32男圍繞1女嘅「困獸鬥」!? 獸慾與權力嘅嘅真‧人性黑暗

 

呢個係一件發生於二次大戰時期嘅真人真事,係一個將人性醜惡發揮得淋漓盡致嘅故事。其實久唔久大家可能都會喺市面上見到一啲作品係關於一群人流落荒島……例如一班美少女同一個男主角之類……(你睇緊咩嘢!?)嘅求生故事。

 32男圍繞1女嘅「困獸鬥」!? 獸慾與權力嘅嘅真‧人性黑暗

不過呢篇文章,就確實係喺歷史發生過嘅事件,一件關於32男1女流落荒島嘅事件。佢哋互相撕殺,為嘅唔係生存,而係權力同全島唯一一個女人。

事件雖然係發生喺1944年,不過要講就不妨由1939年講起啦,話說日本有個女仔叫比嘉和子(當時16歲),先俾佢幅相大家睇。

 32男圍繞1女嘅「困獸鬥」!? 獸慾與權力嘅嘅真‧人性黑暗
係咪好省鏡呢? 拍埋慈禧真係贏十幾條街。

話說佢年輕時去咗投靠咗住南洋嘅兄長,後來又同沖繩出身嘅青年結婚,輾轉跟住佢去到馬里安納群島嘅一個屬島:安納漢島。不過當時係二戰時期,整片馬里安納群島都係處於戰爭狀態,美軍同日軍嘅戰鬥無日無之,甚至連安納塔漢島都俾美軍空襲過。最後終於連佢老公都失蹤埋,島上只係餘下佢同佢老公個上司。

 32男圍繞1女嘅「困獸鬥」!? 獸慾與權力嘅嘅真‧人性黑暗

正當比嘉和子同上司日下部正在開始發展出更「複雜」嘅「關係」之際,美軍嘅大隊亦已經打到嚟。日本當時徵用大量漁船作運送物資之用,其中包括捕鰹漁船「兵助丸」。

6月11日,美軍攻佔安納塔漢島,而「兵助丸」同眾多船隻一樣被美軍擊沉。最終合共有10名軍人及21名船員生還並逃亡嚟到安納塔漢島。由於島附近所有船都先後沉沒,於是33人就只能夠「共處一島」。

 32男圍繞1女嘅「困獸鬥」!? 獸慾與權力嘅嘅真‧人性黑暗

接下來經過「塞班島之戰」同「馬里亞納海戰」等多場戰事,日軍固然傷亡慘重,而美軍亦有一定程度折損。其中一架B-29轟炸機於出發參與名古屋空襲時就意外墜毀安納漢島,機組人員全體陣亡,埋下咗事件嘅伏線。及後日本戰敗,美軍曾對島上廣播消息通知佢哋日本已經投降,不過33人並不相信並拒絕離島,反而退入森林,避開美軍同過住佢哋嘅「真‧隱世生活」。不過,島上有32個男人,但女人就得一個,一旦生存不成問題,性慾就開始來了,而眾男彼此間嘅爭執亦激烈起來。

當時為咗令其他男人放棄,比嘉和子早就同日下部結婚。不過由於日下部係個獨佔慾望好強嘅人,所以往往反而係佢成為爭執源頭,甚至曾因有人只係同比嘉和子講野就打起上來。其後,佢哋終於發現之前墜落嘅B-29,仲喺機上搵到幾把壞咗嘅手槍。其中兩個私下感情較好嘅人將壞槍零件重新組合,組裝咗2把正常運作嘅手槍,就出事啦。

好快,就有個同佢哋關係好差嘅人死咗。雖然兩人向大家解釋自己目睹意外過程,不過大家都覺得係佢哋兩個下嘅殺手。其後佢哋又殺咗好幾人,而累積嘅權力就愈來愈大。有一日,佢哋仲威脅日下部要同比嘉和子發生關係,否則就要將佢殺死。而日下部最終亦屈服了,令情況發展成「三皇一后」嘅狀態。不過,最後手槍二人組內鬨,其中一人被另一人打死了。

日下部由於害怕,當日就逃跑了,餘下比嘉和子同手槍男,不過手槍男冇幾耐就意外墮海死咗……比嘉和子同出現返嘅日下部咁講喎。

之後把手槍就不停轉手,人亦都不停死。死法由浸死到墮崖,甚至食物中毒死都有,但就係冇人中槍死。總之槍就變成咗權利象徵,有槍就可以佔有和子。幾年間共有13人死亡,儘管大家連槍都扔埋落海,都仲係有人死。終於,男人們決定要將紛爭嘅根源——比嘉和子殺死。

 32男圍繞1女嘅「困獸鬥」!? 獸慾與權力嘅嘅真‧人性黑暗

和子知道佢哋要殺自己後立即逃跑,最後仲冒險游出海,終於就俾佢遇到美軍嘅船隻。佢返到日本後披露自己嘅經歷,又供出島上眾人嘅消息,最後全員終於喺1951年6月26日投降,並於翌月返回日本。

有一件事係不得不提,原來故事最初失蹤,和子嘅老公一早就返咗日本,仲有埋另一個老婆……

以上就係事實嘅全部……和子話係咁喎。不過無論如何,和子已經因為呢件事而徹底「上位」,媒體全方位報導,佢仲親身上陣主演舞台劇「安納塔漢島」,於1952起全國巡迴演出,歷時兩年。1953年連電影都出埋,該片就係『安納塔漢島的真相』,其後個故事仲進軍荷里活,再出套『安納塔漢』添。

不過喺未有網絡嘅年代,淨係靠「爆點」又比較難持久嘅。和子曾經要做埋脫衣舞孃維持生計,之後佢34歲曾經再婚,不過42歲又變返寡婦,最後49歲(1974年)時死於腦腫瘤,結束佢短暫又傳奇嘅一生。