【香港人日記】香港時間 茶餐廳

【香港人日記】香港時間 茶餐廳

鍾意一個人,你會想見到佢,甚至擁有佢;

鍾意一個地方,你會想成日去,甚至搬過去,就係咁簡單。

今日我地嘅主角係一位八十後香港人Victor,嚟咗日本五年,而家係東京一間茶餐廳嘅老闆。

 

「點解去日本?因為鍾意日本囉!」

【香港人日記】香港時間 茶餐廳

30歲人先去日本學日文,老實講,有啲遲。

「我以前做酒店,做到一個位覺得再留係香港都冇咩發展,就想出去闖吓。」

世界咁大,點解偏偏要揀日本呢?近來興去韓國喔?

「點解去日本…因為鍾意日本囉!

日本人有秩序;家庭電器、汽車等等都好吸引,好想知點解佢地可以做得咁好…

同埋我鍾意日本車!」就係因為咁簡單嘅理由,Victor嚟到東京,學咗2年日文,娶埋個日本人老婆,生埋小朋友,仲做埋茶餐廳老闆㖭。

 

「逐間餐廳拍門,可唔可以過兩招我?」

【香港人日記】香港時間 茶餐廳

做得老闆,煮嘢洗碗樣樣親力親為,以為一定有返幾吓料理底子。

點知原來Victor冇煮嘢食底亦冇接觸過餐廳行業,佢話:「其實我咩都唔識㗎…」

喺日本讀書期間,Victor已經萌生咗想喺日本開茶餐廳嘅諗法,

原因一樣好簡單:「因為日本冇囉!」

畢業後返香港逐間逐間餐廳拍門,最後去到一間佐敦嘅麵包店,佢話:

「如果我唔收人工幫你地打工,你可唔可以過兩招比我?」

當時老闆好好人答應咗佢,佢就一路做嘢一做偷師,「其實都係偷睇佢點整㗎咋,返嚟自己慢慢鑽研囉!」

喺日本教Victor煮嘢嘅雲姐大讚:「佢好謙虛,好肯學。佢而家拉出嚟嘅奶茶,其實仲好飲過香港嘅茶餐廳㖭。」小編一飲,香濃幼滑,果然堅係好飲(笑)

 

「蛋撻、奶茶依啲咁好嘅嘢,要多啲人知。」

【香港人日記】香港時間 茶餐廳

明明咩都唔識,點解仲要膽粗粗開業餐廳?

Victor笑笑口話:「蛋撻、奶茶依啲咁好嘅嘢,要比多啲人知!」

最開心、最感動係,有次有一個客去飲奶茶,個客覺得好好飲,

一個月之後個客又返去搵Victor,話「因為飲咗依到嘅奶茶,對香港好有興趣,所以我去咗香港!」原來推廣到自己家鄉嘅文化,係咁開心。

 

「始終香港土生土長,會覺得(日本)唔係屬於自己。」

【香港人日記】香港時間 茶餐廳

就算幾鍾意一樣嘢,都好難盲目到覺得佢所有嘢都係好。

Victor投訴:「最唔慣就係喺日本踏火車冇得講電話。」小編深感認同。

佢話,「喺外國生活就要跟返外國嘅規距,外國人會覺得唔係屬於自己嘅感覺」。

「始終香港土生土長,(日本)唔會好似香港咁親切,香港咁舒服。」

農曆新年日本冇假放,Victor要開工,「依段時間就最掛住香港。」

所以每次返去佢都一定要見屋企人,「仲有就係食白灼蝦同牛丸!」

 

【香港人日記】香港時間 茶餐廳

Victor嘅茶餐廳叫香港時間(記住逢星期二、三、四都唔開㗎><),

閒來好多日本人香港迷去食蛋撻、飲奶茶,亦都有唔少香港人去打牙骹。

Mika私人推介你飲奶茶同食豆腐花,包你一去再去啊。

啊…而家講起我都有少少想去(笑)