大家仲記唔記得前兩集介紹過創立於1920年嘅老字號綜合超市ItoYokado呢～佢同日本7-Eleven、赤ちゃん本舗、LOFT等等店舖一樣，來自日本零售巨頭SEVEN & i Group。依到出售嘅商品種類多多，琳瑯滿目，除咗有平時見到嘅品牌之外，仲有自家商品品牌㖭！今集一齊嚟睇吓ItoYokado有咩必買手信同正嘢啦！
———————–
1.杯麵類
SEVEN PREMIUM係SEVEN & i Group喺2007年推出嘅自家商品牌子，致力於提供安心、安全、更好味、更抵買嘅商品畀顧客。SEVEN PREMIUM嘅商品種類多、質素高，好似SEVEN PREMIUM、SEVEN PREMIUM GOLD同日本著名麵家同廠商合作推出嘅杯麵，例如「SEVEN PREMIUM 蔦 醬油Soba」（278日圓 連稅）、「SEVEN PREMIUM GOLD 山頭火 旭川鹽味豬骨杯麵」（278日圓 連稅）、「SEVEN PREMIUM 蒙古タンメン中本 豆腐湯杯麵」 （183日圓 連稅）等等，就保留晒麵家本身嘅特色同風味，最啱買嚟做手信！
———————–
2.零食類
零食類係最受歡迎嘅手信之一，無論送畀家人、朋友定同事都一樣適合～ItoYokado有多種零食出售，餅乾、曲奇、薯片、薯條等等應有盡有。如果你同小編一樣，鍾意食紫菜味薯片的話，可以試吓依包「SEVEN PREMIUM 厚切鹽味紫菜薯片」（213日圓 連稅），厚切薯片薯味濃郁，好唔錯㗎！SEVEN PREMIUM又有一系列100日圓零食，價錢抵得嚟質素又高，大小鹹甜樣樣齊～小編嘅心水之選就係「SEVEN PREMIUM 杏仁魚仔」（108日圓 連稅），細細包方便帶出街，另外就係「SEVEN PREMIUM 薩摩蕃薯脆條」（108日圓 連稅），香脆得嚟蕃薯甜味又出，放喺公司食就啱晒啦！同大家介紹埋SEVEN CAFE出品嘅零食，「SEVEN CAFE砂糖奶油樹夾心餅乾」（3塊/237日圓 連稅）、「SEVEN CAFE 提子乾三文治曲奇」（3塊/354日圓 連稅）等等甜餅乾，配咖啡食認真一流，下午茶必備！
———————–
3.麵包類
去旅行好多時都晨咁早出發，去超市買定早餐第二朝食就最方便啦～「SEVEN PREMIUM GOLD 發酵牛油香味 黃金方包 厚切2塊裝」（128日圓/連稅）使用法國產牛油同北海道產忌廉製作而成，食落牛油味香噴噴，就算就咁食都唔會齋（笑）抵讚嘅係依款方包唔會加任何麵包發酵添加劑同乳化劑，咁就可以放心盡情食啦～
———————–
4.雪糕 雪條類
ItoYokado一年四季都有雪糕雪條賣㗎！依到除咗有各大雪糕品牌，例如Häagen-Dazs嘅雪糕之外（有時仲會有日本期間限定版㖭！），仲有SEVEN PREMIUM嘅雪條，例如「SEVEN PREMIUM 濃厚可爾必思雪條」（108日圓 連稅）、「SEVEN PREMIUM 杏仁朱古力抹茶雪條」（192日圓 連稅）等等。小編特別向鍾意食水果嘅朋友推介以下幾款水果雪條，口感好似就咁將個水果雪到變咗冰咁，超正！「SEVEN PREMIUM 芒果冰雪條」（140日圓 連稅）食落陣陣阿方索芒果嘅獨特清香，甜味非常出眾；「SEVEN PREMIUM 奇異果冰雪條」（140日圓 連稅）使用紐西蘭綠色奇異果同黃金奇異果製作，酸味同甜味配合得啱啱好，食落好清新；「SEVEN PREMIUM 蜜瓜冰雪條」（149日圓 連稅）使用來自兩個唔同產地嘅蜜瓜汁整成，蜜瓜味道濃厚，食完回味無窮～
———————–
5.男女服裝類
睇完食品就睇吓服裝商品先～向男士們大力推薦「超・形態安定」系列「超級恤衫」，明明係100％純綿，但係喺屋企用洗衣機洗完之後，件衫都唔會變到成條梅菜咁，唔洗燙都直筆甩，洗50次仍然好似新嘅一樣！享受生活、留意時尚潮流嘅女士們要留意啦！GALLORIA就係ItoYokado專為你地而設嘅自家服裝品牌。GALLORIA苧麻亞麻質襯衫（4212日圓 連稅）帶有柔和嘅光澤，麻質布料方便打理，可以放入洗衣機洗，方便日常穿搭，另外GALLORIA印花緞質背心（4212日圓 連稅）亦都好百搭㗎！
———————–
6.內衣 家居服類
男女裝SEVEN PREMIUM LIFESTYLE BODY COOLER內衣系列嘅質地清涼透薄滑劣劣，秒速吸汗，唔怕畀啲汗搞到個背瘠黐立立，仲抗菌防臭㖭！再私心推介埋SEVEN PREMIUM LIFESTYLE BODY COOLER女裝背心條紋吸汗內衣（連胸墊）（1609日圓 連稅）畀大家，當底衫或家居服都一樣適合㗎～
———————–
7.手袋 高跟鞋
SEVEN PREMIUM嘅KiREi系列係ItoYokado嘅原創品牌，日本製造嘅高跟鞋質地講究、設計時尚，著起嚟突顯到女性腳踝之美。兩用皮製手提包最啱OL們返工同放假時使用，手提包內都算有幾多間隔，方便收納。其實KiREi系列除咗手袋、高跟鞋好睇又實用之外，仲有上衣、褲、外套等等服裝系列，一樣好吸引㗎～
———————–
8. 生活雜貨 家庭用品
SEVEN PREMIUM同日本毛巾品牌Hotman合作嘅「1秒毛巾」吸水力特強，沖完涼時用嚟抹敏感嘅肌膚、頭髮、甚至係BB仔嘅幼嫩肌膚都非常適合～除咗吸水力強、質地好之外，「1秒毛巾」亦好耐用，洗極都咁好用～另外SEVEN & i Group限定發售嘅FLAIR FRAGRANCE AYUS柔順劑香噴噴，一路著住件衫，一路聞到陣陣香氣，精神爽利～
ItoYokado商品琳瑯滿目、安心安全，仲有好多SEVEN & i Group限定發售嘅商品㖭！下次嚟日本嘅話，千祈唔好錯過啊！
———————–
快啲click入以下網址同facebook專頁了解更多店鋪最新資訊啦！
ItoYokado 官方網站（繁體中文）
ItoYokado 官方facebook（繁體中文）
About Post Author
