尋日上演嘅里約奧運女子乒乓團體賽銅牌賽，日本隊對上新加坡呢個強勁嘅對手，先失一局後連贏三局反勝，以3：1成為銅牌得主。日本選手福原愛、石川佳純同伊藤美誠賽後仲向公眾席上嘅支持者道謝、場面感人，而福原愛嘅喊包樣又出現啦！
▲（左起：福原愛、石川佳純、伊藤美誠）
第一點單打比賽，高人氣女乒乓球手福原愛面對世界排名第13嘅新加坡選手以2比3落敗。第二點單打出場嘅隊友石川佳純就扳回一城。第三局雙打，今年隊中最年長，27歲嘅福原愛右大腿貼上肌能系貼布重新登場，並同隊友伊藤美誠以3比1嘅成績擊敗對手反超前，日本隊重新掌控球賽節奏，而第四點單打伊藤最後成功取得勝利。
▲伊藤勝出瞬間福原立即熱淚盈眶，事後接受訪問嘅佢坦白承認今次嘅奧運會真係好痛苦。事源今屆大會福原愛喺個人賽到與獎牌擦身而過，而團體賽亦都以微差落敗只能爭第三。「我非常感謝大家同我嘅隊友。我一路都拖累大家，前日輸波真係令我諗返起都覺得好後悔同遺憾。我一直都拼死想贏波。今屆奧運會有打得好好嘅比賽，但同時都有令我感到後悔嘅比賽。真係一屆好痛苦嘅奧運會。」
2014年經歷左腳尾指因疲勞而骨折，令福原愛有三個月嘅空窗期，不過呢段時期同其他選手嘅交流亦都令佢成長咗。喺物理治療中心入面佢同著名球員內田篤人一齊付出汗水互相鼓勵，亦接觸到唔同嘅運動選手。奧運會前佢同隊友每日瘋狂練習，攰到離開體育館嘅瞬間就會暈低嘅地步。好彩今次佢哋嘅努力並冇白費。
▲銅牌賽為日本隊拎到致勝兩分嘅伊藤選手（圖中）今年得15歲，打破中國選手郭躍16歲嘅紀錄成為史上最年輕奧運乒乓獎牌得主！佢好感激兩位隊友，仲話好開心係三個人一齊努力得到呢個獎牌，絕對唔係自己一個人嘅貢獻！
▲雖然福原愛未公告會唔會參加下屆東京奧運，不過更多人關心嘅係佢同台灣男朋友、同樣係乒乓球手嘅江宏傑嘅姊弟戀幾時開花結果！有消息指熱戀咗1年多嘅兩人奧運後就會結婚，但被傳媒追問時江宏傑就話總之有進一步消息先會同大家講，叫大家唔好心急～
▲點都好啦，恭喜晒今次日本乒乓女團贏得銅牌，再次將乒乓比賽嘅熱血同感動帶畀各位觀眾！
About Post Author
