35歲嘅人氣天團嵐嘅成員櫻井翔同朝日電視台嘅女主播小川彩佳（32歲）嘅熱戀報道喺25日傳出後引來極大迴響。櫻井翔於日本電視台主持晚上11時嘅新聞節目「NEWS ZERO」，而女方亦喺同時段主持朝日電視台嘅新聞節目「報道Station」，實屬100％嘅對家。偏偏呢兩位分別主持兩個電視台嘅金牌新聞節目嘅主播（兼明星）竟然傳出熱戀消息，令唔少日本觀眾們大感意外。
日媒《週刊POST》報道兩位甜蜜約會，連續11天嘅親密互動被拍到正一正，更加影到櫻井翔直奔女方香閨。報道更指出兩位非常門當戶對：櫻井翔父親為前總務省事務次官，而佢亦係慶應義塾大學畢業生，係尊尼斯嘅高學歷偶像代表；而女方亦畢業自名門青山學院大學，父親亦為慶應義塾大學嘅醫學部教授兼大學病院部長。
▲今次緋聞女主角小川彩佳，為朝日電視台嘅王牌女主播
雖然尊尼斯事務所及朝日電視台嘅官方回應都係「雙方僅為好朋友」，但日媒就傳出朝日電視台方面有人透露兩位係認真交往中。自去年年底開始，節目完結後小川就一支箭咁返屋企，兩人嘅戀情疑似個陣開始。有關人士更加爆出該新聞節目嘅同事都非常驚訝但覺得兩位非常速配，更加感受到兩位即使事業繁忙但都非常努力擠出時間約會見面，非常難得。
▲櫻井翔被拍到於朝日電視台門口等女方放工
另一方面，有相關人士透露兩位已經見晒家長，而兩位年齡上亦都踏入適婚年齡，相信好事近喎。難得今次J家唔係一口咬定雙方唔係拍拖，睇嚟可能真係有啲機。日本方面暫時貌似粉絲雖然驚訝但都幾歡迎呢對情侶，紛紛送上祝福。唔知香港粉絲又點睇呢？
資料來源：スポニチアネックス
About Post Author
