※呢篇文本來尋晚本來已經見街，奈何社長實在太強大，寫吓多一個，寫吓多一個……
日本最受歡迎YouTuber「Hajime社長」一個劈腿劈4個？ 連木下佑香都有份！日本嘅YouTuber「Hajime社長」成五百幾萬人訂閱，相信就算係香港嘅朋友都冇咩人唔識啩。
不過最近對於Hajime社長嘅粉絲嚟講可以話係坐過山車一樣！ 因為佢接連被爆出原來佢一直都有「劈腿」！ 而家即刻同大家高速回顧一下到底發生咩事(已經儘量簡單啦)！
話說成件事一開始完全只不過係一個非常常見嘅錯誤，就係唔記得幫手機上面電話簿啲名「打格仔」。(而家打咗啦，不過下面有補圖XD)
結果就俾人捉到上面有個名叫「まなみ」。於是大家就開始講佢係咪社長女友。
最擅長炒「自己花生」嘅社長就梗係未驚過，即刻出多套「記者會」片，同「まなみ」劃清界線，甚至連對話都冇試過，只係操作錯誤先會令帳號出現於圖中位置。
不過另一位YouTuberみずにゃん就拍片指avex management Seventeen嘅專屬江野澤愛美係「まなみ」，不過江野澤愛美本人好快就否認咗。
之後YouTuberみずにゃん再嚟一條片，大爆Hajime社長之前一腳踏兩船！ 今次佢攞出嚟嘅唔再係圖或者城市傳聞，而係搵嚟一個真人！ 佢就係Hajime社長前女友「れいな」！ れいな指出今年2月14日以『要拍片』為由拒絕咗同れいな約會，不過最後俾佢發現嗰晚有個模特兒喺社長家過夜。而當Hajime社長被質問時竟回答「我們只係一齊孖鋪，甚麼都冇做過。」後來兩人當然分手收場。
從れいな同Hajime社長嘅LINE對話睇，過夜嘅人係叫あおい，而みずにゃん指あおい係江﨑葵（女模）
江﨑葵（女模）發聲明指同社長只係朋友，但雙方已因此事關係決裂。
不過最勁嘅係當れいな嘅訪問仲去到一半，另一個知名大胃王美女木下佑香竟然PHONE IN自爆曾經同Hajime社長交往過，哭訴兩人去年12月已分手，但對於對方一腳踏…已經多到唔記得咗幾多條船一事都係而家先知。仲喊住表示「完全不能相信，感到好痛苦」同「不想再糾纏落去」。
之後Hajime社長就拍咗套好正經嘅道歉片，並於片中承認一腳踏N船，其中包括木下佑香。不過佢再次強調2月14日過夜嗰晚真係冇事發生，對方只係普通朋友，只係借宿一宵。
道歉片出街後，みずにゃん再爆多一位曾經同社長交往嘅人「なな」。而家已經有4個人疑似/證實曾同社長交往。
「なな」出示未曾於網上出現過，Hajime社長嘅相作為證據
來源：http://matomame.jp
不過事情去到今日急轉直下。今朝當みずにゃんTwitCasting直播時，被一通電話迫令直播一度中止。而當直播之後，佢表示社長一事佢要退出追查，原因係受到經理人公司施壓(網友估計為「UUUM」)，之後みずにゃん嘅TWITTER ACC就被凍結咗。
日本網友整理現時狀況
About Post Author
