利申：小編係絕對唔相信呢單消息架！不過有日本傳媒報導就循例講下：話說日本八卦雜誌《週刊實話》聲稱得到獨佔消息，指「大家的女神」長澤雅美有機會於後日（6月3日）30歲生日時公佈婚訊！
根據日本藝能記者表示：「長澤終於要踏入30歲啦。而好多藝能界背後嘅人物都傳出佢將會同RADWIMPS主唱野田洋次郎結婚嘅消息！」咁點解佢哋會咁講呢？原來因為長澤同松田龍平，長谷川博己，東出昌大等大卡士演出嘅電影《散歩する侵略者》將會於康城電影節上映，而有相關人士竟然問「長澤小姐近期私生活將會有啲改變，唔會影響到佢去康城參加影展㗎可？」然後呢個消息就傳出咗，而大家都推測件事係指佢將會於6月同野田洋次郎結婚！
唔單止係咁，啲娛樂記者仲話之前長澤幫UnderAmour拍廣告嘅Slogan都係「I WILL」，同結婚有關，而且佢最近無論係同岡田准一拍嘅電影《追憶》，定係最近呢套《散歩する侵略者》都係飾演人妻，一定係暗示咗佢呢期將會成為人妻啦！（救命，咁都得？）
另一方面，因為野田之前同吉高由里子分咗手，所以其實佢一直都想搵個可以共渡餘下半生嘅人，所以佢一路都有結婚嘅打算。今年元旦同前田敦子傳出緋聞嘅佢極度爽快喺Twitter都否認咗，但同長澤嘅緋聞就冇咁做。加上長澤雅美又有F級身材又有超長美腿，相信野田已經完全「墮入情網」。而長澤本來就係RADWIMPS粉絲，因此兩人閃婚可能性極高！
早前二人食越南菜時被記者發現。
拿，以上報導就只係翻譯日媒報導，小編就覺得好似啲人傳井上真央會同松本潤結婚咁，傳咗咁多年咪都係咁
～所以大家睇下好啦，一於先祝福長澤雅美後日生日快樂先，然後再睇下當時人們對呢篇報道有咩睇法啦！
BTW，RADWIMPS就嚟嚟香港開演唱會啦！大家買咗飛未？
資料來源：NEWS LIVEDOOR
About Post Author
