USJ的fans要留意！環球影城將於2018年推出全新夜間遊行表演，除咗花車同全長587米嘅遊行路線，今次仲玩埋最新投射及音響技術，將影像直接投射到建築物上！夜間巡遊投資超過70億日元，結合《哈利波特》、《Minions》、《變形金剛》同《侏羅紀公園》4套熱門電影，重現唔同主題嘅世界觀，相信表演一定會好精彩！
環球影城最新宣布2018年推出全新夜間遊行表演，Universal Spectacle Night Parade～Best of Hollywood。據官方講法，呢個夜間巡遊係「顛覆過去遊行常識嘅作品」，因為將舞台不再限於花車及工作人員嘅表演，而係延伸至建築物上，令表演變得更豐富及多元化！
而呢個巡遊即將成為常設夜間遊行，以4套熱門電影為主題，包括《哈利波特》嘅神秘魔法世界、可愛嘅迷你兵團《Minions》、《變形金剛》嘅科幻對決，以及《侏羅紀公園》嘅驚險之旅。同一個遊行，可以睇曬4個唔同嘅世界觀，稱得上陣容十分強大！
而為咗營造出精彩嘅電影效果，今次遊行將重點放於投影與燈光上，使用高科技照明特效及經典電影配樂。環球影城指，新投影技術有別於普通嘅影像投影，可以將電影場景直接覆蓋建築物，營造出獨有嘅劇場效果。平時睇遊行，只會focus喺花車同表演者身上，今次就可以落足眼力，睇下周圍嘅建築物喇！
圖片來源：USJ Japan
About Post Author
