311海嘯7年　石卷市災區實況

日本311地震已經過咗7年，但對於災區嚟講仍有好長一段路要走。最近住喺大阪嘅台灣人漢娜就去咗宮城縣第二大城 – 受海嘯災害影響極深嘅石卷市。

感謝相片及資料提供：漢娜在翻譯

佐藤茶巾屋

其中一個漢娜旅途中遇到嘅，係一間傳統老鋪嘅婆婆。間鋪叫「佐藤茶巾屋」，專賣當地特色點心「茶巾」（ちゃきん）。

第三代老闆嘅婆婆話間鋪已經開咗七、八十年。店鋪受到海嘯沖毀，初初4年喺政府起嘅臨時商店街維持生計，再勉強儲到錢兩年前租到依加嘅店面。

婆婆將成世時間心機都放係整茶巾入面，災後都繼續謹守崗位工作。

茶巾皮薄餡靚，同超市賣嘅味道唔同。但生意難做，再辛苦都只係勉強賺到溫飽。後繼無人，「佐藤茶巾屋」做到第三代好可能就做唔到落去

災前災後

喺仙台搭一個鐘左右車程，石卷作為宮城縣第二大城人口有16萬。石卷係沿海市鎮，漁農業好盛行。

海嘯之後，石卷人口大減，加上好多地方又因為要防備再有水災而劃為「災害危險區域」，唔可以住人，進一步減少市內人口。
有組織為咗復興石卷市而建立博物館同定期舉辦講座，甚至仲開發咗一個app記錄低唔同地方海嘯前後嘅樣貌。

App: 石巻津波伝承AR

雖然當時破壞咗嘅地方好多都已經整好，但少咗人都係冷冷清清。

鼓勵觀光

為咗復興死氣沈沈嘅街道，最好嘅方法就係觀光。地方政府同埋商人都出盡法寶吸引外國遊客。其中一個吸引遊客，賺錢幫助經濟嘅方法係推出新商品。

好似做傳統和服嘅「林屋吳服店」就研究起木芥子（こけし）。

店主林先生就發明咗石卷版嘅木芥子，仲開始「彩繪木芥子」課程同埋賣木芥子周邊。林先生亦有教漢娜畫他創作嘅圖案。

林先生開咗一個Facebook page，希望可以有效宣傳。

漢娜仲注意到石卷木芥子被用作TBS電視劇99.9嘅道具。

網民意見

漢娜平時喺Facebook專頁多分享有趣翻譯。今次佢認真將石卷市災區實況記錄，一改搞趣形象。本身佢仲以為報道咁悶會不受歡迎，點知一連3日出嘅石卷報道竟然引起網民關注，做咗最有人氣嘅post。
網民好欣賞漢娜寫呢一系列，鼓勵佢唔駛擔心無人like同share。唔少網民亦都話要趁依加仲有呢啲老店去東北旅行，甚至開始介紹其他相關地方。