[日本在香港] 唔同嘅日本人,唔同嘅香港 @ チョイ住み

[日本在香港] 唔同嘅日本人,唔同嘅香港 @ チョイ住み

[專欄:日本在香港]

之前專欄講到以香港作為舞台嘅劇集《戀愛香港》,今期就繼續睇下當地傳媒透過電視屏幕去將一個咩模樣嘅香港呈現喺日本人面前啦。

去日本嘅旅遊節目平時就睇得多啦,大概每隔幾個月就會有甚麼甚麼藝人出走日本介紹當地有咩好玩、好食。其實日本都有唔少節目介紹過香港喎。好似啱啱7月1日播出嘅《チョイ住み in 香港》就有人氣作家暨Blogger伊藤春香(はあちゅう)同藝人南明奈一齊訪港,帶觀眾去見識不一樣嘅香港。

[日本在香港] 唔同嘅日本人,唔同嘅香港 @ チョイ住み

《チョイ住み》意指「稍為住一下」,係NHK一個特別嘅旅遊真人show,每集都會邀請兩位嘉賓去外國住一星期,體驗當地嘅生活同文化。所以比起旅遊景點,觀眾更希望睇到佢地同當地人交流、仲有一齊生活嘅片段,由生活層面了解嗰個地方。嘉賓之一嘅はあちゅう更曾經去過香港留學,唔少人都好期待呢一集。

節目喺四月下旬左右拍攝,行程主要由はあちゅう負責計劃。一般嘉賓都會喺當地集合,不過今次はあちゅう同南明奈就一齊係東京飛香港,難得可以見到兩個人由機場去搵間公寓喺邊嘅畫面。一路上佢地都冇忘記今次《チョイ住み》嘅副標題:「鏡頭下美麗嘅香港」,不時拎部相機出嚟將眼前嘅美景影低,仲喺皇后像廣場附近影咗第一張二人合照。後尾行超市嗰陣見到又有榴槤又有各式各樣嘅醬料,佢地都紛紛表示好神奇呀~!

[日本在香港] 唔同嘅日本人,唔同嘅香港 @ チョイ住み
(到埗情況,截自官方網頁)

Day1行程

  • 到埗

  • 去借住嘅銅鑼灣鬧市中一個單位放低行李

  • 中環某高級中菜館晚飯

  • 超市購物(毛巾、水、零食,花費約$200)

第二日佢地主要去PMQ元創坊行街,點知途中突然就落起大雨!好彩扶手電梯路段有瓦遮頭,唔使變做落湯雞。嗰度各種可愛嘅雜貨同飾物令兩位都大叫投降,好想買曬返去。之後佢地就喺附近體驗腳底按摩,南明奈就覺得冇咩特別,如果按得大力啲就好啦⋯⋯嗯,睇嚟佢應該幾健康啦。

[日本在香港] 唔同嘅日本人,唔同嘅香港 @ チョイ住み
(截自官方網頁)

Day2行程

  • 銅鑼灣某冰室食早餐

  • 超市購物(柔順劑、浴室清潔劑)

  • 半山扶手電梯

  • 元創坊

  • 某腳底按摩店

  • 中環某西餐廳晚飯(為咗避雨隨便入去嘅)

  • 麵包舖買蛋撻、 麵包

第三日係時候離開港島啦。佢地呢日出咗「香港嘅澀谷」(佢地話嘅)旺角行逛,一見到密集嘅招牌之後,都忍唔住話「好香港呀!」對於遊客,講起旺角就緊係女人街啦,佢地都特登去個度行咗圈,仲講價成功?。不過到於本地人,就不得不提旺中。佢地都有去行逛,雖然只係window shopping,但都叫貼地呀。

[日本在香港] 唔同嘅日本人,唔同嘅香港 @ チョイ住み
(翻譯:喺女人街買咗令人有好心情嘅袋:) 就咁拎住啲人就會覺得我好cheerful)

[日本在香港] 唔同嘅日本人,唔同嘅香港 @ チョイ住み
(截自官方網頁)

Day3行程

  • 灣仔食動物點心

  • 旺角中心購物

  • 女人街購物

  • 登打士街食街蛋仔

  • 麵包舖買麵包

  • 食粥

身在港島,就緊係要搭下叮叮啦。第四日佢地坐電車搭到鰂魚涌,節目都推介觀眾搭多啲公共交通工具,可能會見到本地人真實嘅一面咁話。はあちゅう就覺得自己好似身臨電影之中,十分不可思議。

[日本在香港] 唔同嘅日本人,唔同嘅香港 @ チョイ住み
(截自官方網頁:(14)喺《變形金鋼》外景拍攝場地度影相)

[日本在香港] 唔同嘅日本人,唔同嘅香港 @ チョイ住み
(截自官方網頁:玩緊「不可思議嘅遊樂設施」嘅南明奈)

Day4行程

  • 糖廠街市集食嘢

  • 行街市

  • 「怪獸大廈」影相

  • 鰂魚涌某中菜館食燒味等(食咗$600⋯⋯)

  • 灣仔行街

  • 遊樂場玩「不可思議嘅遊樂設施」

  • 銅鑼灣食雲吞麵

第五日嘅一早はあちゅう去咗搵朋友食早餐,之後先一齊行動。話說佢地借住嘅單位隔離有間髮型屋,趁機會就book咗第二日去set頭,搞掂曬就出發過海!呢日嘅行動難得地由南明奈提議,玩咗小型賽車又買到game,係佢呢趟旅程之中最滿足嘅一日。

[日本在香港] 唔同嘅日本人,唔同嘅香港 @ チョイ住み
(截自官方網頁:(18)小型賽車餐廳)

[日本在香港] 唔同嘅日本人,唔同嘅香港 @ チョイ住み
(截自官方網頁:(21)深水埗嘅電器街)

Day5行程

  • 銅鑼灣食早餐(はあちゅう)

  • 荔枝角玩小型賽車

  • 荔枝角某茶餐廳食飯

  • 荔枝角行街

  • 鴨寮街購物(遊戲手掣、遊戲光碟)

最後一日開頭都係分頭行事。はあちゅう去隔離髮型屋set頭,但南明奈因為對嗰度嘅貓敏感而只能留返喺屋內。髮型師為佢set咗個感覺高貴嘅髮型,都幾襯佢㗎。呢日佢地仲一次過體驗曬渡海小輪、纜車同巴士三種特別嘅交通工具。完成一日嘅行程之後佢地都好唔捨得香港,仲話見唔到咁多招牌可能會有啲寂寞呀。

[日本在香港] 唔同嘅日本人,唔同嘅香港 @ チョイ住み
(截自官方網頁:幫はあちゅうset咗頭嘅髮型屋)

Day6行程

  • Set頭(はあちゅう)

  • 尖沙咀食動物點心

  • 星光行買手信

  • 搭天星小輪去中環

  • 搭山頂纜車上山頂

  • 香港特麗愛3D美術館

  • 銅鑼灣某中菜館晚餐

節目最後仲用咗本地女子唱作組合Robynn & Kendy嘅Say Goodbye作結,應景之餘令到節目更加有香港味道。小編睇到最後突然聽到廣東歌嗰吓真係嚇咗跳,覺得十分驚喜。

[日本在香港] 唔同嘅日本人,唔同嘅香港 @ チョイ住み

總結而言,佢地都介紹咗唔少特別嘅餐廳同景點,對於想去嚟香港旅行嘅日本遊客都算唔錯嘅參考。好似唔同嘅動物點心餐廳就得到唔少網友青睞話好得意,亦都有人睇到佢地影嘅相之後都話要去打返張卡!

另外,佢地都有介紹唔同嘅地道文化㗎。好似我地喺星期日成日都會見到外傭聚集,喺日本人眼中係幾不明所以,於是都有特別介紹到呢個景像。有網民睇完話呢個不解之謎終於有咗答案,爽呀!

[日本在香港] 唔同嘅日本人,唔同嘅香港 @ チョイ住み
(翻譯:我睇緊《チョイ住み》。好想去香港呀!好想去買嘢同飲茶!)

[日本在香港] 唔同嘅日本人,唔同嘅香港 @ チョイ住み
(翻譯:睇返錄低咗嘅《チョイ住み in 香港》。香港好似幾有趣咁。好想去香港!)

有讚就自然會有人彈。唔少網民都覺得佢地做嘅嘢同一般遊客無異,而唔係嘗試喺當地生活、同本地人交流。可能對於はあちゅう同南明奈而言,香港比起居住更適合為咗旅遊而去啦,所以成個節目都係以一個旅客視角去介紹而唔係以一個暫住嘅人嘅諗法去拍攝。作為香港人嘅我未必有資格評論佢地係咪真係違反咗節目嘅宗旨,但透過外國人嘅介紹去睇我長大嘅城市,理解佢地眼中香港嘅魅力,咁樣都幾有趣吖。

[日本在香港] 唔同嘅日本人,唔同嘅香港 @ チョイ住み
(翻譯:第一次睇女子組。吓!!連飯都冇煮過真心完全唔似《チョイ住み》囉。根本只係「行街、觀光、影相」。明明翡冷翠嗰集咁感動。自己否定返自己嘅節目佢都得㗎啦。不愧係NHK,畀錢去否定自己。)

 

[日本在香港] 唔同嘅日本人,唔同嘅香港 @ チョイ住み

A 好大份但係好健康嘅嘢食 B 銅鑼灣站周邊 C 巴士同電車都有兩層
D 山頂影落去嘅夜景 E 大廈外牆佈滿冷氣機 F 建築場地用緊竹棚
G 最in嘅高樓大廈同舊舖混埋一齊 H 點心本身好似係晏晝食嘅 I 工作人員係「I」附近發現嘅「香港」
J 入到去小巷就會見到近未來嘅科幻景色 K 香港足球隊 L 土地狹窄嘅香港係咩都會向上延伸
M 聚集咗好多小巴嘅旺角 N 繁華嘅旺角嘅露天街頭 O 夾雜漢字同英文嘅街道
P 行入多步就會見到魚市場 Q 四圍都係完隻燒雞 R 金華街熱鬧嘅街市
S 充滿藝術嘅行人路 T 世界最長嘅扶手電梯 U 香港輝煌嘅夜景

節目以外,《チョイ住み》另一個特別嘅地方,係節目播完之後會喺官方網頁以日程同地圖介紹返成個旅程。當中有一個叫「工作人員眼中嘅《チョイ住み》」,隨行嘅工作人員會將冇播出嘅相、影片同自己嘅感想分享出去,比觀眾更進一步了解嗰個地方獨特嘅一面。

每次行過後巷,你會有咩感覺呢?好似係捷徑?污糟?定好陰暗?但係《チョイ住み》嘅工作人員眼中,佢地就覺得入咗去就好似置身喺近未來科幻片嘅場景中。神秘嘅塗鴉加上密集嘅大廈包圍住,確實係幾不可思議。

[日本在香港] 唔同嘅日本人,唔同嘅香港 @ チョイ住み
(截自官方網頁:(J)入到去小巷就會見到近未來嘅科幻景色)

另外,佢地仲分享咗雙層巴士同電車、佈滿大廈外牆嘅冷氣機、排喺街度嘅桶裝水樽同棚架等。連路牌同巴士站嘅記號都唔放過!佢講到香港嘅土地好狹窄,所以咩都會向上發展;又提及香港好多嘢都係中英夾雜,同基本上淨係得日文嘅日本街頭相差都幾遠。

[日本在香港] 唔同嘅日本人,唔同嘅香港 @ チョイ住み

[日本在香港] 唔同嘅日本人,唔同嘅香港 @ チョイ住み
(截自官方網頁:(E)大廈外牆佈滿冷氣機)

[日本在香港] 唔同嘅日本人,唔同嘅香港 @ チョイ住み
(截自官方網頁:(I)工作人員係「I」附近發現嘅「香港」)

[日本在香港] 唔同嘅日本人,唔同嘅香港 @ チョイ住み
(截自官方網頁:(O)夾雜漢字同英文嘅街道)

如果想知更多はあちゅう同南明奈相機下嘅景點同當地工作人員眼中嘅香港,可以去返官方網頁中choi sumi MAP in HongKong睇到。下次有機會去日本,都可以好似咁用另一個角度去諗返兩地嘅差異,可能會有驚喜發現呢!

 

[日本在香港] 唔同嘅日本人,唔同嘅香港 @ チョイ住み
《チョイ住み in 香港》
2017年7月1日於NHK BSプレミアム播出
官方網頁:http://www.nhk.or.jp/choisumi/hongkong/index.html

 

Copyright NHK (Japan Broadcasting Corporation) All rights reserved.