6年後捲土重來!日本正式公佈翻拍《那些年,我們一起追的女孩》

6年後捲土重來!日本正式公佈翻拍《那些年,我們一起追的女孩》

「那些年錯過的大雨 那些年錯過的愛情」相信一見到呢句歌詞,就可以勾起唔少八、九十後嘅共同回憶。

六年前由九把刀嘅半自傳小說改編嘅電影《那些年,我們一起追的女孩(日本譯名:あの頃、君を追いかけた)》熱潮直捲華語地區,唔單止喺多個地區大受歡迎,仲穩佔咗香港華語電影史上最賣座嘅電影作品嘅寶座近五年。不過隨著唔同青春電影相繼誕生,《那些年》就好似沈佳宜同柯景騰嘅愛情咁成為過去⋯⋯

直到今朝(2017年10月3日),日本報刊《日刊スポーツ》發出消息指當地已經開始翻拍《那些年》,並預計喺來年秋季上映!唔知當年《那些年》嘅熱潮能唔能夠由日本嘅新世代演員們重新掀起呢?

 6年後捲土重來!日本正式公佈翻拍《那些年,我們一起追的女孩》
(《那些年》2013年喺日本上映時嘅宣傳畫面,截至官方網頁)

《那些年》以男主角回顧返90年代學生時期嘅往事為主幹,描繪佢同女主角之間互有好感、但又一直只處於曖昩關係期間嘅愛情,同時夾雜好多年少輕狂嘅趣事,當中酸酸甜甜又笑中帶淚嘅劇情惹嚟唔少共鳴。

今次日版將舞台移施到21世紀嘅日本,但都希望將原著觸動人心嘅劇情保留落嚟,成為「連已經青春不再嘅成年觀眾都會有同感嘅作品」。

 6年後捲土重來!日本正式公佈翻拍《那些年,我們一起追的女孩》

圖片:SNICKERSJAPAN

當年《那些年》搵咗尚未走紅嘅陳妍希同首次踏入娛樂圈嘅新人柯震東合作,新鮮感衝擊到唔少觀眾,亦成功令兩位一炮而紅。而日版都搵嚟兩位年輕人主演,特別係飾演女主角斎藤飛鳥第一次擔正,好多人都相當期待佢地會點樣將呢個經典重新演繹。

圖片:乃木坂46公式サイト

圖片:乃木坂46公式サイト

 6年後捲土重來!日本正式公佈翻拍《那些年,我們一起追的女孩》

圖片:SNICKERSJAPAN

斎藤飛鳥喺2011年成為乃木坂46嘅一期生,雖然而家只有19歲,但已經正式出道咗五年有多啦。偶像以外佢主要以模特工作為主,但原來今次並唔係佢第一次參演電影——早喺2007年嗰陣佢已經喺《惡女花魁》中登場。

不過《那些年》係佢加入乃木坂46後第一次電影拍攝,亦都係初次主演,所以佢喺《日刊スポーツ》嘅採訪中都表示有啲不安,但仍然會努力將主要角色們可愛嘅人面傳達出嚟。

 6年後捲土重來!日本正式公佈翻拍《那些年,我們一起追的女孩》

圖片:山田裕貴Twitter

至於男主角山田裕貴嘅拍攝經驗就豐富好多啦。同為90後嘅佢都係2011年出道,至今已經出演咗近四十部電視劇同電影,2014年仲以《LIVE》第一次喺電影中擔正。單係今年下半年,已經有6部佢有份參演嘅電影上映中或者即將上映,包括由佐藤健主演嘅《亞人》同菅田將暉主演嘅《啊啊,荒野》前後篇,都係喺日本期待度極高嘅作品。

原來山田裕貴都有睇過台版《那些年》,當時仲因為咁久違地感動到忍唔住落淚?。「知道要演繹呢部觸動過自己嘅故事嗰陣都覺得幾大壓力,但希望可以好好咁將嗰份感動帶比觀眾,並努力唔好令到套電影崩壞。」

 6年後捲土重來!日本正式公佈翻拍《那些年,我們一起追的女孩》

圖片:山田裕貴Instagram

電影而家已經開始咗拍攝,亦都有網民目擊到斎藤同山田喺埼玉工業大學出外景。佢地就準備得如火如荼啦,你地又準備好重新返去「那些年」未呢?