神木隆之介 天才童星進化史

神木隆之介 天才童星進化史

講起神木隆之介,可能唔少香港人對佢嘅印象都係佢為舊年紅足大半年嘅《你的名字。》男主角配音。不過有睇開日劇嘅一定對佢唔會陌生,分分鐘真心睇住佢大添呀!1993年5月19日出生於埼玉縣,神木因出世後體弱多病所以被呵護著長大。而佢兩歲嘅時候就已經以童星身份拍攝第一條電視廣告,正式出道啦!

其後佢一直以童星身份拍攝影視作品,為人知嘅包括長瀨智也及竹內結子主演嘅《巨星夫婿》。飾演竹內結子姐姐的兒子新井努嘅神木當年得8歲咋!

神木隆之介 天才童星進化史

12歲嘅時候,佢主演三池崇史監督、斥資13億日元製作嘅電影《妖怪大作戰》,並因此獲得日本電影金像獎優秀新人獎,年紀細細演技已備受肯定。2007年佢首次擔正主演《偵探學園Q》,與一樣為實力派童星嘅志田未來及Hey!Say!JUMP嘅山田涼介公演。

神木隆之介 天才童星進化史

除了一路keep住拍日劇,神木最廣為人知嘅係佢為多套經典動畫電影配音,當中不乏大師級作品,例如宮崎駿嘅《千與千尋》、《哈爾移動城堡》、《借物少女艾莉緹》;細田守嘅《夏日大作戰》;另外仲有《琴之森》、《對某飛行員的追憶》、以及舊年新海誠嘅《你的名字。》。因為佢配過嘅作品都得到非常好嘅口碑及評價,所以更加有都市傳說指搵佢配音套電影一定紅添!

近年來佢亦拍攝過多套電影,當中不乏漫畫改編作品,例如《浪客劍心》系列、《要聽神明的話》、《爆漫。》、《三月的獅子》以及今年嘅《JoJo的奇妙冒險 不滅鑽石第一章》。雖然佢未必每套都係主角,但佢嘅表現往往有令人眼前一亮嘅效果,亦會同主角發揮出相輔相成嘅戲劇效果。


^同佐藤健嘅武打戲分令人印象深刻

24歲已經有咁精彩嘅履歷,真係令人更加期待佢以後嘅發展呢!喺日本國民心目中原本係國民弟弟嘅佢亦都逐漸步入成為男人嘅階段,唔知佢嘅感情生活…係咪真係同緊佐野雛子一齊呢?(雖然好多人都覺得佢係屬於志田未來嘅XD)點都好,希望神木隆之介繼續帶精彩嘅作品畀我哋啦!:D

5月19日,神木隆之介生日快樂!