2020年除咗有東京奧運，仲有好多日本主題樂園嘅新搞作㗎！今次整理咗未來即將落成嘅新主題樂園，以及主題樂園嘅新園區，相信大家聽到都會好期待！
1. 新樂園：吉卜力Park / 預定2020年初開幕
宮崎駿迷一定好期待！因為吉卜力工作室2017年公佈要打造「吉卜力公園」，將動畫入面嘅場景還原，有得睇又有得影！
吉卜力Park將於名古屋開設，座落於名古屋嘅2005年愛知縣世博會會館，預計喺2020年初開幕。
官方公佈嘅消息就唔太多，除咗樂園名稱、地點之外，就只有說明主題樂園佔地約200公頃，以及園內將設有多個宮崎駿著名電影場景。
據日本報道稱，以《龍貓》為主題嘅主題建築已開始動工，率先重現動畫入面嘅世界觀。有網民就推測係電影中出現嘅貓巴士造型建築，亦有人創作咗全園嘅預想圖，推斷園內嘅所有設施，畫得似模似樣㗎！
其實呢個愛知縣世博會會館一早與吉卜力有所關聯，因為公園有重現《龍貓》嘅屋企，仲舉辦過兩次吉卜力展覽會，所以同吉卜力可以話好有緣！
除左還原宮崎駿嘅作品，其實吉卜力工作室仲有大師級嘅高畑勳、宮崎吾朗等導演，佢哋嘅作品好大機會都會被加入主題樂園，大家不妨期待！
2. 環球影城新園區：Super Nintendo World / 預定2020年夏天開幕
另一個令人振奮嘅消息，就係大阪環球影城要開設任天堂主題嘅新園區，俾fans親身體驗遊戲入面嘅世界！
Super Nintendo World斥資600億日圓興建，將建於哈利波特園區隔離，係一座兩層嘅巨大建築。新園區喺2017年6月8號已經動工，預訂於2020年夏天完工。雖然美國兩個環球影城都會有任天堂主題園區，但日本嘅開幕時間最早，會領先喺2020年奧運前開幕！作為任天堂嘅fans當然要去嘗鮮啦！
新園區最大嘅賣點，就係融入人氣遊戲元素，令大家化身為遊戲嘅一分子，同各個角色進行互動。
以公佈咗嘅設計圖嚟講，可以推斷唔少設施嘅內容。好似Mario Kart呢款遊戲咁，環球影城就以漂移效果嘅特色，設計咗大人細路都玩到嘅賽車遊戲。
另一款經典遊戲Donkey Kong，當中搭礦車高速移動嘅關卡，喺新園區就被設計成一座過山車，俾大家飛起去跨越障礙物，聽落好刺激！
官方仲公佈咗其他設施嘅設計圖，有一款望落好似人型裝甲嘅，網民推斷為銀河戰士嘅相關遊戲; 而仲有一款喺賽道上滑落嘅遊戲，有人話係Mario Kart相關遊戲，又有人估係水上遊戲。
官方已經公佈兩條相關影片，分別係園區開幕禮同宣傳片，大家惟有睇下頂住癮先啦！
3. 東京迪士尼樂園新園區：美女與野獸 / 預定2020年春天開幕
東京迪士尼公佈嘅新園區有5部分，當中以美女與野獸為主題嘅園區最為受期待！新園區還原電影入面中古世紀歐洲嘅風格，暫時公佈嘅有女主角居住嘅法國小鎮、野獸王子城堡，同埋一間動畫出現過嘅餐廳。
除左宣傳影片，官方亦有公開部分新區嘅意象圖，俾大家睇到更多街道細節。
另外4個新園區，網民就推測為「米奇見面區」、「杯麵主題區」、新劇場，仲有Baymax主題嘅新設施。呢幾個園區都預計2020年春天完工，大家到時唔好錯過喇！
About Post Author
