[胃食日本]帶你去新開築地魚河岸食海鮮~

 
雖然築地魚市場搬去豊洲嘅計劃仲未完成,
但為咗搬完之後原址可以繼承築地嘅生氣同熱鬧,
2016年11月19日喺東京中央區就開咗全新嘅築地魚河岸~
入面有各種海產、海鮮店同蔬果店等,大約60間店鋪。

今日就帶大家去入面睇下有咩買有咩食啦!
 
其實新開嘅築地魚河岸分成兩棟(小田原橋棟同海幸橋棟),
睇大家係邊條街入嚟,其實三樓有個天橋係通嘅。
 
今日我哋去咗正門小田原橋棟~
 
1樓係可以俾人買海鮮等等嘅魚市場;
2樓係貨倉,只準有關人士或工作人員進入;
屋頂就有屋頂廣場,間唔中會舉行一啲特別活動。
至於小田原橋棟嘅3樓就會有FOOD COURT(魚河岸食堂)可以俾大家去食嘢㗎~

 
1樓嘅海鮮例如有:
鮑魚
生蠔
海膽
蟹腳
鮪魚
 
以上喺1樓魚市場買嘅海鮮都可以買上3樓食㗎
 
好似片入面都有介紹,
以上喺1樓魚市場買嘅海鮮都可以買上3樓食!
除咗可以食自己買嘅新鮮魚生外,
呢度仲有海鮮、中菜、咖喱、炸物、Cafe等5種唔同風格嘅餐廳可以醫肚㗎。
 
雖然築地嘅場外市場暫時都唔會搬,
不過呢度都俾咗啲新嘅選擇大家,
而且冬天、夏天、或者落雨嘅時候都叫有瓦遮頭,
同埋有得坐低食嘛!
下次嚟開可以行埋呢邊呢~
(海幸橋棟入口)
 
營業時間:
1樓   5AM-3PM
3樓   7AM-2PM
留意!!雖然以上時間寫住由5AM開到3PM,
不過其實早上5點直到9點都係畀飲食店嘅相關工作人員採購或入貨用,所以一般遊客係唔可以入去住㗎!
想入去就要等到早上9點之後先可以入去嘅~
3樓嘅魚河岸食堂都係開放到下午2點㗎咋!
 
另外注意返,星期日及公眾假期、同埋某些指定嘅星期三都係休市日,盡量避免呢啲日子去喇!