係11月16日開始販賣,各位粉絲唔好錯過~   Source:Oricon