相信無論你係來自「老、中、青」邊一代，「鹹蛋超人」呢個名你都一定會聽過，雖然官方「鹹蛋超人」嘅生日係上個星期嘅7月10日，不過1966年今日卻係史上第一套「鹹蛋超人」片集，『超人吉田』第1集嘅首播日喎。
話說「鹹蛋超人(ウルトラマン)」係嚟自另一套作品『地球保衛戰』。話說喺1950年代尾，60年代頭於美國有一套橫掃海內外，神秘主義滿載嘅科幻片集『迷離境界(The Twilight Zone)』，當時由於片集太受歡迎，後來引嚟咗唔同地方都爭相參考，其中包括香港嘅『幻海奇情』，以及日本嘅『地球保衛戰(ウルトラQ)』。
地球保衛戰(ウルトラQ)
迷離境界(The Twilight Zone)
同時參考咗『奇幻人間(The Outer Limits) 』以及『幻海奇情』，加上有當時曾參與拍攝『哥斯拉』嘅圓谷英二坐陣監製，『地球保衛戰』第一季共28集都取得唔錯嘅成績，於是電視台決定要繼續乘勝追擊拍多部新嘅特攝片，仲要係彩色添！ 由於電視台要求要有正義英雄VS怪獸，又要有處理神秘事件嘅組織(仲有要留一個『地球保衛戰』嘅演員)，於是圓谷英二就提出參考DC嗰個超人，經過多番修改，甚至出現咗『紅超人』呢個棄案之後，終於就得出依家大家熟悉嘅『超人吉田』。
圓谷英二
『超人』嘅故事非常簡單，就係來自科學特搜隊隊員早田(冇錯，係早田而唔係吉田，因為吉田其實係負責翻譯嗰位同事譯錯嘅結果，不過有道是「約定俗成」，一開始先定好嘅譯名基本就係正義，所以「吉田」呢個名就一直沿用至今)駕駛戰機VTOL同來自M78星雲追蹤怪獸「比勒」(意念來自日本傳說烏天狗，原本都係屬於廢案『紅超人』嘅一部分)嘅超人「撞機」，超人出於內疚作出嘅事後補償，於是就同佢二合為一作戰。由此開始早田就使用「β膠囊」變成超人，同不同嘅怪獸、宇宙人決戰。
早田(右)及其他科特隊隊員，最左面飾演隊長嘅小林昭二相信大家唔會陌生
最終回同積頓嘅決戰到今日仍然非常經典
人氣爆燈嘅巴魯坦星人其實第2回已經首次登場，仲要接近係被秒殺,係少數連計時器都未閃就搞掂嘅敵人
作為第一位現身銀幕嘅宇宙警備隊嘅戰士，超人吉田成績非常驕人，片集日本TBS電視台首播，當時平均收視率高達36.8%，最高時達到42.8%，使得作品開始出現一系列嘅續作，包括『七星俠』、『阿鄉』、『A』、『太郎』等等到依家嘅『GEED』等等，連吉田最終回嚟接超人走嘅佐菲，後來都有追加設定，升咗職就隊長同做埋大佬。呢一班來自300萬光年外，M78星雲光之國嘅戰士，似乎仍然會有一段長時間會繼續喺地球活動啊。
超人吉田小資料
人類宿主：早田進
身高：40m
體重：35000噸
歲數：超過20000歲
身體由紅、銀兩色組成，而當中紅色代表有機部分，銀色則為太空金屬。
心口有個彩色計時器，唔夠能源或者重傷時會閃動。
出身地：M78星雲光之國
飛行速度：5馬赫
跳躍高度：800 m
部分常見招式：
斯佩修姆光線
即係大家平時成日見到嘅「十字光線」，彩色計時器未閃就出招嘅話通常都會輸。
超攻擊光線
於『怪獸大戰爭超銀河傳說 THE MOVIE』中出現過嘅升級版絕招，改咗右手單手使用。
八裂光輪
投出鋸齒狀能量光輪切開怪獸，對巴魯坦星人時試過一次出兩個。
透視光線
從眼睛發出光束，使隱形物體現形，對達達星人時用過。
超級眼光
從眼睛發出光束，使對方護罩失效，對巴魯坦星人時用過。
捕捉之環
以高速旋轉創造能量環，用於捕獲或纏住敵人，對積頓時用過。
順帶一提，其實所謂嘅廢案『紅超人』最後都係於1972年拍咗出嚟，而且由於設定同畫面、背景不符，加上手段太「污糟」，喺某啲層面上，都算出咗名嘅。
About Post Author
