爭鮮價錢日本國產級數!博多「超平激新鮮」自助壽司!

日本有好多地方都可以食到平價壽司,但如果想平之餘仲要夠新鮮,咁就一定要去位於博多嘅「博多豊一」!由於喺正福岡中心地帶,所以交通都好方便,由天神駕車前往都只需10分鐘左右,就會到達「Bayside Place博多港」。

 

走入去灣岸市場就會見到林林總總售賣魚類、肉類、蔬菜等等唔同嘅攤檔。

 

而今次嘅目標「博多豊一」就係位於市場嘅其中一角。

 

遠遠見到咁多壽司就知今次大穫啦!一定會買勁多!

 

呢度嘅食材全部都係由長濱市場日日新鮮直送,平日大概有20款以上嘅壽司可以揀,週末嘅種類就更多,最重要係所有款式都係¥97,想食多幾款記得揀週末過嚟!

 

睇定想要啲乜,就可以攞個兜同夾開始夾!識食一定係食三文魚籽、海膽同中拖羅,包你一邊食一邊不停講真係好抵!

 

夾完之後就可以畀counter嘅工作人員點一點數,工作人員就會畀張mark咗壽司件數嘅單客人。如果係想拎走食,就可以直接拎張單去畀錢,但如果想食堂食,就可以食完先去畀錢埋單。

 

除咗抵食真係唔知講咩好!成隻手掌咁長嘅海鰻竟然都只係¥97!呢一兜有三文魚籽又有海膽嘅壽司都只係¥970,你話喺香港以呢個價錢又點可能食得到呢種質素!

 

必試6大推介!

1. 會咇魚油嘅拖羅軍艦

2. 紅魽拖羅

 

3. 食完一粒想再encore嘅海鰻壽司

 

4. 三文魚籽軍艦

 

5. 福岡名物鯖魚刺身

 

6. 鮟鱇魚肝壽司

 

作為遊客,比較推薦大家坐低慢慢食,店內嘅位置都幾舒服。博多豊一嘅營業時間為早上10點至晚上8點。

 

除咗自己夾壽司,店內其實亦有提供唔同料理同海鮮丼,所以如果想試多幾款唔同美食,不妨叫幾道menu同朋友一齊share,再出去夾返幾粒壽司,咁就可以樣樣都試吓啦~

 

博多豊一 ベイサイドプレイス博多
地址:福岡県福岡市博多区築港本町13-6
電話:092-262-2425
營業時間:約10:00~20:00

 

 

資料來源:gurunav