[5招成為人氣王]日本最紅話題人物－糖果系男孩Ryuchell りゅうちぇる

《Ryuchell 小百科》

真名：比嘉龍二（Higa Ryuji)

血統：1/4美國血統（爸爸是美日混血兒，媽媽是日本人）

生日：1995年9月29日（20歲）

出身地：日本南部一個非「都道府縣」嘅地方：Chel Chel Landちぇるちぇるランド (What?)

身高：172cm

喜好：卡拉OK

特技：服飾配搭、滾軸溜冰

職業：服飾店店員、模特兒

Ryuchell頭頂金毛帶80年代運動型毛巾hairband、愛穿美式復古但顏色鮮豔嘅衫同鍾意化妝，咁鮮明嘅style梗係出眾過螢火蟲啦！之前KAT-TUN嘅上田龍也仲搵Ryuchell過兩招改變其兇神惡煞嘅形象，雖然我唔係好接受到，但得到一致好評呀～

 

唔止上田，連大名鼎鼎嘅男神山下智久都扮過佢！

不過你估Ryuchell啲神髓係咁易學嘅咩～啲反應真係笑死我喇！

 

 

其實日本係一個好壓抑嘅地方嚟嘅…但見到呢個成日笑，仲要係自己笑自己嘅傻仔真係忍唔住笑埋佢一份！冇錯，有節目就分析過點解Ryuchell會咁受歡迎，除咗因為佢真係對fans好好，會逐個覆留言之外，佢有個習慣就係會講完啲無聊嘢自high完自己笑兩聲，成件事就會唔好笑到變得好笑嘞！有無諗起你我身邊都有，會自己搞爛gag自己笑嘅kai子friend呢？

 

Ryuchell講嘢又高音又會用啲女高中生先用嘅tone，好多人一開始都以為佢係gay先會咁受妹妹歡迎。但其實人哋有個交往穩定嘅女朋友Peko架！Ryuchell仲係凡人嘅時候喺你都可能去過嘅原宿SUPER WEGO到做店員，咁就識咗後輩Peko喇。而家兩位仲一齊辭職發展成情侶model，一齊宣揚原宿文化。因為兩位拍拖嘅故事都真係幾好笑，所以兩位都會孖住上節目！一班學生妹就話最鍾意睇Ryuchell吃Peko醋，話有反差萌呢。

當呢位紅到爆燈嘅另類男神Ryuchell俾妹妹仔瘋狂迷戀嘅時候，佢女朋友Peko就毫不客氣公開咗一個殘酷嘅事實：Ryuchell個口好臭架～！

 

其實有邊個會鍾意人話自己好臭呢？仲要係電視節目講，簡直就同話俾全日本聽佢男朋友係口臭無分別。但樂觀嘅Ryuchell竟然係笑住話：「係呀我個口好臭架嘻嘻！」厚面皮程度搞到大家都忍唔住笑佢，即時口臭變萌點。果然世界上無完美嘅人，貼地啲人氣分分鐘仲高呀！

一般你見到嘅搞笑藝人都係比較年長，近年嚟已經少見啲真係搞笑嘅年輕人。不過Ryuchell嘅節目效果真係好好，無論係有心演出（重要本人會自認）定係無心插柳，都能夠成功引起話題，係勁嘅！

 

 

Ryuchell Twitter: https://twitter.com/ryuzi33world929?lang=ja