[日本街訪]一講起香港，日本人會諗起咩？

一直都覺得香港人單戀緊日本（號泣）點解？   

好多香港人日文發音仲純正過廣東話；日本有咩好嘢食、好嘢玩，分分鐘仲熟過香港。

但係轉返轉頭，一講起香港，日本人會諗起咩嘢呢？睇吓佢地點答啦～

「唔知啊～～～～」（分かりません）

其實我都估到㗎啦TT

日本人識鬼你香港咩！

次次話自己係香港人佢地唔係以為我係大陸人就係台灣人…

叫我教佢地講普通話…

今次訪問都有好多人話講起香港個腦係一片空白，好抱歉咁話(泣)

台灣（台湾）

日本人真係分唔到台灣同香港…

同我地覺得中東國家啊、北歐國家啊，到到都好似差唔多咁嘅感覺一樣～

最搞笑係佢地因為答唔出嘅關係，即刻上網查，笑死～～～

美食（美味しいものが沢山ありそう）

最多人對香港嘅印象就係有好多好嘢食啦！

至於佢地又知唔知香港有咩嘢食呢？

答案係：除咗去過香港嘅日本人成功答得出芒果甜品（許留山）同脆卜卜嘅豬肉（燒肉）之外，基本上大家都係答唔出…

最後經過一大輪亂估之後，終於有2個人成功答得出燒賣，仲用廣東話講好想食㖭！（冇睇片嘅朋友快啲睇！好搞笑！）

成龍（ジャッキーチェン）

受訪者話日本人應該100％識得成龍，警察故事真係代表香港揚威國際㗎！

高樓大廈＋夜景（ビルと夜景）

香港夜景真係世界聞名，對香港有返少少認識嘅日本人都會講得出香港有夜景。

而因為日本高樓大廈真係好少，所以佢地都會對香港嘅高樓大廈印象特別深刻～

紅色＋熊貓（あかとパンダ）

一睇就知佢完全將香港當係中國啦～

日本人基本上都唔係好分到香港同中國有咩分別，如果你同佢地講要過關先返到大陸佢地會好震驚～

旅行（旅行）

終於有人講起香港會想去香港去旅行！

希望做完依個訪問之後佢地會真係去玩啦～～