【成個日本我去晒】4萬蚊 豪華環島列車之旅 !

【成個日本我去晒】4萬蚊 豪華環島列車之旅 !

就算你有幾鐘意日本都好,相信都無咩機會去勻成個日本⋯⋯機會嚟喇!只要你肯比4萬蚊,就可以參加豪華環島列車之旅,13日間搭勻各款JR列車,由日本最南邊玩到最北邊,包食包住!

【成個日本我去晒】4萬蚊 豪華環島列車之旅 !

適逢JR集團30周年,JR東海Tours推出咗超吸引嘅「日本列島大周遊」,係一個日本較罕有嘅列車旅行package。JR以搭列車遊日本為賣點,俾大家喺13日間搭齊30款列車,每日去唔同著名景點觀光、試當地特色美食,仲有靚酒店住,成個trip好似郵輪假期咁,聽落好似好豪華咁!

搭列車環島睇景

呢個13日嘅旅程講到明係環島之旅,會由東京搭去名古屋,再去伊勢、松山、鹿兒島、大阪、北海道等,沿途會睇到好多靚景!例如第2日去嘅姬路城咁,係日本最具象徵意義、保留度最完整嘅城堡,被列為世界遺產之一;第6日去嘅兼六園,就係日本三大名園之一, 因兼具「六勝」嘅六種景觀意境,四季都有唔同嘅美景睇;而第8日夜晚搭車果陣,望出去會睇到函館山夜景,更加係世界三大夜景之一!

【成個日本我去晒】4萬蚊 豪華環島列車之旅 !

而除左景點值得睇,經過嘅車站都有細心安排。旅程途中會經過JR最南邊嘅車站,西大山站同枕崎站,以及最北邊嘅稚內站,即使唔係日本列車迷,相信都會好有成就感!

住五星級溫泉酒店

旅程收費唔平,不過住宿亦有看點嘅。由於旅客每日都搭列車去唔同地方,所以每晚嘅住宿都唔同,特登揀左當地出名嘅酒店。好似第2晚住嘅大和屋本店咁,係評價豪華五星嘅住宿,當中嘅溫泉係有3000年歷史嘅日本最古老溫泉!就算唔係溫泉旅館,好似北海道ANA稚內皇冠酒店、小樽Nord酒店、松島大觀莊度假酒店等,全部都係老牌靚酒店,所以有保證!

【成個日本我去晒】4萬蚊 豪華環島列車之旅 !

食足37餐 有得食車站便當

好多人去日本,都會特登試下唔同風味嘅車站便當。因為當地特產同食材嘅唔同,各地嘅便當口味都有分別㗎!呢個環島列車之旅,除左有當地特色食物提供,仲安排左唔同車站嘅「名物」— 就係車站便當喇!JR Tour就寫明有8餐係食車站便當,包括牛帆立便當、蠔飯、黑豚三味等,聽落都幾吸引!

【成個日本我去晒】4萬蚊 豪華環島列車之旅 !

13日12夜 最平盛惠55萬yen

成個環島列車之旅收費唔平。如果兩個人share一間房,盛惠55萬yen,即係約$38500港紙。如果想一個人住,就要比夠60萬yen,即係約$42000港紙。出發日期就只有兩日,分別係10月30日同11月30日,不過留意報名要提供日本地址喎。報名可以直接到全國的JR東海Tour報名,或打電話查詢:

ぷらっと旅・コールセンター

電話:0120-945-355/03-6860-1080

【成個日本我去晒】4萬蚊 豪華環島列車之旅 !

詳情:http://www.jrtours.co.jp/tokushu/daishuyu/

 

圖片來源: jrtours、大和屋本店、函館山纜車、仙台・宮城観光キャンペーン推進協議会