香港鐵粉系列! 「秋葉原博客女王」中川翔子

香港鐵粉系列! 「秋葉原博客女王」中川翔子

 

[專欄:日本在香港]

   唔少日本人對香港唔多唔少都會有啲情意結,而其中要提起鍾意香港嘅日本人,就真係要提一提「秋葉原博客女王」中川翔子!橫跨歌手、聲優、作家、漫畫家等等唔同領域嘅中川翔子,早在2006年就已經以歌手身份開始活動,其中《天元突破》嘅主題曲《空色デイズ》更加為佢帶來極大人氣,直到依家都仲係經典動漫歌曲。中川翔子係御宅族,熱愛動漫,佢寫嘅blog仲有10億嘅點擊數。

其實中川翔子仲有一個特別嘅身份──就係「香港觀光親善大使」!到底點解一個日本人會成為香港觀光嘅親善大使呢?

香港鐵粉系列! 「秋葉原博客女王」中川翔子
出處:中川翔子官網NEWS (http://www.shokotan.jp/news/?id=44)

多次舉辦香港個人演唱會

中川第一次喺2012年喺香港舉辦個人亞洲巡回演唱會,仲有廣東話嘅標題叫做「大家好!我係中川翔子亞洲巡迴演唱會HONG KONG」。香港歌迷反應熱烈,佢喺演唱會當中話過「喺香港開live一直都係個人目標」,更多次表示「I love Hong Kong」,仲曾經大耍偶像李小龍嘅雙截棍。之後2013年同2014都有以香港作為亞洲巡迴演唱會嘅其中一站。喺唔同嘅演唱會入面,仲有唱過《空色デイズ》嘅普通話版、廣東話版同香港電影主題曲《英雄故事》之類添。

熱愛廣東話

中川翔子喺日本係一個出名嘅香港迷,自細已經嚟過唔少次香港,自然一直都有努力學習廣東話,因此都幾常見佢會以廣東話同香港粉絲交流啊!例如佢演唱會會用廣東話同粉絲講:「大家好嗎 我係中川翔子」、「我地又見面啦!我好掛住你地」,就可以見到佢廣東話嘅流暢程度。佢以前仲試過喺香港餐廳用廣東話叫侍應比白飯佢,結果待應又真係畀咗白飯佢喎。睇嚟佢用廣東話交流真係無咩問題喔。

喜愛香港野食

中川翔子不嬲都好鐘意食香港嘅野,2016年果時去香港食左唔少香港野食,仲特別鐘意香港嘅蒜炒小菜添!佢叫左蒜炒海蝦、蒜炒元貝等等,仲話超好食,好食到停唔到!其他例如飲茶、街頭麵檔、許留山嘅芒果布甸同西瓜汁佢都讚不絕口架! 早前佢嚟香港拍攝節目時,一直都有更新在港嘅最新情況。當中當然少不了「大刷」一餐啦! 

推介香港好去處

嚟過香港30次以上嘅中川係blog同fans推薦過好多香港嘅好去處,話希望更多人鐘意上香港。中川推薦粉絲去信和中心買御宅族週邊、去香港迪士尼享受飲茶,仲話香港迪士尼排隊快過日本好多。除此之外就有黃大仙占卜、渡海小輪、維港夜景,仲推介過有忌廉哥嘅書店架。可以見到中川已經去過香港好多地方,名乎其實係「香港通」。

香港目擊UFO?

中川係今年嘅11月26號嚟左香港拍左一日外景,竟然係尖沙咀渡輪碼頭拍到不知名飛行物體。佢係自己嘅blog上載左疑似UFO飛行嘅片段。

不過由於同期海港城嗰邊有活動放咗幾架無人機上天,所以佢哋應該都幾有機會係中川見到嘅UFO啦XD