雉雞同普通家雞有咩分別？
連山梨縣官方都推介嘅雉雞亭可以話係山梨縣無人不知嘅超級名店！成個富士五湖入面，唯一有提供雉雞料理嘅餐廳就係依間雉雞亭啦～雉雞比普通家雞細隻，望上去好五顏六色好靚㗎～雉雞嘅肉質仲非常之嫩滑彈牙，真心推介大家去試吓！
——————————–
超珍貴雉雞刺身
因為雉雞體型比較細，可以用嚟做刺身嘅部分又唔多，所以一隻雉雞只能夠整到2人份量嘅刺身，非常之珍貴㗎～一般雞刺身比較有咬口，有時仲會有少少腥味（雖然我唔怕w），但係雉雞刺身食落就好似好似食緊最高級嘅吞拿魚拖羅咁，好軟滑好鮮甜，真係驚為天人！（一啲都冇誇張，在座所有人都好震驚！）其實我嗰陣仲想再點多碟㗎，不過已經賣晒…真係想食多啲都冇啊＞＜
雉雞刺身 1400円
——————————–
石燒雉雞 外脆內軟半生熟
天氣咁凍，最啱就係即燒即食㗎啦～依到嘅石燒雉雞唔係普通鐵板燒，而係好罕有嘅富士山熔岩石板燒，100%就地取材㗎～難得嚟食咁珍貴嘅雉雞，燒得太生或者太熟都好浪費＞＜所以店員會親自嚟幫我地燒，燒到啲肉外脆內軟，中間仲有少少粉紅色半生熟就最完美啦～食落外層熟晒嘅肉又滑又彈牙，入面半生熟嘅部分就好軟好鮮甜，好正啊！
雉雞肉石燒 2500円
——————————–
雉雞亭招牌菜 雉雞鍋
如果你有去過山梨，就一定知道山梨名物餺飥麵～依個雉雞鍋其實就係將雉雞加入餺飥麵而成，聽講50年前開始就已經係雉雞亭嘅招牌菜嚟㗎啦～白麵豉湯底非常濃郁，加埋嫩滑嘅雉雞真係好食到停唔到口啊～～～～
雉雞鍋 1600円
——————————–
交通小貼士
河口湖車站徒步10分鐘
——————————–
雉雞亭
山梨県南都留郡富士河口湖町船津1525-1
About Post Author
