【初心者「觀光懶人包」!】 京都嵐山應該點玩?

【初心者「觀光懶人包」!】 京都嵐山應該點玩?

應該有唔少人同小編一樣已經去過關西N次(冇計,廉航太平……),但有啲地方係就算去幾多次都會想再去,例如嵐山!去嵐山有好幾種方法,唔同方法睇到嘅景都好唔一樣,最慘就係唔同季節會有唔同活動,即使目標唔係竹林,都有大把野影大把野行!
 
不過為咗仲有好多未去過嵐山嘅朋友仔,今之就同大家簡單介紹吓前往嘅交通方法、有咩季節性重點要睇,同有咩特色店舖一定要行啦!
 
推薦前往方法:
 
1. 嵯峨野トロッコ列車
 
【初心者「觀光懶人包」!】 京都嵐山應該點玩?
 
去嵐山有好多種方法,如果係第一次就當然要坐吓嵐山觀光小火車「嵯峨野トロッコ列車」(¥620/人)!要坐呢個小火車,大家首先要坐JR山陰本線去到馬崛站,然後跟住路牌指示行10分鐘倒去「トロッコ亀岡駅」就搭到小火車㗎啦!站內嘅指示都幾清晰,所以唔需要太擔心搵唔到小火車個站。
 
【初心者「觀光懶人包」!】 京都嵐山應該點玩?
沿路都會見到前往「トロッコ亀岡駅」嘅指示,跟住指示慢慢行一定去到。
 
【初心者「觀光懶人包」!】 京都嵐山應該點玩?
成條路都好大自然feel,小編去嗰日仲撞正有人喺度騎緊馬添!
 
【初心者「觀光懶人包」!】 京都嵐山應該點玩?
由於出發前做過大量research,好多人都推薦坐第5卡半露天車卡,話睇景最正,咁我地當然亦同售票員講我地想坐第5卡啦。景係好靚,但因為係12月,半露天車箱大風兼凍到冇朋友,仲不斷聽到經過車卡嘅日本人話我地好似好可憐,所以冬天的話都係乖乖地坐返有暖氣嘅車卡好啦!
 
【初心者「觀光懶人包」!】 京都嵐山應該點玩?
站內有時間表寫明小火車幾時會到,差唔多時間就可以出月台等㗎啦!至於落車嘅車站,由於竹林喺正「トロッコ嵯峨駅」同「「トロッコ嵐山駅」兩個站中間,所以隨意二選一就得。
 
嵯峨野トロッコ列車
 
2. 嵐電
 
【初心者「觀光懶人包」!】 京都嵐山應該點玩?
 
如果已經坐過小火車,咁再去嵐山的話可以揀搭嵐電,比起小火車呢種方法雖然係冇咁多景睇,但勝在超級方便,一出嵐山站就會發現自己已經企正喺勁熱鬧嘅商店街中央,慳到嘅時間就可以用埋嚟行多幾間小店啦!
 
【初心者「觀光懶人包」!】 京都嵐山應該點玩?
搭嵐電可以喺地下鐵東西線嘅「太秦天神川」轉車,行去「嵐電天神川」站只係5分鐘左右路程,跟住指示行瞇埋眼都行到,超易行。
 
【初心者「觀光懶人包」!】 京都嵐山應該點玩?
留意返去嵐山方向嘅嵐電係落車先畀錢,大人¥210一位,車程大概15分鐘左右。
 
【初心者「觀光懶人包」!】 京都嵐山應該點玩?
一出車站基本上已經可以啟動食野同買野嘅戰鬥Mode!
 
季節性必睇重點:
 
1. 嵐山花燈路
 
【初心者「觀光懶人包」!】 京都嵐山應該點玩?
 
好多人都鍾意12月嚟嵐山,唔係貪呢度夠凍,而係12月限定嘅花燈路真係靚到痴線,由渡月橋沿路去到竹林深處都有無數花燈點綴,度度都係影相位,所以有好多日本人天都未黑就已經開始出發去嵐山。
 
個人覺得最靚嘅影相位係同商店街相隔一條渡月橋嘅另一邊,每年都會有唔同嘅花燈主題,記得幾年前去嗰陣,大家可以將寫咗願望嘅memo紙貼喺花燈上面,超浪漫!
 
【初心者「觀光懶人包」!】 京都嵐山應該點玩?
未入黑已經有大量來自五湖四海嘅人經渡月橋進入嵐山範圍,雖然真係好多人,不過好彩個個都好守秩序,唔會喪推。
 
【初心者「觀光懶人包」!】 京都嵐山應該點玩?
如果唔趕住去行街,臨入黑可以坐喺河邊靜靜欣賞渡月橋日與夜嘅轉變,不過記得做好保溫措施,係好凍,但一定唔會後悔。
 
【初心者「觀光懶人包」!】 京都嵐山應該點玩?
除咗幾個大型花燈,地上亦展示咗大量手繪花燈,加埋兩位和服美女,成件事實在太日本啦!
 
【初心者「觀光懶人包」!】 京都嵐山應該點玩?
可能真係嚟過嵐山太多次,個人認為呢個竹林嘅點燈反而最冇睇頭(唔好打我),不過如果未嚟過就緊係要嚟啦,呢度日頭同夜晚都好大分別㗎~
 
【初心者「觀光懶人包」!】 京都嵐山應該點玩?
日間嘅竹林,係咪同夜晚嘅感覺好唔同呢!
 
2. 嵐山燈籠流
 
【初心者「觀光懶人包」!】 京都嵐山應該點玩?
 
每年8月中旬左右,喺渡月橋附近都會舉行放水燈儀式,日本人相信咁做可以將先人送去極樂世界。如果想目睹水燈燈火靜靜地沿桂川流走,記得夜晚7點左右就要返到去渡月橋附近,如果想舒舒服服坐喺度睇就更加要早啲去霸位,數十個甚至上百個水燈喺水中漂流畫面超靚!
 
【初心者「觀光懶人包」!】 京都嵐山應該點玩?
成個景同氣氛都極之優美!
 

想簡單醫肚食乜好?
 
1. 渡月橋屋台
 
【初心者「觀光懶人包」!】 京都嵐山應該點玩?
 
想食野但又唔想浪費時間坐低慢慢食,咁就一定要去渡月橋隔離嘅屋台掃街!呢度檔仔唔多,大概只有4至5檔,大部份以小食為主,但企喺街邊食勁有風味,如果每檔都諗住試少少,咁你一定唔使怕唔飽啦!天都未黑哂,啲檔仔已經陸續開舖,有烤魚、烤魷魚、串燒、章魚燒等唔同美食,鍾意食咩就盡情點啦!
 
【初心者「觀光懶人包」!】 京都嵐山應該點玩?
間間舖都密密燒冇停手,現場真係勁香,搞到樣樣都好想試,所以最好有多幾位密友一齊同行,你一啖我一啖就可以試哂所有野食啦!
 
【初心者「觀光懶人包」!】 京都嵐山應該點玩?
睇日劇成日都會見到呢種燒魚,呢度都有得食,唔係唔試啊嘛!留意返,條魚都幾多骨,小心慢慢食唔好哽親。
 
【初心者「觀光懶人包」!】 京都嵐山應該點玩?
燒魷魚嘅香味真係遠遠都聞到,一串串拮好哂,就算行住食都唔會太唔方便!唔好睇佢好似黑忟忟一定又乾又硬,錯!呢幾條魷魚鬚不知幾Juicy,個甜甜地嘅醬汁又做得好好,三兩啖就成支吞哂落肚嚕。
 
【初心者「觀光懶人包」!】 京都嵐山應該點玩?
去日本又點可以少咗章魚燒!呢個章魚燒唔係特別好味,不過入面有大大粒章魚交足貨,喺天寒地凍之下已經係一道絕品料理啦。
 
【初心者「觀光懶人包」!】 京都嵐山應該點玩?
生咗大食積嘅小編因為怕半夜三更會肚餓所以點埋個炸薯條打定底,喺屋台可以買到炸薯條真係覺得有少少神奇,更神奇嘅係佢真係即叫即炸,熱辣辣脆卜卜,唔係炸好咗hea喺度等人買。
 
必逛特色手信店舖
 
1. 井筒八ツ橋本舗
 
【初心者「觀光懶人包」!】 京都嵐山應該點玩?
 
買手信係去旅行嘅指定動作,要慳時間緊係喺同一間舖一次過掃貨啦!「井筒八ツ橋」喺京都有唔少分店,不過呢間嵐山店就有喺呢度先買到嘅嵐山限定款式,對親朋戚友交足貨之餘又唔會顯得過份敷衍,手信店首選!
 
【初心者「觀光懶人包」!】 京都嵐山應該點玩?
呢個咁可愛又充滿日本氣息嘅貓仔銀包都只係¥390,買嚟做手信或者自己用都好抵玩啊!
 
【初心者「觀光懶人包」!】 京都嵐山應該點玩?
京都必買嘅八ツ橋!呢一個一盒有齊肉桂、抹茶同士多啤梨味三種味道,唔使食死一隻味咁悶。
 
【初心者「觀光懶人包」!】 京都嵐山應該點玩?
就算平時唔用香水,都一定會覺得呢個一共有4隻味嘅花香香水膏超級香,淡淡嘅幽香係當地舞妓嘅愛用品。
 
2. 京雑貨 洛楽
 
【初心者「觀光懶人包」!】 京都嵐山應該點玩?
 
入到洛樂真係好似尋寶一樣,店內嘅所有精品都係由店員同店主精心挑選,無論你係男定女,老定少,入到嚟一定會忍唔住呢件睇吓嗰件又摸吓,覺得件件都好靚好得意好不可思議!精品手信呢度大把,係驚你買完唔捨得送畀人咋!
 
【初心者「觀光懶人包」!】 京都嵐山應該點玩?
呢個號稱世界最強嘅辣椒粉一定要買返去送班唔識日文嘅死黨,佢地見到又「京都」又「嵐山」同咁靚嘅包裝,又點會估到呢包就係傳說中會辣到舌尖麻痺,全身毛孔張開,噴煙都不特止仲會噴汗嘅「超激辛唐辛子」!食過一次包佢一世都記得你呢個好朋友!
 
【初心者「觀光懶人包」!】 京都嵐山應該點玩?
呢個魔法鹽有咩咁神奇?原來係撈咗乾蒜、洋蔥、黑椒、唐辛子,用嚟灑喺炸雞或薯條等等炸物上面會令到料理美味度即時提升,就算係喺自己喺屋企整炸雞,一用咗呢樽鹽,味道都唔會差得過出面餐廳!
 
【初心者「觀光懶人包」!】 京都嵐山應該點玩?
呢個有黑白黃三種顏色嘅美甲套裝實在太靚啦!
 
【初心者「觀光懶人包」!】 京都嵐山應該點玩?
要點先可以 贏錢?當然要先買副運財啤牌先啦!你睇呢副牌幾架勢堂,係張一萬円不特止,仲要金到發光,拎住佢想唔贏錢都難!
 
【初心者「觀光懶人包」!】 京都嵐山應該點玩?
日本大熱嘅杯緣子當然係必買手信之一啦,呢個杯緣子仲要拎住把寫住京都嘅扇,幾有特色!
 
【初心者「觀光懶人包」!】 京都嵐山應該點玩?
店內仲有好多其他得意野,就留返畀大家慢慢發掘啦~
 
除咗小編以上介紹嘅幾個點,嵐山其實仲有好多好多野行,如果想慢慢睇景慢慢行街,預留一整日一定走唔甩,而假如你想再悠閒啲,不妨喺嵐山住一晚,附近都有幾間靚嘅溫泉旅館,咁夜晚就可以浸吓溫泉,第二日再繼續血拼!