土壤肥沃嘅福島出產唔少頂級農產品,喺當地即摘即食的話,當然就更加美味啦~唔講唔知,由東京坐新幹線去福島只係需要個半鐘就到,非常方便~今次介紹3種福島嘅超人氣摘蔬果活動同美食畀大家,飛開東京的話,不妨去埋福島玩啦!

 

溫室內任摘任食 激甜士多啤梨 水果天堂 Fruits Land北會津

Fruits Land北會津可以話係一個摘水果嘅天堂!一年四季之中,大家可以喺依到摘到最新鮮嘅士多啤梨、車厘子、蜜瓜、桃、提子、梨、蘋果等等~小編今次參加咗由1月至5月先有嘅30分鐘士多啤梨任摘任食放題,因為所有士多啤梨都係種喺室內嘅溫室,所以就算下雨天都一樣有得摘~

------------------------------

2大士多啤梨品種 SACHINOKA VS 紅臉頰

今次當造嘅士多啤梨有SACHINOKA同紅臉頰2款~SACHINOKA一粒大約重10~20g左右,比普通日本士多啤梨大粒~圓錐形嘅外表、厚實嘅果肉同獨特嘅香氣,都係SACHINOKA嘅特色嚟㗎~~紅臉頰士多啤梨嘅果皮同果肉一樣呈鮮紅色,因為甜度有成12、13度咁高,所以經常會畀人拎嚟做甜品同果醬等等重甜味嘅食物~喺Fruits Land北會津入面嘅觀光園久ちゃん溫室入面,大家可以喺30分鐘內盡情享用SACHINOKA同紅臉頰2款士多啤梨,即摘即食士多啤梨嘅香甜程度真係冇得頂啊!

------------------------------

観光園久ちゃん(個人參加無需事先預約,但有可能因為天氣等不穩定因素臨時休園,請事先致電確認)
地址:福島県会津若松市北会津町真宮西面7
營業時間:10:00~15:00
價錢:
開園日至3月31日:1500円
4月1日至5月10日:1200円
5月11日起:960円
電話:0242-23-9810
手機:090-8614-2945
優惠券:http://www.aizufruit-l.com/strawberry_ticket.html

------------------------------

フルーツランド北会津
地址:福島県会津若松市北会津町下荒井字宮東531-4

------------------------------

Wonder Farm 800円帶走9種即摘蕃茄

唔知係咪同瘦身美容有關,近年愈來愈多人變晒做蕃茄控,嚟磐城市嘅Wonder Farm就啱晒啦~因為舊年秋天天氣唔好,搞到日本近幾個月菜價貴過肉價,但喺依到只需800円就可以任摘新鮮蕃茄,裝滿成袋拎返屋企慢慢食,真係抵到爛啊!Wonder Farm入面嘅IWAKI Farm其實係一個足足有2.5公頃大嘅先進溫室,館內所有蕃茄都唔係用泥土,而係用椰子殼磨成粉栽種嘅~老闆話用椰子殼種嘅蕃茄會比一般蕃茄吸收到更多營養,又唔會有蟲嚟咬,一舉兩得,唔怪之館內9種唔同品種嘅蕃茄都又甜又多汁啦~~

------------------------------

Wonder Farm 摘蕃茄體驗
地址:福島県いわき市四倉町中島広町1
營業日:週末及公眾假期
摘蕃茄入場時間:10:00、11:00、13:00、14:00、15:00
價錢:800円

------------------------------

Wonder Farm 蕃茄主題ShopXCafe

摘完蕃茄唔好心急走人住,記得去埋同Wonder Farm入面嘅「森之市場」買手信啊~依到除咗有大量Wonder Farm溫室出品嘅蕃茄之外,仲有好多各式各樣嘅蕃茄製品,例如蕃茄汁、番茄泡菜等等。森之市場入面仲有個迷你cafe,大家可以喺到慢慢嘆返枝蕃茄雪糕,再食埋件蕃茄蛋糕先走~小編覺得雪糕同蛋糕嘅茄味唔算太濃,幾清新開胃,啱晒小編胃口啊!

------------------------------

Wonder Farm
地址:福島県いわき市四倉町中島広町1
營業時間(商店):
12月~3月 10:00~17:00  
4月~11月 10:00~18:00  

------------------------------

雪地蔬菜糖分高

雪?你冇睇錯啊!啲椰菜真係埋晒喺1米深嘅積雪下面!以前科技唔發達,仲未有雪櫃嘅時候,大家就會將啲蔬菜放喺雪地到保鮮。但原來將蔬菜放喺雪地,除咗保鮮之外仲有一個好處,就係提升蔬菜嘅甜度啦!因為喺雪地入面嘅蔬菜好凍好凍,椰菜內部會製造多咗糖份出嚟,令佢地嘅甜度比一般蔬菜高好多~福島豬苗代嘅雪地椰菜實在太甜,唔可以用嚟製作餃子等等咸嘅料理,但因為糖份夠高,所以就咁當沙律菜食已經非常好味!

 

極罕見 雪地拔椰菜體驗

為咗令大家都食到依種咁甜嘅椰菜,豬苗代嘅農民會將椰菜放喺雪地兩個月,等椰菜嘅糖份逼晒出嚟!參加收割體驗時雖然覺得非常之凍,啲雪又重,雞手鴨腳地搞咗一輪先成功拔起棵巨型椰菜(小編身邊嘅壯男們三兩吓手勢就拔好一棵!),不過成個過程真係非常歡樂同好玩!收割好之後,跟住工作人員去到賣場,大家就可以瘋狂地食到依啲雪地椰菜啦(小心食得太飽!)~原來椰菜係可以咁香、咁甜、咁多汁、咁好食嘅!唔夠皮嘅話,依到仲有大量雪地椰菜發售,只要用報紙包好,仲可以帶返屋企放成個月咁耐㖭!

------------------------------

花雅
地址:福島県耶麻郡猪苗代町大字川桁字元幸野12
價錢:1000円

------------------------------

入口即融頂級燒肉 牛豐

除咗摘蔬果體驗之外,福島嘅和牛都好出名㗎!跟據2016年統計,「福島牛」嘅飼養量排行日本47都道府縣當中嘅第12名,係日本國內幾受歡迎嘅和牛嚟㗎!小編去咗由日本全國農業協會組合福島縣本部(JA全農福島)開嘅燒肉店「牛豐朝日店」試試佢個「牛豐燒肉午市套餐」(1680円),套餐包咗福島牛肋肉、福島牛大脾肉、煌牛肋肉、麓山高原豬肉五花腩,仲有沙律吧放題,好抵食!霜降和牛嘅油脂分佈好平均,入口即融,超級柔軟,一啲都唔膩!麓山高原豬係用特別嘅専用飼料餵飼,肉質彈牙,非常好味~可能有人會對福島肉類嘅安全問題有疑問,但係其實牛豐所採用嘅福島牛、煌牛等等,從飼料去到牛肉,都必須接受嚴格嘅放射性物質檢查,確保對人體無害,大家可以安心食用~~~

------------------------------
牛豊 朝日店
地址:福島県郡山市朝日二丁目3-34
午餐營業時間:
星期一至星期五 11:00~14:00
周末及公眾假期 11:00~14:30
休息日:星期三

------------------------------

福島新米品種 天上米(天之粒米

日本人餐餐飯都無米不歡,就算拉麵都要配飯食,對大米嘅要求就當然非常講究啦~福島最近研發咗一款新品種嘅米-天上米(天之粒米)。依種米比一般米大粒約8%,香味出眾,口感煙韌黏性高,非常適合用嚟製作壽司同飯團,就算凍食都一樣風味不減㗎~其實福島本地出產嘅食物,全部都要通過好嚴格嘅檢驗,肯定係冇任何對人體有害嘅物質超標,先會賣畀消費者!而且從4年前開始,市場上所有蔬果、肉類、海產等等已經冇再被驗出輻射超標,絕對安心安全~所以大家都唔好再猶豫,快啲嚟福島擦餐飽啦!