全盛時期嘅川谷繪音到底可以剋到身邊幾多人？
相信有留意開日本娛樂新聞嘅朋友都會知道川谷繪音係邊個。
今年年初嘅爆出同Becky搞婚外情時，Becky名譽同形象掃地，沉默咗大半年都仍然冇任何工作。而川谷繪音就繼續喺鏡頭前活動，繼續唱歌出碟。不倫騷動後川谷繪音所屬樂隊「極品下流少女」嘅新專輯「兩成敗」更加獲得ORICON冠軍，全國10都市15場公演門票售清。
（小編承認，唔計個人，首歌係真心幾好聽。其實係隊既特別又有實力嘅樂隊…）
▲前幾個月，川谷先俾人影到同個後生女飲完酒準備帶番屋企過夜，當場被斷正。雖然佢否認呢個女仔係女朋友，但就風騷不避嫌話唔排除以後有發展空間。當時Becky仲未能復出，令好多人感嘆兩人醜聞事後發展差太遠。
▲前幾日，川谷繪音又傳出大鑊嘢。今次又畀傳媒捉正佢溝19歲新女ほのかりん仲要同居，難得嘅喺兩人嘅事務所竟然承認今次嘅緋聞。不過狗仔隊就發現未成年嘅呢位妹妹同川谷約會有飲酒（日本法定年齡為20歲），而同居嘅男朋友川谷繪音絕對責無旁貸。
▲川谷繪音新歡ほのかりん
今次事件唔單止令電視台終止同ほのかりん拍攝《R的法則》嘅合作，原先出演嘅舞台劇《Luna Rossa》一事亦都化成白紙。發生咗咁多事，川谷繪音終於喺尋日嘅演唱會後向粉絲道歉，並宣布嚟緊會樂隊會暫時停止活動。
▲嚟緊12月3月嘅Zepp Tokyo演唱會將會取消之外，母公司日本華納亦喺網上宣佈12月7日發售嘅專輯『達磨林檎』亦會暫時擱置發售計畫。
▲最近亦終於有廣告商搵Becky拍攝報紙特大頭版廣告，當中Becky性感露背，仲亮出一頭新剪嘅短髮，配上「尋找新衣服吧」嘅標語展示自己已經ready重新出發！
雖然我唔覺得Becky搭上有婦之夫係啱，但就衷心希望佢快啲撇開呢個極品下流主唱嘅陰影，重新展開事業。川谷繪音呢…就希望真係真係會反省下自己喇。
日本網民紛紛留言話其實最慘嘅事主就係川谷前妻。
About Post Author
