日本平民必去綜合超市 ItoYokado服裝 兒童用品 文具 逛街攻略

日本老字號綜合超市ItoYokado創立於1920年，同日本7-Eleven、赤ちゃん本舗、LOFT等等店舖一樣，都係日本零售巨頭SEVEN & i Group嘅一員。話到明係綜合超市，ItoYokado有齊超級市場、衫褲鞋襪、家庭用品、生活雜貨等等賣場，衣食住行樣樣都包晒！今集就一齊嚟睇吓ItoYokado有咩必買服裝、兒童用品同文具啦！

——————–

必買服裝

1.時尚 上班服裝類

享受生活、留意時尚潮流嘅女士們要留意啦！GALLORIA就係ItoYokado專為你地而設嘅自家服裝品牌。GALLORIA苧麻亞麻質襯衫（4212日圓 連稅）帶有柔和嘅光澤，麻質布料方便打理，可以放入洗衣機洗，方便日常穿搭。另外GALLORIA印花緞質背心（4212日圓 連稅）亦都非常百搭，無論返工定放假都一樣襯到～ItoYokado唔止有女裝，仲有男裝㗎！向男士們大力推薦「超・形態安定」系列「超級恤衫」，明明係100％純綿，但係喺屋企用洗衣機洗完之後，件衫都唔會變到成條梅菜咁，唔洗燙都直筆甩，洗50次仍然好似新嘅一樣，好犀利啊～

——————–

2.內衣 家居服類

男女裝SEVEN PREMIUM LIFESTYLE BODY COOLER內衣系列嘅質地清涼透薄滑劣劣，秒速吸汗，唔怕畀啲汗搞到個背瘠黐立立，仲抗菌防臭㖭！有啲內衣設計到可以當家居服咁著，例如小編就特別鐘意SEVEN PREMIUM LIFESTYLE BODY COOLER女裝背心條紋吸汗內衣（連胸墊）（1609日圓 連稅）啦～除咗夏天有「SEVEN PREMIUM LIFESTYLE BODY COOLER」系列之外，冬天仲有「SEVEN PREMIUM LIFESTYLE BODY HEATER」系列，一年四季嘅內衣都可以喺到買齊晒！

——————–

手袋 高跟鞋類

SEVEN PREMIUM嘅KiREi系列係ItoYokado嘅原創品牌，日本製造嘅高跟鞋質地講究、設計時尚，著起嚟突顯到女性腳踝之美。兩用皮製手提包最啱OL們返工同放假時使用，手提包內都算有幾多間隔，方便收納。其實KiREi系列除咗手袋、高跟鞋好睇又實用之外，仲有上衣、褲、外套等等服裝系列，一樣好吸引㗎～

——————–

服飾雜貨

除咗服裝、手袋等等之外，ItoYokado又有好多服飾雜貨，例如披肩、頸巾、帽等等，無論想要色彩繽紛啲嘅、定係素色淡雅啲嘅都有，送禮時就唔怕冇諗頭啦！依到仲有好多唔同款嘅長遮同縮骨遮，睇到人目不暇給，搞到小編心思思想換把靚靚遮（笑）
——————–

必買童裝及兒童用品

唔止係大人，ItoYokado連小朋友嘅服裝同用品都有賣㗎！童裝、童裝鞋等等小朋友服裝碼數齊全，唔同年紀嘅小朋友都可以搵到適合自己嘅尺寸～用品方面有書包、袋仔、文具等等，樣樣都咁得意，小朋友一定睇到樂而忘返～

——————–

文具

ItoYokado嘅文具專區入面，原子筆、鉛芯筆等包羅萬有，各款熒光筆、墨水筆等等色彩繽紛。日本文具出名好睇又實用，有啲筆袋可以座檯，有啲墨水筆就擦得甩，不妨買多少少，唔送畀人自己用都正吖嘛～

一連5集ItoYokado嘅介紹係時候要告一段落，有機會再同大家介紹吓ItoYokado嘅其他好嘢啦～

*上述商品的企劃、包裝、價格有可能因為不同時期而有所變更，請於店舖查詢商品及價格資料。部分店舖沒有販賣某些商品，敬請留意。

——————–

快啲click入以下網址同facebook專頁了解更多店鋪最新資訊啦！

ItoYokado 官方網站（繁體中文）
ItoYokado 官方facebook（繁體中文）
ItoYokado曳舟店
GRAND TREE武蔵小杉店