Like Japan 山梨Plan 12 山梨縣無人不知 南瓜烏冬「餺飥麵」

相信去過山梨嘅朋友,一定會食過餺飥麵~餺飥麵可以話係山梨縣民嘅主糧,平時去餐廳食飯,叫個餐多數都係配飯,但係山梨依到除咗有得配飯之外,仲有得揀配餺飥麵!就算山梨縣民唔出街食飯,喺屋企都會自己整餺飥麵食, 睇得出餺飥麵喺山梨縣民嘅生活中有幾重要~

——————————-

餺飥麵是甚麼?

餺飥麵其實係一種好似烏冬咁嘅麵條,不過就比一般烏冬扁身同軟少少,而佢既湯底亦都非常講究,一定係用味噌同南瓜、薯仔等等蔬菜整成嘅超濃湯底先叫合格㗎!!相傳餺飥麵源自於以前打仗嗰陣,士兵將當地食物放入鍋入面煮嘅一種鄉土料理。去到德川家康嗰陣,佢鍾意喺依種鍋物入面加入味噌,慢慢演變成今時今日嘅餺飥麵啦~~

——————————-

餺飥麵專門店「小作」

如果想試吓山梨縣嘅名物餺飥麵,非常推介大家嚟依間「甲州ほうとう 小作」試吓!依間餺飥麵專門店喺山梨有成9間分店咁多,算係「緊有一間喺左近」嘅連鎖店~今次我地去咗山中湖嘅小作試食餺飥麵,店內坐位非常之多,就算係繁忙時間去都唔怕要等好耐~~其實小作入面所有餺飥麵嘅湯底基本上都係一樣,但係就有好多樣配料選擇,例如豬肉、鴨肉、熊肉、仲有季節限定嘅鮮蠔等等~小編試食咗鮮蠔餺飥麵(1700円),蠔又多又大粒,有驚喜!個湯底非常濃郁,食得出一粒粒好粉嘅薯仔茸,入面仲有幾件大大件嘅南瓜㖭!!如果想試下辣味嘅餺飥麵,大家可以點辛口腩肉餺飥麵(2000円),成個湯底又紅又橙咁,夾埋腩肉非常惹味~~~怕悶唔想食餺飥麵嘅朋友都唔洗驚冇啖好食~依到嘅鰻魚飯(2000円)水準一樣非常高,鰻魚厚肉得嚟又軟身,細骨少,好易入口㗎~~

——————————-

甲州ほうとう小作 山中湖店

山梨縣南都留郡山中湖村山中234