【點解會好食到咁!? 】北海道「湯咖喱名店」試食報告!

【點解會好食到咁!? 】北海道「湯咖喱名店」試食報告!

日本咖哩飯就聽得多,湯咖哩又食過未?絕對唔係加水溝淡左個咖哩咁簡單!今日為大家介紹番札幌名物「湯咖哩スープカレー」!

 

喺札幌有好多賣湯咖哩嘅店,今日介紹嘅呢間湯咖哩店「路地裏カリィ侍」喺札幌擁有好高人氣,因為店內全使用北海道食材,真材實料,店主更用咗好多時間研究每一樣食材嘅煮法,務求每一啖都能令客人滿足!

 

【點解會好食到咁!? 】北海道「湯咖喱名店」試食報告!

半份雞半份豚角煮湯咖哩,人氣之選,啱哂兩種肉都想試既遊客!

當初點解會煮湯咖哩呢?

店主為咗想多啲人鍾意食北海道嘅蔬菜,所以搞盡腦汁,最後發現原來咖哩同蔬菜係非常咁夾,於是就開始煮湯咖哩喇!所以店嘅宗旨係「為咗食蔬菜而研發的湯咖哩」!唔係誇張,佢地嘅「一日20種野菜湯咖哩」係鎮店菜式,雖然餐單上都有其他肉類湯咖哩,但喺這間店反而變成配菜!

咁好味既秘密就係個湯底!

湯咖哩嘅湯底一啲都唔馬虎,首先加入大量北海道新鮮野菜煮足8個鐘,再加入豬骨同雞肉或者昆布同鏗魚煮12個鐘分別製作出「普通湯底」及「和風湯底」,最後再加入配方的咖哩製作成札幌名物「湯咖哩」!由於食材全天然,完全無加味精,所以就算飲哂成碗咖哩湯都唔會覺得口渴!

 

【點解會好食到咁!? 】北海道「湯咖喱名店」試食報告!

用北海道新鮮野菜煮嘅湯底,金黃色凝聚了蔬菜嘅甜味同精華!

 

仲有新鮮嘅蔬菜都係美味嘅秘密!

每一種蔬菜會用唔同嘅烹調方式去發揮出蔬菜最美味嘅味道,例如西蘭花就會將頂部燒焦一啲,紅蘿蔔會蒸煮,薯仔會先蒸再炸等等,務求令每一種蔬菜都係喺最好味嘅狀態下送到客人嘴裏!

 

值得一提嘅係店內使用嘅蔬菜全部都係直接向北海道農民購買,既可以實踐自給自足精神,又可以幫助農民!蔬菜係全有機無農藥之餘,每一箱蔬菜都灌注咗農民嘅愛,所以食落特別甜又爽脆!

 

【點解會好食到咁!? 】北海道「湯咖喱名店」試食報告!

由農家直接購入蔬菜,有品質保證!

除左名物「一日20種野菜湯咖哩」之外,普通嘅湯咖哩一般都有14種野菜,包括椰菜、茄子、蓮藕、牛蒡、南瓜等等……至於肉類,客人可以㨂雞肉(可㨂脆或唔脆)和豚角煮(即係五花腩),當然有時會有期間限定嘅款式如帶子湯咖哩、洋蔥圈湯咖哩,而且每間店都有唔同款式添!如果鍾意食某一種菜,仲可以俾錢追加!

 

【點解會好食到咁!? 】北海道「湯咖喱名店」試食報告!

脆皮雞湯咖哩配S的飯量,女仕都食得哂!

 

店內有固定餐單,但都要客人自己揀湯底同辣度,看似複雜其實好簡單!

STEP 1:㨂喜愛的湯咖哩

STEP 2:㨂湯嘅口味
有普通湯底、和風湯底、普通湯底加椰香、和風湯底加椰香可以選擇

STEP 3:㨂辣度
由0度到10度都有,0度係唔辣,10度係最辣

STEP 4:㨂飯量
無飯、SS(80g)、S(120g)、M(180g)、L(350g)、LL(500g)。

 

如果細食嘅人可以㨂少飯,少飯仲可以減錢!不過因為個湯咖哩撈飯係超級好味,所以唔怕食多碗飯!店內使用嘅係玄米加白米混合嘅飯,食落有啖啖榖物嘅香味!

店舖由2005年開業,由當初細細間舖頭做到北海道有6間店、東京有3間店、鎌倉有1間店,梗係有實力而且深受客人喜愛先可以屹立不倒啦!

 

【點解會好食到咁!? 】北海道「湯咖喱名店」試食報告!

其中一間分店嘅門口(さくら店 – 最近狸小路商店街,shopping完可以去醫肚)

 

【點解會好食到咁!? 】北海道「湯咖喱名店」試食報告!

店舖用不同咖哩既香料做裝飾,好有心思

 

【點解會好食到咁!? 】北海道「湯咖喱名店」試食報告!

如果食完想一再回味,可以買番盒即食咖哩番屋企自己煮。

去北海道或者東京既人一定要去試下!佢可能係你一生人食過最好食嘅湯咖哩!

 

路地裏カリィ侍
營業時間:11:30 – 15:30 、17:30 – 23:00
官網:http://samurai-curry.com/

 

北海道分店

  1. 路地裏カリィ侍.平岸店 (札幌市豊平区平岸3条3丁目2-3)

  2. 路地裏カリィ侍.西野店 (札幌市西区西野1条9丁目16-5)

  3. 路地裏カリィ侍.さくら店 (札幌市中央区南3条西6丁目1-3 ティアラ36 2F)

  4. 路地裏カリィ侍.北22条店 (札幌市北区北22条西4丁目2-20佐々木コーポ22 1階)

  5. 路地裏カリィ侍.函館店 (函館市日吉町3丁目2-1)

  6. 路地裏カリィ侍.北広島店 (北広島市大曲幸町3−7−6 三井アウトレットパーク1F)

 

東京分店

  1. 路地裏カリィ侍.下北沢店 (東京都世田谷区北沢3-31-14)

  2. 路地裏カリィ侍.神楽坂店 (東京都新宿区箪笥町27 吉田ビル1F)

  3. 路地裏カリィ侍. 吉祥寺店 (東京都武蔵野市吉祥寺本町2-27-2)

 

鎌倉分店

  1. 路地裏カリィ侍. 鎌倉店 (神奈川県鎌倉市小町2丁目6-26)

圖片、撰文:Ada Lau
Facebook
專頁:Adalaubaby 日本人的生活。旅遊。體驗