沖繩最新酒店 超近車站 徒步1分鐘即到國際通!

講到沖繩必去景點,緊係唔少得國際通商店街啦!國際通商店街上有大約600幾間手信店、食店等等,啱晒鍾意旅行購物嘅大家(〃▽〃)今日就同大家介紹一間距離國際通只有大約1分鐘路程嘅沖繩新開酒店,以後去沖繩又多一個高質住宿選擇啦~

—————————-

新開張酒店 Y’s CABIN & HOTEL 那覇国際通り

今日要同大家介紹嘅就係喺2018年5月25日新開張嘅Y’s CABIN & HOTEL 那覇国際通り啦~依個酒店集團喺大阪、北海道等等人氣旅行熱點都有分店㗎!根據2018年3月20日「有限公司NSP博士」嘅調查報告,Y’s CABIN & HOTEL 那覇国際通り係日本首家同時具備膠囊房間同一般客房嘅融合型酒店,滿足到各種唔同需要嘅顧客~

—————————-

房間類型

1.膠囊房

一個人去旅行同工幹時,唔少人都鍾意選擇住喺膠囊酒店~Y’s CABIN & HOTEL 那覇国際通り嘅膠囊房同高級膠囊房分開男層同女層,住客要用鎖匙卡先可以進入房間範圍,保安都幾嚴密㗎。膠囊房間麻雀雖小,五臟俱全,房內有電視機、毛巾、牙刷等等,大家可以拉上門簾,享受私人空間,慢慢休息。

酒店入面有好幾個行李放置區,方便入住嘅客人使用。大家更加可以租借鑰匙鏈鎖好行李,確保安心安全,咁就可以放心離開酒店出去玩啦~


—————————-

2.高級膠囊房

高級膠囊房相對寬敞,大家可以拎埋件行李入房,直接放喺房間入面,好方便!房間入面又有個附有密碼鎖嘅櫃桶,可以將貴重物品鎖喺入面。有高級膠囊房入面仲有成大張梳化喺到,非常舒適,無論出差定係閨蜜旅行都無得頂!


—————————-

3.客室

客室分為和室同洋室,房間一定要用鎖匙卡開門,保證安全。洋室內有一張好寬敞嘅雙人床,房內採用木色設計,優雅舒適。和室客房喺一般酒店唔算話好常見,依到嘅和室客房感覺好開揚新淨,最多可以開4張榻榻米床墊出嚟,啱晒一家大細旅行入住。另外每間客房入面都有獨立嘅洗手間同浴室,唔慣去大浴場嘅朋友都唔洗擔心~


—————————-

酒店設施

1.洗衣房

如果有需要洗衫,可以去洗衣房到使用投幣式洗衣機同乾衣機,咁就唔洗帶咁多衫去旅行啦~另外酒店亦都有熨斗同熨板嘅借用服務,有需要嘅朋友可以隨便使用~


—————————-

2.大浴場 桑拿房 獨立浴室

大浴場男女分開,要用客房鎖匙卡先可以開到門,保安措施非常周到。更衣室內有大型同小型儲物櫃,可以用嚟放衫同貴重財物。大浴場入面有得淋浴同浸浴,浸浴嘅浴池分為凍水池同熱水池,另外仲有間桑拿房畀大家放鬆放鬆㖭!唔習慣去大浴場沖涼嘅朋友,可以使用24小時開放嘅獨立浴室,享受私人嘅沐浴時光~

—————————-

3.休息室

夜晚沖完涼想攤抖吓,不過又未咁快訓教,可以嚟2樓嘅休息室睇吓漫畫同雜誌輕鬆吓~依到有唔少人氣漫畫,夠你睇足一整晚~又如果啱啱嚟到沖繩,仲未計畫好去邊到玩嘅朋友,都可以嚟睇睇沖繩嘅旅遊雜誌參考吓㗎~

—————————-

交通方法

1.從沖繩都市單軌電車縣廳前站出發:

沖繩都市單軌電車縣廳前站徒步3分鐘

2.從沖繩那覇機場出發:

經由那霸機場國內線旅客航站大廈2樓嘅通道,可以直接去到那霸機場站。喺嗰到乘搭沖繩都市單軌電車去縣廳前站(車程約12分鐘),再從縣廳前站徒步約3分鐘就到酒店啦~

—————————-

Y’s CABIN & HOTEL 那覇国際通り
〒900-0015 沖縄県那覇市久茂地 3-9-18
入住時間:16:00
退房時間:10:00