曾出演電影《戀空》、《我的機械人女友》、電視劇《交響情人夢》、《ROOKIES》等人氣作品嘅日本男演員小出惠介（33歲）因被一本聽日（6月9日）發售嘅八卦雜誌《FRIDAY》揭發與未成年女高中生飲酒及持有「不恰當」關係，今日佢嘅事務所已經宣佈將會無限期停止佢嘅藝能活動。
雖然經紀公司未解釋小出同該女高中生係咩關係，但日媒《報知體育》就以「小出惠介與未成年少女發生淫亂行為 暫停演藝活動」為標題，明示兩人關係並不單純。日本新聞就報導小出5月時於大阪拍攝NHK劇集之後，將一名17歲女高中生帶到酒吧灌酒後強行要求發生肉體關係。根據該名女高中生指，雖然佢有反抗過，不過最終都係發生左關係。
根據事務所發表聲明指，該雜誌報導小出承認與未成年少女飲酒交往一事，因此覺得事態嚴重，故決定無限期停止佢嘅活動，包括進行得如火如荼嘅拍攝工作，並將會向每個拍攝單位商討協議。
小出原本會7月出演日本電視台嘅日劇，電視台亦都發表咗將會換人取代。而後日開始播出佢主演嘅NHK劇集《來自神的一句話》，今日下午1點NHK嘅官方網頁入面已經搵唔到該劇嘅連結。
以下簡單翻譯了小出惠介嘅道歉聲明：
首先，今次因為我輕率嘅舉動，麻煩到同我工作有關係嘅各位人士，令到大家擔心我，在此衷心向各位道歉。
最重要嘅係，站在對方（女高中生）嘅立場嚟講，我知道無論我幾咁心存歉意，都彌補唔到呢件事。真的非常對不起。
另外，一直都最近都同我工作有關係，至今我出演過嘅作品入面有提攜過我嘅各位STAFF，一直支持我嘅粉絲，我實在係太對唔住咁多位。
作為一個出嚟社會工作嘅成年人，又係一個幕前工作嘅人，我對我無自覺嘅表現、縱容自己導致引起呢個後果，我實在冇辯解嘅餘地。
今後，我會真誠地接納一切批評及處分，因為係我咎由自取，我應該負上責任。
再一次，今次害大家擔心我，麻煩到各界人士，本人實在感到非常抱歉及遺憾。
小出惠介
About Post Author
