《胃食島根》:島根日本農園遊玩 $130大粒士多啤梨任摘放題

去日本旅行相信有好多人都會喪買當地生果食。特別係日本出產嘅生果,又甜、多汁又美味,而新鮮摘返嚟嘅生果就當然係最好食啦!

胃食島根今次拜訪位於島根嘅溫室農園「ベリーネ」,帶大家一邊摘一邊食又甜又大粒嘅新鮮士多啤梨啦!

溫室農園「ベリーネ」係一個被大自然包圍嘅溫室農園。而農園內嘅士多啤梨園每年大約會由12月或1月至5月下旬開放,而葡萄園就大約由8月下旬到9月下旬至10月初左右開放~種有好多不同品種的士多啤梨例如「章姫」、「紅ほっぺ」等等,每個品種都有獨特的味道同埋質感。

今次要介紹嘅係佢哋嘅溫室士多啤梨園,價錢方面都真係良心價格。平日只要1700Yen(連稅)就可以任摘放題50分鐘(要預約),就算係星期六、日及公眾假期,都只係收1900Yen(連稅)。女士們如果星期三去仲可以以優惠價1300Yen(連稅)入場任摘任食添!

不過場內摘完嘅士多啤梨係「只限堂食」,係唔可以帶走嘅,大家要留意啦! 如果想買手信的話,農園已經準備好最新鮮嘅士多啤梨擺係接待處的小店俾大家當手信買返去食!

詳細收費如下(入園時間為50分鐘):

平日 :
大人(中學生或以上)1700Yen(連稅) 
小童 (小學生)1300Yen(連稅)
幼兒(3歲或以上)500Yen(連稅)

星期三 :
女士、小童(小學生)1300Yen(連稅)
幼兒(3歲或以上)500Yen(連稅)

星期六、日及公眾假期:
大人(中學生或以上)1900Yen (連稅)
小童(小學生) 1500Yen (連稅)
幼兒(3歲或以上)700Yen(連稅)
※3歲以下小孩免費

詳細價格資料以及最新嘅預約狀況可以直接於官網查詢:按我

園內有多種士多啤梨可供採摘(會因氣候或収穫量而會有所改變),上次我去嘅時候就有紅ほっぺ(紅臉頰)同あきひめ(章姫)嘅品種,兩種都各有特色同味道,好似依個叫あきひめ(章姫)嘅品種,雖然就咁睇佢個頂係白色好似未熟咁,但聽職員話依個品種就算個頂係白色都其實都已經係完熟,就咁摘嚟食都已經係又甜又多汁㗎啦,而紅ほっぺ(紅臉頰)亦都夠哂大粒夠紅,甜中帶少少酸非常好食!

あきひめ(章姫)

紅ほっぺ(紅臉頰)

——————————

摘完新鮮士多啤梨仲可以去農園隔離依間BERRYNE Cafe食野同休息。

Cafe除咗有各種熟食同士多啤梨小手信供應外,士多啤梨甜品同果汁更加全部都係用「ベリーネ」嘅新鮮士多啤梨製作,就好似依個士多啤梨芭菲(800Yen)咁,上面啲士多啤梨多到幾乎滿瀉,士多啤梨粒粒都超甜就自然唔使再多講啦,而雪糕就更加係超濃郁嘅牛奶雪糕,再加埋下面嘅栗米片同果醬等等互相完美配合,真係一試難忘㗎!

 

另外依個鮮榨士多啤梨汁(500Yen),因為士多啤梨本身已經好甜,所以就算唔加糖都好夠甜,非常好飲又清新!

有得摘有得食新鮮士多啤梨,士多啤梨控真係唔嚟玩唔得啊~

 

きんた農園ベリーネ
地址:島根県浜田市金城町七条イ735番地
營業時間:10:00~16:00
逢星期二休息
預約電話:0855-42-2515

 

BERRYNE CAFE
營業時間:11:00~17:00
Lunch 11:00 – 14:30(L.O.14:00)
Sweets 11:00 – 17:00(L.O.16:30)
逢星期一、二休息
※根據季節會有可能變動

官網:按我

——————————

KANAGI WESTERN RIDING PARK

如果想更進一步接觸大自然,大家亦可以去離「ベリーネ」10分鐘車程嘅KANAGI WESTERN RIDING PARK~喺依個牧場大家可以同馬來一個近距離接觸,只需要3000Yen就可以騎馬喺園中散步(留意參加者身高必須為130cm以上),小朋友的話就要1000Yen(5分鐘)可以喺專業訓練員陪同下騎馬仔(留意參加者身高必須為100cm以上),安心又安全! 天氣好嘅時候坐住馬仔吹吹風,好舒服㗎~  另外仲可以近距離餵紅蘿白俾馬仔添,收費都係100Yen!


另外WESTERN RIDING PARK內仲有可以食到份量十足嘅燒肉或涮涮鍋放題等等嘅餐廳,仲有其他例如用長時間炆煮嘅燉牛舌,軟綿綿嘅芝士蛋包飯等等都非常推薦㗎!


WESTERN RIDING PARK大人細路都啱玩~有興趣嘅朋友記得要去玩啦~

KANAGI WESTERN RIDING PARK
地址:島根県浜田市金城町久佐イ1390‐8
餐廳營業時間:10:00~21:00
騎馬活動營業時間:10:00~17:00
逢星期一休息(星期一係公眾假期嘅話就會翌日休息)
官網:按我

 

——————————-

想知道更多島根縣嘅資訊,可以留意埋下面島根縣嘅Facebook↓

Visit Shimane – 日本島根 (島根縣香港官方Facebook)↓
https://www.facebook.com/visit.shimane.japan/

Discover Shimane (島根縣英文官方Facebook)↓
https://www.facebook.com/discover.shimane/

仲可以Follow埋島根縣的IG ↓
https://www.instagram.com/discover.shimane/