日本平民綜合超市ItoYokado 8種貼心服務大檢閱

大家仲記唔記得上集「想體驗日本人生活？去綜合超市ItoYokado！」介紹過一間日本綜合超市ItoYokado呢？ItoYokado同日本7-Eleven、赤ちゃん本舗、LOFT等等店舖一樣，全部都係來自日本零售巨頭SEVEN & i Group。所謂嘅「綜合超市」，即係除咗超級市場之外，仲有衫褲鞋襪、家庭用品、生活雜貨等等賣場，衣食住行樣樣都包晒！上集講完ItoYokado個超市有幾好行，今集就同大家介紹吓 ItoYokado有咩為顧客而設嘅貼心服務啦！

—————————–

貼心服務1：免稅服務

喺ItoYokado購物之後，只要於購買當日帶埋護照、收據同你買咗嘅商品，前往免稅手續櫃檯或者服務櫃檯，就可以辦理退稅手續啦！喺2018年7月1日前，只要購買一般用品，例如衫褲鞋襪、家電文具等等連稅滿5400日圓，又或者購買消耗品如日用品、飲品同藥妝等等連稅滿5400日圓，就符合免稅資格。而由2018年7月1日起（暫定），日本政府已經落實將一般貨品同消耗品嘅退稅程序合二為一，到時一般物品同消耗品嘅金額加埋之後連稅滿5400日圓就可以免稅！喺同一個地方可以買到咁多唔同嘅商品，仲可以免稅，係咪好方便呢～
—————————–

貼心服務2：免費Wi-Fi

免費Wi-Fi簡直就係遊客福音（笑）ItoYokado店內嘅Wi-Fi「7SPOT」開放畀顧客免費使用，只要免費註冊成為會員（需要輸入電子郵件、性別、出生年月日、密碼），就可以喺ItoYokado、日本7-Eleven、Denny’s等等SEVEN & i Group旗下嘅餐廳同店舖使用，好方便㗎～

（使用期限為一天）

—————————–

貼心服務3：可使用信用卡、銀聯卡簽帳

貼心服務4：可使用信用卡、銀聯卡提款

喺ItoYokado購物，除咗可以用日圓付款之外，亦都可以使用Visa、Master等等信用卡或銀聯卡簽帳。如果你有日本嘅Suica或者PASMO等交通卡，同樣可以用嚟畀錢㗎～另外ItoYokado店內又有Seven Bank自動櫃員機，大家可以使用日本海外發行嘅Visa、Master等等信用卡或銀聯卡直接提取日圓，櫃員機仲對應埋繁體中文同英文等等語言㖭㗎！
—————————–

貼心服務5：免費冰塊服務

買咗需要冷藏嘅食物，但又未咁快返到去旅館？大家可以去食品賣場（超級市場）到利用免費冰塊，幫買咗嘅食物保凍（雖然時間唔算好長）～冰塊係自助形式咁拎，大家喺個櫃旁邊拎個透明袋，將啲冰袋入去就得㗎啦～

（只限已消費顧客）

—————————–

貼心服務6：冷凍儲物櫃

想保冷除咗可以使用免費冰塊服務之外，亦都可以使用冷凍儲物櫃（100日圓／次），適合買咗需要冷藏嘅食品，但又想繼續喺ItoYokado嘅其他樓層到逛嘅朋友使用～

—————————–

貼心服務7：免費儲物櫃

除咗冷凍儲物櫃之外，ItoYokado又有免費儲物櫃，大家可以將買咗嘅嘢放住喺儲物櫃到先，咁就唔洗拎住一袋二袋行街街啦～不過留意返，因為冷凍儲物櫃唔係間間舖都有，所以有需要時就記得向店員確認返當店有冇依項服務啦～
—————————–

貼心服務8：SEVEN CAFÉ

行到攰攰地，不妨去SEVEN CAFÉ飲杯優質香濃咖啡，最平100日圓（連稅）已經有交易，好抵啊！大家可以去超級市場到買啲專係用嚟配咖啡嘅小食，例如「SEVEN CAFE 砂糖奶油樹夾心餅乾」237日圓（連稅）、「SEVEN CAFE 提子乾三文治曲奇」354日圓（連稅）等等，帶嚟SEVEN CAFÉ到配咖啡食，簡直一流！

—————————–

GRAND TREE武蔵小杉店 親子旅行推介

截至2018年4月，ItoYokado喺全日本有成約170家分店咁多，喺離吉祥寺唔遠嘅武蔵境、新宿等等深受日本人喜愛嘅人氣地區都有分店㗎！其中GRAND TREE武蔵小杉店又新又大，道路廣闊，屋頂仲有個庭園，好適合同屋企人、親子旅行嘅朋友嚟行吓～如果你都想體驗吓日本人嘅日常生活，下次嚟到日本，就記得嚟ItoYokado行吓啦～

—————————–

快啲click入以下網址同facebook專頁了解更多店鋪最新資訊啦！

ItoYokado 官方網站（繁體中文）
ItoYokado 官方facebook（繁體中文）
ItoYokado曳舟店

—————————–

GRAND TREE武蔵小杉店
地址：〒211-0004 神奈川県川崎市中原区新丸子東3-1135-1
營業時間（ItoYokado）：
1F：10：00～22：00
3F、4F：10：00～21：00
每月8日、15日、18日、25日、28日、星期六日及公眾假期：1F ：9：00～22：00