日本真係好多限定野，仲次次都唔係交行貨，唔知由自可，知道咗有呢樣野又唔去試個心硬係會覺得囉囉攣！
好似呢期KIRIN推出嘅「47都道府県の一番搾り」，單單係47個唔同包裝嘅啤酒罐已經有令人有儲齊一套嘅衝動，更何況佢地唔止玩包裝，連味道都話會因為使用唔同地區嘅材料製作，所以會有少少唔同，飲開啤酒的話應該一試就試得出當中微妙嘅分別。
每罐啤酒罐罐身都會有個地圖仔顯示返啤酒生產所在地，大阪版嗰個就係金色嘅，係咪好感受到大阪嘅熱情同奔放呢！
講到沖繩一定係陽光與海灘！沖繩版味道好清爽，想像吓喺沙灘玩完水上嚟飲返罐，暑氣由內而外一瞬間消除，爽！
北海道一年四季嘅變化各有特色，是令人一去再去嘅一大原因，呢個北海道版就以北海道嘅夏天作為地圖設計概念，以北海道米同當地名水作為原料，製作出如甘露般嘅啤酒。
呢個「47都道府県の一番搾り」其實上年都搞過，販賣目標SET喺260萬罐都可以賣得哂，見到咁好反應，今年當然加碼，由260萬罐調整到去320萬罐，產量足足多咗2成，即係話照道理今年應該比上年冇咁難買到，咁好嘅機會，冇理由喺日本都唔買返罐試吓！
啤酒罐一共有「○○づくり 一番搾り」同「○○に乾杯 一番搾り」兩種設計，如果想儲齊哂一套47罐，最方便就係一套咁買(當然咁就會冇咗集郵嘅樂趣……)，佢地有分「甲信越・東海・北部九州SET」、「關東SET」、「關西・南部九州SET」、「北海道・東北・北陸SET」同「中國・四國SET」，有興趣買就要留意吓以下發售日期啦～
4月25日： 甲信越・東海・北部九州SET
6 月： 關東SET、 關西・南部九州SET
8月： 北海道・東北・北陸SET、 中國・四國SET
至於單罐裝嘅發售日期，大家可以參考官網。
如果儲得齊成套，放哂出嚟都咪話唔型！
官網仲有大量Arashi嘅KIRIN廣告，fans實會睇到由個心笑出嚟！
About Post Author
