K房大變身!JOYSOUND新推「ROOM K」服務

K房大變身!JOYSOUND新推「ROOM K」服務

卡拉OK係日本人發明,日本人都引以為傲,日本真係通街都係K房,有時短短幾百米有成三間連鎖卡拉OK舖。但事實上唱K雖然未至於式微,但生意額都不斷下跌。
 

要挽救生意,係要搞搞新意思。其中一間連鎖卡拉OK店 JOYSOUND早幾年已經推出一人K房,地方細細開到幾十間K房,啱晒鍾意唱歌又唔敢喺人前唱歌嘅朋友們,
K房大變身!JOYSOUND新推「ROOM K」服務

 

而JOYSOUND今年2月又有新搞作,推出「ROOM K」服務。ROOM K即係喺日頭將K房改變用途,變做會議室。因為K房有梳化坐,有插座,有免費WIFI,有電腦,仲有野飲,部份K房仲有DVD同Blu-ray PLAYER,啱晒一眾地產、保險、股票經紀,又或者無OFFICE嘅自僱人士見客。而且日頭無乜人,閂埋房門私隱度高,加上K房已經有基本隔音,傾機密野都唔錯。
K房大變身!JOYSOUND新推「ROOM K」服務

 

「ROOM K」服務只限平日,早上11點至下午6點,最少2人,最多13人。每次30分鐘起跳,費用就間間舖都唔同,但最低可以1人30分鐘只需96円(未含稅),好過喺CAFE叫野飲。

 

暫時只有東京都內30間JOYSOUND旗下K房有提供「ROOM K」服務,包括品川、銀座、涉谷、池袋等地。
想預約要點做:
Step 1:去「ROOM K」網頁註冊做會員
Step 2:根據日期、時間、人數、設備預約適合嘅空房,最長可以預約3個月後
Step 3:當日去到舖頭同店員講預約咗「ROOM K」

Step 4:退房時俾錢