【岡山倉敷美觀區】- 體驗牛仔和服

我地六日廣島之旅有三日都去咗岡山縣玩 , 因為廣島地方唔大 ,為咗令我地嘅行程更充實所以就買咗5Day關西&廣島地區鐵路周遊券，周遊券可以5日內無限搭乘以下各站，Pass價錢係14000円，如果提早網上訂購就13000円 , 我地係廣島大部坐咗都係用依張Pass , 其實計返真係超級抵 !!!

今次就係去古色古香嘅倉敷美觀地區，除咗去行下睇下美觀地區嘅景色之外 , 今次重點係就去體驗著<牛仔和服> , 和服大家就著得多 , 但牛仔和服大家又試過未呢 ? 佢地嘅牛仔和服結合咗帆布同牛仔布嘅設計材質，將傳統嘅和服同西式嘅牛仔布嚟做合拼 , 夠晒特別呀~

▲ 由廣島駅坐去岡山駅大約45分鐘 , 都算幾快呀!!

▲ 倉敷著物小町有兩間 , 第一間總店就係近倉敷駅比較大間 , 第二間就係美觀地區方便行街 , 所以我地就預約咗美觀地區個間啦~

▲ 和服嘅Size要跟返身高 , 其實佢地款式唔多 , 但每件嘅牛仔布圖案都唔一樣㗎 !! 租借和服費用係女性3500円（不含稅）, 男性4500円（不含稅）, 如果情侶租借就6900円（不含稅）, 費用已包全套和服 , 襪 , 鞋 , 手袋 , 同保管更換嘅衣服或財物~

▲ 如果諗唔到點襯 , 有一個相簿可以做返個參考㗎 !!!

▲ 最後我揀咗深淺拼接嘅款 , 我地當時仲係著緊好多層嘅和服 , 如果浴衣就簡單好多(浴衣約6月中旬 – 9月中旬) , 和服大約著咗20分鐘 , 多層到我都數唔到啦 , 著咗和服連洗手間都去唔到呀 !!

▲ 著完和服當然要整返個日本髮型啦 , 髮型要另外加1200円（含稅） , 會連埋頭飾借比我地~

▲ 我地問咗店長點解會開牛仔和服店?! 店長話 : 因為倉敷非常出名牛仔布 , 美觀區附近景色非常優美好適合著和服 , 所以就將和服和牛仔布的原素合拼做成牛仔布和服 , 希望唔同國家嘅人都可以體驗到牛仔和服~

倉敷著物小町除咗租借和服之外仲有拍攝服務 , 攝影約60分鐘 , 攝影師會帶我地去係美觀區內影相 , 仲會介紹下美觀區嘅景點 , 有啲景點一般遊客一定搵唔到㗎，事關得我同Xindy 2個女仔完全影唔到2人照 , 又難得著和服當然想影多啲靚相啦 , 所以我地決定咗要搵一搵攝影師同我地影相啦 , 收費係2至4人 4,320円（含稅）, 仲有其它唔同人數嘅組合價錢 , 不過我都幾推薦大家可以預約攝影服務 , 因為美觀區風景真係好靚 , 難得可以一班人一齊影相又唔洗自已粗心影相角度同景點 , 同埋店長影啲相真係幾靚㗎 , 比幾張大家睇下啦 !!