《胃食島根》:肥美肉厚蟹膏香濃 日本抵食原隻松葉蟹!

島根縣係喺日本中國地方嘅沿海地區,所以佢哋嘅海鮮都非常新鮮又好食。喺冬天,時令嘅魚就更加有油份非常美味。而除咗最出名嘅蜆仔之外,蟹亦都係人氣海鮮之一其中松葉蟹同紅蟹就最有人氣,今次胃食島根就同帶大家去到島根松江嘅「かに小屋」(蟹小屋),食又平又大又新鮮嘅海鮮啦!

「かに小屋」(蟹小屋)距離JR松江站行大約15分鐘,自駕遊嘅朋友亦都可以用依到嘅停車場~

 

店內用日本傳統BBQ風格裝修,大約可以坐到100個人,坐位全部係用膠集裝箱做櫈仔同埋細細個爐仔,好有氣氛㗎!

餐廳係用自助型式,首先去揀自己想食嘅海鮮,之後再拎去俾錢就可以燒㗎啦!

價錢方面非常便宜,原隻紅蟹大概¥1500至¥2500,松葉蟹就¥2500至¥3900左右,其他海鮮例如帆立貝,鮑魚同蝦等等只需要¥200就可以食到啦~(價格會根據不同情況有所變動)今次我就揀咗1隻松葉蟹,2隻帆立貝,2隻鮑魚,2隻蝦,加埋都只係¥4500,好抵!

頭先話過依到係自助型式,所以連拆蟹,都係自己搞…笑

佢哋會有個教學教你點樣續步續步拆,不過如果睇完都係唔係好識,又或者懶得拆,就可以叫職員幫你拆,仲會幫你推埋啲肉出黎,所以唔識睇日文嘅人都唔洗擔心㗎!

依到有熟嘅蟹同生嘅蟹可以揀,熟嘅松葉蟹都有煮過,所以可以再燒嚟食,又或者就咁食都可以。熟嘅蟹只要輕輕咁燒到外殻乾,生嘅蟹燒到外殻變紅色就可以食得㗎啦~松葉蟹啖啖肉,好鮮甜,一個人完全可以食哂成隻!另外就當然要食佢個蟹膏啦〜平時唔太好蟹膏嘅我都覺得好好食,夠哂濃郁又鮮甜,再配埋蟹腳一齊食真係太幸福啦!聽當地人話,食到咁上下可以淨返少少蟹膏,再加上日本酒再燒嚟食會有另一番風味,有興趣嘅大家都可以試下㗎!

其他海鮮亦都唔執輸,蝦夠哂大隻鮮甜,鮑魚同帆立貝如果覺得唔夠味嘅人可以加自己想落嘅調味料,更加有風味㗎~

「かに小屋」(蟹小屋)係一年一度嘅期間限定店,今年由1月19日開到4月22日,如果想食又平又正嘅蟹,記得要快啲去啦!

——————————-

かに小屋(蟹小屋)
地址:松江港管理所1階(松江市東朝日町150-7)
營業時間:11:00〜22:00
電話:090-4100-6942

最新消息可以留意以下網站:

かに小屋(蟹小屋)的Facebook↓
https://www.likejapan.com/shimane01sitekaniofficialfb

かに小屋(蟹小屋)的官方網站↓
https://www.kankou-matsue.jp/event_calendar/events/201801-12/201801/kanigoya2018.html

かに小屋(蟹小屋)特集↓
http://www.kankou-shimane.com/mag/6948.html

——————————-

食完美食,就緊係要睇埋靚景啦!大家可以去距離かに小屋只有1分鐘嘅「宍道湖旅游船 白鳥號」,一邊坐船一邊欣賞唔同角度嘅宍道湖好出名嘅日落~

有好多嘅照相發燒友,同觀光客都為咗睇佢哋嘅美景,而專程去到宍道湖㗎!一望無際嘅湖景再加上橙黃色嘅日落,真係超靚!

坐船全程大約係1個小時左右,價錢為大人¥1450,小朋友¥720,外國旅客出示護照,大人可以特價¥1000,小朋友¥500就可以坐!

要留意返白鳥號12月至2月只會開星期六日同公眾假期,平日就只接受10人以上嘅預約㗎咋。

——————————-

白鳥観光有限会社
地址:〒690-0001 島根県松江市東朝日町150-7
電話:0852-24-3218

想知更多詳程可以參考返佢哋嘅官網↓
http://hakuchougo.jp/

——————————-

想知道更多島根縣嘅資訊,可以留意埋下面島根縣嘅Facebook↓

Visit Shimane – 日本島根 (島根縣香港官方Facebook)↓
https://www.facebook.com/visit.shimane.japan/

Discover Shimane (島根縣英文官方Facebook)↓
https://www.facebook.com/discover.shimane/

仲可以Follow埋島根縣的IG ↓
https://www.instagram.com/discover.shimane/