京都 宇治一日遊 交通+行程 懶人包

京都 宇治一日遊 交通+行程 懶人包

京都宇治 京都市vs宇治市

成日話「京都宇治」「京都宇治」,其實京都市同宇治市係兩個獨立唔同嘅市,不過兩個地方都同樣屬於京都府咁解~由於宇治市距離京都市好近,30分鐘車程都唔洗,所以去京都玩幾日嘅朋友,不妨去埋宇治一日遊!

 

一日遊行程推介:                        

京都站(京阪電鐵)→ 宇治站 → 世界文化遺產宇治上神社 → 朝霧橋 → 平等院表參道 → 京都特色Starbucks → 世界文化遺產平等院 → 宇治橋通商店街 → 中村藤吉本店 → 宇治橋 → 宇治站(JR)

 

宇治景點逐個數

講起宇治,香港人可能淨係講得出抹茶,就好似日本人講起香港,淨係諗到成龍一樣(哭)

其實宇治除咗有好多抹茶老店(例如分店開到去尖沙咀嘅「中村藤吉」)之外,仲有兩個世界文化遺產同埋好多打卡靚景㗎!

 

京都 宇治一日遊 交通+行程 懶人包

京都 宇治一日遊 交通+行程 懶人包

日本最古老神社  宇治上神社

世界文化遺產宇治上神社創建於平安時代,係全日本最古老嘅神社,神社入面嘅「國寶」本殿同拜殿都保存得非常完整。神社外樹木環繞而生,相傳其中一棵神木更加係已經屹立咗300幾年咁耐!其實宇治上神社離宇治JR站只有8分路路程,但就依到嘅氣氛就好莊嚴古樸,成個神社好似靜咗音咁。比起熙來攘往嘅清水寺,依到嘅觀光客可能只有小貓三四隻,但就畀到人更加平靜,更加接近到神明嘅感覺。

 

京都 宇治一日遊 交通+行程 懶人包

順帶一提,神社內有個「桐原泉」,係宇治古傳嘅七大名泉之一,更加係唯一一個仲未乾涸嘅七大名泉。大家可以落古泉到洗洗手,不過小編就建議大家唔好飲啦,因為我洗手時見到泉水入面有好多「水較剪」等等小昆蟲係到say hi啊ww

 

京都 宇治一日遊 交通+行程 懶人包

打卡靚位 朝霧橋                        

朝霧橋係連絡宇治兩大世界遺產-宇治上神社同平等院嘅主要橋樑,從宇治上神社沿路落去就會見到宇治神社,行返出大街就會見到依條充滿住京都色彩嘅朝霧橋㗎啦~橙紅色嘅朝霧橋同藍綠色嘅宇治河相映成趣,唔少觀光客都會係橋上影相打卡㗎!朝霧橋亦都係欣賞宇治埋瑰麗山色嘅「觀景台」,嚟緊秋天去嘅話,仲可以見到漫山紅葉㖭~

 

京都 宇治一日遊 交通+行程 懶人包

宇治首間Starbucks 與古樸街景融為一體

座落於平等院表參道嘅Starbucks,係宇治第一間Starbucks嚟㗎~為咗令店舖同街景融為一體,設計師特別將屋頂設計成人字型咁,好有舊時嘅日本民屋feel。店外又有個小庭園,大家可以一路係庭園散步一路飲嘢;亦可以喺店內超大型落地玻璃內,一邊嘆住咖啡同冷氣,一邊欣賞庭園嘅景色,好寫意啊~

 

京都 宇治一日遊 交通+行程 懶人包

京都 宇治一日遊 交通+行程 懶人包

十円上的平等院

平等院係建於大約一千年前嘅佛寺(係啊唔係神社啊!),唔少人相信依到象徵住古代日本人對佛教極樂世界嘅嚮往~平等院入面最重要嘅建築物就係「阿彌陀堂」,由於阿彌陀堂外形好似隻想飛想飛嘅雀仔咁,屋頂上又有2隻象徵尊貴嘅金銅鳳凰像,所以阿彌陀堂去到江戶時代就被稱為「鳳凰堂」,後來鳳凰堂個樣仲印埋落十円銀仔上面㖭!

 

京都 宇治一日遊 交通+行程 懶人包

京都 宇治一日遊 交通+行程 懶人包

抹茶店始祖 中村藤吉本店

分店由日本殺到嚟香港,我諗大家對抹茶店「中村藤吉」都唔陌生。中村藤吉創立於1854年,可以話係老字號中嘅老字號,所以每日都有好多抹茶迷嚟到宇治橋通商店街嘅中村藤吉本店朝聖㗎!因為其在太多太多人慕名而來,所以就算係平日下午嚟都經常要等2、3個鐘先有得入去食,好彩可以一路買住各種抹茶手信一路等~如果唔想等咁耐的話,可以去另一間平等院表參道分店到踫踫運氣,但都有心理準備排1個鐘以上…><雖然要等好耐,不過小編食過咁多間京都抹茶店,都係覺得中村藤吉嘅抹茶最香濃,抹茶啫喱最滑劣劣最有茶香,所以都好開心可以食到本店出品嘅抹茶嘢^^

 

京都 宇治一日遊 交通+行程 懶人包

交通小貼士:

最後可能有人會問,點解我會揀由京阪電鐵去,但係搭JR走呢?因為咁係最慳水慳力,唔洗行冤枉路囉~(宇治上神社近京阪電鐵站,但中村藤吉本店就近JR站~)當然大家都可以配合自己行程需要,揀買京都觀光一日券(500円),又或者來回都坐JR奈良線(來回480円),慳返啲車錢w

不過小編就建議住係京都站嘅朋友唔好買京都觀光一日券,因為依張劵只適用於京阪電鐵,如果要由京都站去其他京阪電鐵站,點都要搭一程JR/巴士,就不如直接由JR京都站搭奈良線去宇治站,仲平過買一日劵㗎!

 

平等院

京都府宇治市宇治蓮華116

 

宇治上神社

京都府宇治市宇治山田59

 

Starbucks 平等院表參道店

京都府宇治市宇治蓮華21 18

 

中村藤吉本店

京都府宇治市宇治壱番10番地