東寶宣布將製《哥斯拉》史上首套動畫電影《GODZILLA -怪獣惑星-》並於2017年11月上映。電影故事背景為成為了怪獸惑星嘅2萬年後嘅地球。電影將有豪華聲優陣助陣，包括梶裕貴、櫻井孝宏、杉田智和、諏訪部順一、花澤香菜、宮野真守等超人氣聲優。
導演監督則為《名偵探柯南》系列監督静野孔文及《亜人》系列嘅瀬下寛之；故事及劇本則由曾執筆《魔法少女小圓》、又「老虛」之稱嘅虛淵玄著手，全部都係日本動漫界嘅實力派製作人！
《哥斯拉》電影系列自1954年以來一直受到粉絲愛戴，而舊年庵野秀明執導嘅《真·哥斯拉》更加創下82.5億票房！雖然未咁快拍到下一套電影，但東寶就梗係食住條水，於是製作動畫版！
今次背景為未來世界。即使過咗2萬年，人類仲係同緊哥斯拉打緊呀！故事初步講述人類同怪獸打咗大半世紀後終於敗走並從地球逃脫，一部分嘅人類乘坐恒星間移民船前往11.9光年外嘅恆星，但用咗20年到達目的地後先發現嗰度根本唔適合人類居住。其中船上嘅主角HARUO就係喺4歲親眼目擊雙親被哥斯拉慘殺，20年來只係諗住要返地球為雙親報仇。
有日本影迷就話哥斯拉就係因為係特攝電影先好睇，所以對動漫電影嘅期待唔大，亦希望東寶見好就收。不過亦都有好多支持聲音話因為幕後卡司強大，所以期待動畫版會做到電影版做唔到嘅效果，亦相信唔會伏得去邊喎～
電影詳情：
導演：静野弘文、瀬下寛之
劇本：虚淵玄
聲優：梶裕貴・櫻井孝宏・杉田智和・諏訪部順一・花澤香菜・宮野真守
制作：ポリゴン・ピクチュアズ
發行：東宝映像事業部
電影『GODZILLA』將於2017年於日本全國公開
(C)2017 TOHO CO.,LTD.
About Post Author
