[香港在日本] 「九龍風水傳」20周年 重現九龍城寨昔日樣貌

[香港在日本] 「九龍風水傳」20周年 重現九龍城寨昔日樣貌

[專欄:香港在日本]

二十年前,Sony Music以九龍城寨作為故事舞台,開發咗對應Play Station嘅遊戲「クーロンズゲート」(KOWLOON’S GATE -九龍風水傳-)。於『九龍風水傳』嘅世界當中,1997年5月,喺香港「回歸」前夕由於陰界嘅九龍城寨突然於陽界出現,身為超級風水師嘅主角被香港最高風水會議傳召,潛入調查原因及重整混亂嘅陰界風水氣脈,而風水氣脈係由四神獸東─青龍、西─白虎、南─朱雀、北─玄武所掌管……(再講就劇透,剩低請自行遊玩享受XD)

二十年後,當年一齊開發嘅同伴再次聚首一堂,以粉絲嘅捐助作為資金將幾乎成為歷史嘅「クーロンズゲート」世界重新製作,配合VR技術重新將九龍城寨帶入日本!

[香港在日本] 「九龍風水傳」20周年 重現九龍城寨昔日樣貌
截自官方網頁。

睇返今次「クーロンズゲートVR suzaku」之前公開過嘅影片,其中一條影片就係重現返當年其中一條喺「クーロンズゲート」出現過嘅街道:「龍城路」。玩家到時可以體驗喺九龍城寨入面散步嘅感覺。比起遊戲,開發人員更希望以VR技術將呢條令人可以自由咁喺回憶中嘅街道入面行逛,同唔同嘅角色重新會面。

遊戲裡面有好多城寨嘅元素係入面。標誌性嘅後巷,仲有唐樓、戲院等都有出現到喺畫面之上。單係opening睇到嘅「陰界」街道就有唔少香港特色嘅廣吿牌:有寫住「成人用品」霓虹招牌,對應返當時黃、賭、毒俱齊嘅情況;亦有唔同醫療診所嘅招牌,因為以前城寨冇被規管,好多無牌醫生都會喺嗰度開舖。

[香港在日本] 「九龍風水傳」20周年 重現九龍城寨昔日樣貌
截自「クーロンズゲート」Opening。

VR版都忠實呈現返城寨殘舊、狹窄而詭秘嘅感覺。佢更新咗當時嘅畫面,令到佢更加精美之外玩家都可以對城寨有深一層嘅認識。街道一啲有用到中文嘅地方都幾仔細,好似官網其中一張圖係一張九巴職員證嘅遺失聲明,淨係睇佢唔見咗啲咩已經覺得好香港呀。

[香港在日本] 「九龍風水傳」20周年 重現九龍城寨昔日樣貌
[香港在日本] 「九龍風水傳」20周年 重現九龍城寨昔日樣貌
上:1997年版本嘅「成人用品」霓虹燈牌。截自「クーロンズゲート」opening。
下:2017年VR版本嘅「成人用品」霓虹燈牌。截自官方YouTube。

[香港在日本] 「九龍風水傳」20周年 重現九龍城寨昔日樣貌
九巴職員證嘅遺失聲明。截自官方網頁。

只可惜城寨對於部份香港人嚟講或者會係其中一個集體回憶,但係新一代已經好少再接觸到相關嘅知識。講起「九龍城寨」,可能佢地腦海入面淨係會浮現出一個普通嘅公園,而唔係當年嘅「三不管」地帶。不過意外地喺日本,仍然有唔少媒體用自己嘅方式將九龍城寨呢個神秘嘅地方流傳落去。

回溯返去城寨清拆嗰陣,最後留低記錄嘅係竟然係日本人。當年一班對城寨好有興趣嘅日本人,以歷史學家兼文化人類學者可兒弘明為首嘅「九龍城探險隊」,喺所有居民被逼遷後向政府申請將佢嘅最後一面留低,配上插畫家寺澤一美嘅剖面圖等輯成《大圖解九龍城》將城寨活現喺讀者眼前。除咗出版唔同嘅相關書籍,近排當地就將相片集《九龍城砦》數碼化,仲為咗紀念呢件事而舉辦展覽,等更多人認識城寨。

[香港在日本] 「九龍風水傳」20周年 重現九龍城寨昔日樣貌
《大圖解九龍城》中寺澤一美筆下嘅城寨剖面圖。截自Amazon。

[香港在日本] 「九龍風水傳」20周年 重現九龍城寨昔日樣貌
宮本隆司相片集《九龍城寨》展覽。截自ギャラリー北大路官方Twitter。

流行文化當中都不乏城寨嘅存在。2012年,人氣漫畫《金田一少年之事件簿》就喺其中一個20周年紀念故事《香港九龍財寶殺人事件》採用城寨作為舞台,翌年拍成真人電視劇以日本電視台開台60周年紀念特別節目播出,其中仲去咗城寨嘅遺址拍攝。縰然城寨已經清拆咗十幾廿年,但佢口火日本嘅影響力仍然係不容小覷。

[香港在日本] 「九龍風水傳」20周年 重現九龍城寨昔日樣貌
《金田一少年之事件簿 – 香港九龍財寶殺人事件》 劇照。截自劇集官方網頁。

明明同自己嘅國家毫無關係,到底對佢地嚟講城寨有啲咩咁正呢?

知日部屋嘅屋主、香港中文大學日本研究學系系主任吳偉明教授曾經研究過城寨對日本流行文化嘅影響。佢喺《日本流行文化與香港》入面就分析道城寨能夠引起日本人嘅共鳴,所以先會令佢地將佢融入喺流行文化之中。另一方面,佢都代表咗當地對香港嘅印象:混亂但充滿生氣,一個中西文化夾雜嘅神秘都市。雖然呢個未必代表到而家香港嘅狀況,但呢種印象可以幫我地記住香港嘅「曾經」,令歷史不至於會被遺忘。

不過佢地嘅睇法都有「與時並進」㗎。喺探索次世代「クーロンズゲート」嘅企劃「九龍VR」入面就喺殘舊嘅城寨之間出現咗大型電子屏幕,顯示香港高科技嘅一面。另外佢地都加入咗好多我地熟悉嘅招牌。好似大家樂、星展銀行、美心、莎莎等,都係已經融入咗喺香港人生活之中嘅商店。雖然個場景係有啲微妙,不過兩種感覺crossover起嚟都係相當特別嘅。

[香港在日本] 「九龍風水傳」20周年 重現九龍城寨昔日樣貌
截自官方YouTube。

雖然話九龍城寨已經成為歷史,但都係值得我地銘記於心嘅歷史。佢象徵住香港嘅獨特文化,亦都象徵住外地對香港其中一個形象,同時仲係香港同日本之間一個意外嘅聯繫。今次「クーロンズゲートVRsuzaku」除咗係紀念遊戲20周年之外,或者都係對我哋嘅提示:城寨文化並未有成為過去,而係十分值得我哋去了解嘅一段故事。

「クーロンズゲートVRsuzaku」
公開日期:2017年10月26日(星期四)
對應機種:PlayStation 4(PlayStationVR專用)
價錢:¥3980(未含稅)
官方網頁:http://jetman.co.jp/kowloons-gate-vr-suzaku/

參考資料
吳偉明(2015)。《日本流行文化與香港》。香港:商務印書館(香港)有限公司。