之前有機會到名古屋出差當然把握時間出去獵食啦！來到名古屋大家都會推薦食某某店嘅雞翼、某某店嘅鰻魚飯，來來去去都係嗰幾間。小編就問咗真係來自名古屋嘅朋友S子，佢就推介我食呢間位於榮嘅本丸沾麵店！
▲喺日本版OpenRice（Tabelog）都有3.58分高分㗎！（平均3.5分以上叫高分）
呢間本丸沾麵店位於榮非常繁榮嘅區域，感覺就好似喺新宿歌舞伎町入面嘅小店一樣，附近四周圍都有好多大型酒吧同食肆，令佢感覺無咁起眼。
店內只有一張長型對牆嘅枱，得11個位，所以中午或者夜晚黃金時段嚟都唔排除要等位！
當晚我差唔多9點半先去到，都等咗大概5～10分鐘啦！不過等位前記得先點菜買飛先！
我哋被吸引嚟最大嘅原因係佢呢個雞肉柚子鹽味沾麵！平時食沾麵食魚介湯底，雖然好食但好似無咩新意，難得可以食下新口味、仲要聽落去勁小清新梗係要試下啦！
首先同大家介紹雞肉柚子鹽味沾麵（750Yen），首先呢個份量係普通，其實都幾夠食架～個湯入面除咗有雞肉仲有自家製雞肉丸子，全部都係細細粒，一啖咁嘅size。另外真係會夾到柚子，同埋會品嚐到湯入面柚子嘅香味，不過我哋去嗰日個湯入面胡椒略嫌落得有啲多，基本上每一啖都係胡椒味。留意返半熟蛋有另外加錢叫嘅～
呢度沾麵加大係免費，但食唔晒就要罰錢嘅～
反而我覺得更加令人驚喜嘅係呢個台灣拌麵（750Yen）！！大家千祈唔好以為點解我哋咁難得嚟到名古屋居然食台灣嘢，「台灣沾麵」其實係名古屋嘅名物嚟架！相傳30年前名古屋知名中華料理店「味仙」嘅郭老闆將台灣擔仔麵加入大量辣椒並命其為台灣拉麵，引起咗一陣風潮，而名古屋市內近400家店舖都開始提供呢種特色拉麵，所以成為咗呢到嘅名物。而家食到嘅都係經日本拉麵達人們精心研究同改良架！
而家名古屋嘅台灣拌麵最大嘅特色就係佢嘅料同醬汁，首先配料有辣肉燥、洋蔥、韭菜、蔥、海苔、大蒜、魚粉、生蛋黃等，同粗麵攪拌過後就可以食架啦！食咗大概1/3之後可以加入醋食，就會完全係另一種風味！
小編真係激推大家一定要落醋食，平時我都唔係特別好醋同韭菜，但唔知點解呢個拌面落醋完全係有畫龍點睛嘅感覺，非常開胃！放心，其實辣肉燥一啲都唔辣，反而加重口感！比起胡椒味偏重嘅沾麵，小編覺得呢個台灣拌麵做得更加好呢～
▲有齊多種調味料，大家可以根據喜好調教味道～
當然，呢度仲有普通嘅魚介湯底沾麵同拉麵，大家都可以根據喜好嘗試！麵質係非常彈牙，口感令人滿足！如果行開榮都真係幾推介大家嚟食㗎！
つけ麺本丸 栄店
地址：愛知県名古屋市中区栄3-8-33 サカイビル1F
電話：052-253-9500
營業時間：11:00〜24:00 年中無休
About Post Author
