《Like Japan 放送室》:專訪 日本超人氣搖滾樂隊 RADWIMPS

《Like Japan 放送室》:專訪 日本超人氣搖滾樂隊 RADWIMPS

「君の前前前世から僕は君を探し始めたよ〜」相信唔使我特別介紹,大部分讀者都有睇過新海誠大熱電影《你的名字。》,同埋聽過呢首勁洗腦嘅主題曲「前前前世」,以及認識RADWIMPS呢隊band啦!今次呢隊由2001年結成至今,喺日本非常受歡迎嘅搖滾樂隊三年後再次嚟到香港開騷,一齊睇下佢哋嘅心境有咩變化啦!

上一次來香港已經係2014年嘅事,再次嚟到呢度,有冇咩唔同嘅感覺呢?

野田:上次我哋係中午就到香港,今次我們尋晚就到咗,於是去咗坐巴士睇夜景。真係覺得香港嘅夜景好靚呢,覺得好感動!

被問到有冇特別掛住香港啲乜嘢,想去做多次,佢哋有咁嘅回應~

野田:上次我哋去咗維港海旁行,一路行一路行,來回差唔多行咗一個鐘!不過真係好熱呢(笑)

不過今次佢哋好慘,一嚟到香港就打風,佢哋都話有啲擔心會唔會影響聽日嘅演唱會。不過作為香港人,經過咁多次經歷李氏力場嘅經驗,我就叫佢哋唔需要擔心。因為聽日返工前應該就會冇事,睇緊呢篇文嘅讀者記得聽日準時番工呀。

上年為新海誠嘅超人氣電影《你的名字。》擔任全套電影嘅音樂製作,電影於全球大熱,佢哋更加為主題曲「前前前世」製作咗英文版,唔知佢哋覺得寫日本歌同英文歌嘅分別係咩呢?

野田:完全唔一樣呢!平時寫日文歌會跟住日文原本嘅旋律同音調去創作,寫英文歌嘅時候都係。不過今次係我第一次將一首日本歌變成英文歌,係非常新鮮嘅經驗,都真係幾難嘅。因為英文歌詞字數比日文多好多,我一邊寫一邊加咗好多新嘅歌詞入去,大概用咗我兩個星期時間呢。

知道呢排野田洋次郎仲主演埋日劇《百萬日圓的女人們》,之前又拎過電影新人獎,唔知「音樂人」同「演員」之間,佢比較鍾意邊個角色呢?我問完之後佢偷望咗成員們一眼,仲笑住話係佢哋面前梗係唔可以答係演員。成員們就叫佢放心可以誠實作答。

野田:咁一定係音樂人呢。我想做一名音樂人。我覺得成為一名音樂人遠遠比較能夠喺呢個世界留下一啲東西。演員嘅話,如果有啲海外嘅合作機會,或者係一啲會令人出乎意料之外嘅合作呀、創作的話,我都會想演嘅。而家嘅我係咁諗。

問到成員們有冇支持野田睇佢啲日劇,佢哋好好笑咁話雖然有,不過就覺得有啲違和感。

桑原:我哋梗係有睇啦~

武田:仲覺得佢好犀利添!

野田:真係?真係咩?

武田:真係㗎。不過有時望住個電視覺得都幾神奇,明明係洋次郎,但睇睇下又變左唔係。

野田:係咪呀?我自己睇都覺得有啲怪呢!

桑原:不過真係佢嚟嘅。好犀利呢。

又為電影創作音樂,今年仲成功登上紅白嘅舞台,唔知佢哋嚟緊最想達成嘅目標係咩呢?

桑原:希望可以喺亞洲各地嘅大場館舉行大型巡迴演唱啦。因為始終有啲嘢我哋無法喺日本拎過嚟,例如音響、燈光等等。希望我哋可以將我哋心入面想要呈現嘅演出,如實地帶畀各地嘅fans就好啦。

武田:係呀。今次可以第二次嚟香港我哋真係好開心。為咗可以再有第三次、第四次,我哋一定會繼續努力加油嘅,請各位一定要多多支持我哋。

最後,因為有粉絲朋友希望我可以問下佢哋,之前因為患上局部肌張力不全症嘅一種神經性病症而進入無限期休養嘅鼓手山口智史嘅近況,而成員們都好樂意開腔。

武田:最近都有同佢聯絡。之前我哋喺日本開巡迴演唱會嘅時候佢都有嚟支持我哋。個陣同佢聯絡嘅時侯覺得佢最近都係幾好嘅。

野田:我有時都會同佢有短訊嘅交流。我會同佢講「我哋依家係邊度邊度」,佢都會答「係呀~」,都係一啲小交流。因為係一種比較敏感嘅病,所以我哋都唔方便,亦都唔應該俾佢感到壓力。所以我哋都係輕鬆咁同佢交流。不過桑原應該無收到過任何聯絡囉(笑)

桑原:(躺著也中箭)係呢,不過我諗,佢有send畀大家嘅短訊應該都有send畀我嘅。

野田:咁咪即係Default message? 

桑原:(尷尬笑)係呀,不過大家收到嘅,我都有收到嘅。(笑)

同佢哋做完訪問後覺得,從成員之間嘅小互動之間能夠睇到佢哋都非常支持及重視彼此嘅意見,同埋感情真係好好呢。其實結成及出道咁多年,佢哋喺日本一直都有好多歌迷覺得佢哋被人underrated。舊年憑住電影《你的名字。》一躍而紅,令到世界各地都多咗好多歌迷留意佢哋。喺呢度衷心希望佢哋可以繼續走得更遠,同埋下次嚟嘅時候可以再帶更精彩嘅演出畀我哋啦! 

各位中意佢哋嘅粉絲聽日記得支持佢哋喇!

訪問及撰文:Anne 偽現充的日常

RADWIMPS 2017 Asia Live Tour in Hong Kong

日期: 2017年6月13日(星期二)
場地: MacPherson Stadium 麥花臣場館
時間: 開場19:00/ 20:00 開演
票價: HK$ 890 企位- 憑序號進場/ $690/ $490 劃位坐位

門票開售日期: 2017年3月20日(星期一)上午10 點

售票系統 :
Cityline購票通 www.cityline.com / 或致電購票熱線 2111 5333
或親臨Cityline購票通及通利琴行售票處購票 (10am – 8pm)