想喺香港搵間地點方便、價錢合理、調酒師質素高、環境又要方便傾計嘅日本酒吧，聽落好似好難…不過！呢間心目中嘅酒吧原來遠在天邊近在眼前，銅鑼灣就有一間！呢間環境恬靜嘅樓上日本酒吧「Sowelu」，唔止酒類口味獨特，就連佐酒小菜都質素一流，食飯飲酒都可以喺到搞掂。而最重要嘅係…Sowelu嘅老闆，店員同埋小編當日所見嘅客人，全部都係地道日本人！（豔遇/識朋友好機會呀各位^.^）
*極有家的感覺啊!! 環境氣氛好relax。
But First, Beer！我同Anne分別揀咗蕃茄同櫻花口味嘅啤酒。
麒麟 Frozen Beer $98 (Regular $88)
另外仲有柚子、熱情果、草莓、黑加侖子、椰子、薄菏、蕃茄、姜味等獨家口味！
如果你同我一樣係蕃茄控，絕對要試呢款蕃茄啤酒~蕃茄味好出，直情似飲緊番茄汁，但又有啤酒嘅苦味~個人覺得非常好飲！
櫻花味則比較淡，感覺清新易入口。
Sowelu 特製日式炸雞 $88
有heart之作。先以自家醬汁醃製雞肉一日，有人落單先新鮮即炸！外皮酥脆，咬落有聲仲要好響~肉質入味又多汁，而且份量好足，正!!
Carpaccio $128
帆立具係由日本直送，加埋特製醬汁所製成的Carpaccio、魚子醬、蕃茄和煙三文魚，唔洗花巧嘅烹飪技巧，已經可以食出食物嘅真實味道！
魷魚一夜干（hidden menu）$38
想食要靠運氣~因為唔係次次有！一夜干，意思係將鮮魚變成魚乾，將鮮甜轉化成鹹。食落口都幾鹹，但係配酒一流，係日本人喺居酒屋下酒嘅熱門小菜之一！而且重點係，價錢太親民了吧~
虎徹拉麵/一徹拉麵 (鹽味及醬油味) $98
估唔到傾計傾到肚餓仲可以點拉麵食！呢個每日限定15份嘅Sowelu自家製拉麵，湯底非常濃厚，全因採用咗雞骨同10幾種蔬菜熬製而成，令湯底味道更加鮮甜。當然，材料又點可以馬虎，嚟自鹿兒島嘅黑豚肉同廣島縣嘅溫泉蛋，都令成碗拉麵大大加分！
食完咁多下酒菜當然要品返杯好酒吧~Sowelu設有空中庭園，可以一邊望住銅鑼灣夜景，一邊點返杯特製雞尾酒慢慢嘆~
Hojicha Cooler $118
使用日本焙茶，冧酒和新鮮梨子調製而成，味道偏向甘甜清爽。
Greentea Sake Caipirinha $98
用上獺祭及福岡八女茶調制而成，不過sake味較重，稍為搶咗綠茶戲，濃度頗高，飲得之人可以點嚟試下！
老闆中村先生同我哋講，佢喺香港開酒吧嘅原因就係想畀更多香港人感受日式酒吧嘅好處，同埋引入一啲連日本人都未食過嘅地道日式料理！所以佢哋其實每個月都開設唔同嘅特色活動，有時會專門從日本請師父嚟開Event製作食物！
因為佢哋有好大個terrace，所以都經常係度搞交流會。好多住喺香港嘅日本人都會參加，亦都歡迎想識日本人朋友嘅香港人嚟參與㗎！想知佢哋有咩活動嘅話記得留意佢哋嘅Facebook（https://www.facebook.com/sowelu.hk/）喇～
Sowelu
地址：銅鑼灣駱克道447-449號中威商業大廈5樓
電話：2766 1171
時間：星期一至五5pm-2am
星期六7pm-2am
About Post Author
