香港熱再次席捲日本! 日人來港旅遊探索長壽之迷

香港熱再次席捲日本! 日人來港旅遊探索長壽之迷

[專欄:香港在日本]

日本雜誌《週刊新潮》12月14、21日號嘅兩期報導以香港人長壽秘訣為題,仲特登嚟香港採訪。點解日本傳媒會突然關注香港人嘅長壽飲食習慣?原來係因為日本厚生勞動省嘅報告。入面提到香港男性嘅平均壽命81.32,而香港女性嘅平均壽命係87.34,數字高過日本男性80.98;女性87.14,成為世界第一(數據出自日本厚生勞動省,2016)。一向有「長壽之國」形象嘅日本,當然對此大感興趣,甚至捲起咗新一輪旅遊熱潮,要嚟香港遊覽兼取經添!

咁究竟香港人又有咩長壽嘅秘密,引起日本人咁大興趣呢?

6個長壽嘅飲食習慣
14日號嘅報導總結咗6個令香港人長壽嘅飲食習慣。

1.飲用常溫/暖飲品;

2.病嘅時候飲可樂煲薑;

3.新鮮食材;

4.食龜苓膏;

5.飲涼茶;

6.秋冬食蛇羹進補。

香港熱再次席捲日本! 日人來港旅遊探索長壽之迷
TVB節目
香港熱再次席捲日本! 日人來港旅遊探索長壽之迷
TVB節目亦有介紹,仲訪問咗居港20年嘅日本人睇下佢會唔會食龜苓膏;飲涼茶同埋食蛇羹。
竹蔗茅根呢類甜嘅涼茶佢都會飲,但苦嘅龜苓膏佢就食過一次就唔想再食喇。

運動習慣、醫食同源

至於12月21日號就介紹咗香港人嘅運動習慣同醫食同源嘅概念。當中提到香港人平均行路步數比日本人多;老人家早起、晨運、打太極;飲各種種類嘅茶;食生果;飲老火湯等等。當中仲有講到香港嘅老人家有唔同嘅社區活動參加,有助搵到生存動力。

香港熱再次席捲日本! 日人來港旅遊探索長壽之迷
報導提到打太極對老人家嘅好處

twitter日本網民意見
有日本網民覺得驚訝香港成為平均壽命最長嘅地方,覺得好佩服;相反亦有網民感到不服。

正面意見:
「香港得好少電梯但就有好多樓梯,而且纖瘦嘅人都好似比較多。」
「有機會一定要去香港睇下。」
「的確香港有好多藥房,感覺比便利店仲多」

反面意見:
「只係證明果然地方細嘅話各種醫療福利都可以好好分配」

「大約20年前喺香港嘅時候,啤酒都係飲凍架咋嘛」

(其實到依加啤酒都係飲凍嘅多)